योहेजकेल 21

नियावोन तोलवार

1पोरबु योहोवान यो बुल मारे यां पुग्यो: 2हे मानसोन ओवलीयाद, आपसो मुख योरुसालेम भेनी कोर आरु चुखला जागा भेनी बुल सोमवाड़; इसराएल देसोन वाराम भोगवानो वोगे गोथी वात कोर आरु उना सी कोव, 3पोरबु योहोवा ओसु कोवे: देख, इसराएल हांव तारे वीरुद्ध छे, आरु आपसी तोलवार म्यान मा गोथु हापकीन तारेम गोथा धोरमी आरु पापी दुयोक नास कोरीस। 4ओतरान कोरीन की हांव तुमरेम सी धोरमी आरु पापी आखाक नास कोरने वावु छे, एना कारण मारी तोलवार म्यान गोथी निकाळीन दोखेवरे गोथी बोखेवरे लोगुन आखा जीवोनोन वीरुद् चालसे; 5तोत्यार आखा जीवे जान लेसे की योहोवा म्यान मा सी आपसी तोलवार हापेकलु छे; आरु होयी म्यान मा ओळी नी मेकी जाय।

6ओतरान कोरीन हे मानसोन ओवलीयाद, तु दम कोंजार! इसराएल देसोन रोहन्यान ओगोळ तु बेसको पोसरावान मोनो सी दुख मोनाव। 7जोत्यार हुये तुसेक पुछे, तु काहा कोन्जार रोयु? ती तु हेनुक कोहजी, खोबोरोन कारण; काहकी ओसो होयने वाळो छे जीनाक देखीन आखा मानसोक कावजो काप उठसे, तींदरा हात सुन पोड़ जासे। हुये बेसका चीमाय जासे। हुये आपसा पायो पोर उबा नी होय सोके। देखु, मोटलो वीनास आवने वाळो छे। यो वीनासकारी होयने छाचीन होयसे, परमेश्वर योहोवा यो बुल छे।

8पोरबु योहोवा यो बुल मारे यां पुग्यो, 9हे मानसोन ओवलीयाद, भोगवानो वोगे गोथी वात कोव, परमेशवर ओसु कोवे: देख,

एक तलवार, एक तीखली तोलवार छे, आरु ची चोमकाड़ली छे।

10तोलवार कोरीन मारने कोरीन निसान लेदो,

वीजवी जोसो चोमकाड़ने कोरीन चोमकाड़ लेदो।

यो सोमवीन काय हामु खुशी नी मोनाया?

होये ते योहोवान पुर्यान राजोन लाकुड़ छे आरु आखा झाड़का काजे उदुड़ सोमेजनेवावा छे।

11ओतरान कोरीन तोलवार काजे चोमकाड़या की

हुयी हातोम धोराय जाय।

तोलवार काजे निसान्या आरु चोमकाड़्या।

हेमी हुयी मारने वाळान हातोम आप तोसे।

12हे मानसोन ओवलीयाद, छाती ठुकीन रोड़,

आरु शोक मोनाव; काहकी मारी तोलवार मारा आपसा मानसोन वीरुद् मियान सी निकेवली छे।

इसराएलोन आखा मोटला आदाकारी वी मारा आपसा मानसो पुठी तोलवार सी मार्या जासे।

ओतरान कोरीन तु छाती ठुक ठुकीन रोड़।

13यो पारेखनेन टेम छे।

कोदाम तु तीनाक ओसोत जानने वाळो राजडोन वी नी रोहे, ती काय?

परमेश्वर योहोवान यो बुल छे।

14हे मानसोन ओवलीयाद, भोगवानो वोगे गोथी वात कोर, आरु हात पोर हात दे, आरु तीन वार तोलवारोन ताकोत डोबल्यो होयनो जुवे; हुयी मारने कोरीन तोलवार पुन मोटा सी मोटाक मारनेन तोलवार छे, जेरेसी कुठ्या मा डुकायला वी नि वाचे। 15हेंदरा काळजा बीको सी काप उठसे। हुये भोरान्या झोपला पोर लोथड़ीन हित पोड़से; काहकी हांव चोमेकनाय तोलवार आपलु छे। देखु, हुयी वीजवी जोसी चोमेकनाय छे, हांव मारने कोरीन हेनीक चोमकाड़लु छे। 16तोलवार, तीखी बोनावु! तोलवार जेवड़्ये काटू, सुदा ओगोळ काटू, डाखरीये काटू, जावु होरीक जागाम जां तुमरी धार होय, मारने जुगु छे। 17हांव थापड़िया वाजाड़ीस, आरु हांव आपसी रीस काजे घोनाक मारीन सेवी कोरीस, हांव योहोवान यो बुल छे।

बेबीलोनोन राजान तोलवार

18ओळी योहोवान यो बुल मारे यां पुग्यो: 19हे मानसोन ओवलीयाद, दुय वाट बोनाव ले की बेबीलोनोन राजान तोलवार आवे; दुय वाट एकुत देसोम सी निकवे। ओळी एक सोहलानी कोर, सोहोरोन वाटोन मुंडास्या पोर एक सोहलानी बोन्यो; 20तेनी तोलवारोन आवने जुगु एक वाट बोनाव: यो ओम्मोन देसोन रोब्बा सोहोर, लोगुन जासे; आरु दिसरी योहुदा देसोन वारला सोहोर योरुसालेम लोगुन जासे। 21बेबीलोनोन राजा एनु दुयु वाटोम लोड़ायनेन जागा पोर उबो छे, आरु हुयो दाना देख रोयो की हुयो काहने वाट्ये जाय: हुयो बिलखाक हालवे; हुयो तराफीम घोरुन झुटा देवता सी पुछे; हुयो काळजाक देखे। 22हेरे जेवड़ीया हातोम योरुसालेम नावोन चीट्ठी नेकेवली छे। हुयो मुय फाड़ीन आयड़े। हुयो बेस जुर्ये आयड़ीन हुकुम आपे की भोरान्या झोपला पोर लोड़ायीन सोमान लागाड़ु, दोमदोमा बांदु आरु मोर्चा बान्दी कोरु। 23पुन योरुसालेमोन रोहन्याक यो शकुन झुटो लागतो हिसे। हुये ते बेसको मोटो आन खादला छे। पुन यो हेरो ओधोरोम फोम कोराय रोयो काहकी हेनुक बोंदी बोनाय लेये। 24ऐ योरुसालेम मा रोहन्या, पोरबु योहोवा ओसु कोवे: तुमरा पाप तुमुक फोम होये, तुमरा गुना उजेनता होये; जो भुंडला काम तुमु कोर्या, तेनु पोर सी पोरदो छेटो होय गोयो, ओतरान कोरीन तुमु एनान लारे बोन्दी बोनाय जासु। 25हे इसराएलोन पापी डाहला, तारा दाहड़ा आय गोयला छे; ओधोरमोन चेहलो टेम आय पुग्यो। 26तार वाराम परमेश्वर योहोवा ओसु कोवे: पागड़ी उतार, आरु मुकुट वी उतार दे; हुयो जोसोन तोसो नी रोहनो; जो नेचो छे तीनाक उचो कोर आरु जो उचो छे तीनाक नेचो कोर। 27हांव हिनाक नास कोर दिस आरु नास कोर दिस; हाव छाचीन नास कोर दिस आरु जोत्यार लोगुन हेरा आदाकारी नी आवे तोत्यार लोगुन हुयो नासुत रोहसे; तोत्यार हांव तीनाक आप दिस।

अम्मोनियोन वीरुद् तोलवार

28हे मानसोन ओवलीयाद, भोगवानो वोगे गोथी वात कोरीन कोव की, पोरबु योहोवा यी वात ओम्मोनियोन देसन मानसो आरु हेंदरा लाजवाड़े ओसा देवता सी कोव;

सोमवु, तक तोलवार, एक तोलवार मियान सी खोयड़े छे।

तोलवार चोमोचोमो छे; तोलवार मारने जुगु तीयार छे। वीजवी जोसी चोमेकने जुगु तीयार कोरला होता!

29जोत्यार लोगुन की हुये तारा वाराम झुटा दर्शन देखे, आरु झुटा दाना देखीन तुसेक देखाड़े, की तु हेनु भुण्डला वीटोळोन गोळा पोर पोड़े तींदरा दाहड़ा आय गोया, आरु हेंदरो ओधोरोमन चेहली टेम आय पुगली छे।

30तोलवार काजे म्यान मा राख। जीना जागाम तु घोड़ला छे आरु जीना देसोम तारो उबेजनो होयो, तीनामा तारो नियाव कोरीस। 31हांव तार पोर आपसी रीस भोड़कावीस आरु तारे पोर आपसी रीसोन आगठा काजे फुक दिस; आरु तुसेक ढुरोन तोसु मानसोन हातोम कोर दिस जे मारनेमा पाका छे। 32तु आगठान इंगावु होयिस; तारो लुहुय देसोम बोनलो रोहसे; तु फोम मा नी रोहीस काहकी हांव योहोवात ओसो कोहलु छे।