Dhankavi Bible
योहेजकेल 18
आपसी जोवाबदारी
पोरबु योहोवान यो बुल मारेंचा पुग्यो: तुमु मानसे जे इसराएल देसोन वाराम यु कोहाड़ु कोवतेला,
खाटला ओंगुर ते डाहडा मानसे खाय,
पुन दाँत पुर्यान खाटा होया। ऐरो काय मोतलोब छे?
पोरबु योहोवा ओसु कोवे की मार जीवनोन आन, तुमु इसराएल काजे ओळी यु कोहाड़ु कोवनेन टेम नी जोड़से। देखु, आखान जीव ते मारो छे, जोसो बासोन जीव, तोसोत पुर्यान वी जीव छे; दुयु मारत छे। ओतरान कोरीन जे जीव पाप कोरे चो मोर जासे।
जु कुय धोरमी होय, आरु नियाव आरु धोरमोन काम कोरे, आरु नी ते बोयड़ान पुजान जागा पोर खादो होय, नी इसराएलोन घोरानान मुरती भेनी डुळा उचो कोरलो होय; नी पारकी बायोर पुठी होय, आरु नी ते दुर होयली बायोर पुठी सुवलो होय। आरु नी कुदाक वेला पाड़्यो होय, पुन कोरजाम वाळाक तेना कोरजा सी माप कोरे, नी कुदाक लुट्यो, पुन भुकलाक आपसु रुटू आप्यो होय आरु नांगराक छिंदरो पांगरायो होय, नी ईयाज पोर रुप्या आप्यो होय, नी रुप्या ईयाज खादो होय, आरु आपसा हातो सी भुंनला कामोक रुक्यो होय, मानसोन वीच छाचाय सी नियाव कोर्यो होय, आरु मार कायदा पोर चालतो आरु मार नियम काजे मानतो जाईन छाचाय सी काम कोरलो होय, ओसो मानुस धोरमी छे, चो छाचीन जीवतेलो रोहसे, पोरबु योहोवान यो बुल छे।
पुन कोदी तेरो पुर्यो डाकु, खुनी, एने उपोर कोहली वातो मा सी काहनलो पाप कोरने वाळो होय, आरु उपोर कोहला वारु कामोक कोरनेवाळो नी होय, आरु बोयड़ान पुजान जागा पोर खादो होय, पारकी बायोर पुठी सुवलो होय, गोरब्याक आरु वीगुर आसरा वाळा मानसो पुठी भुंडो वेवहार कोर्यो होय, आरु चुरी कोरतो होय, कोरजा वावान गिरवी चीजोक होड़पी लेये। त्यो मोदोत जुगु देव मुरतीया भेनी डुळा उचा कोर्यो होय, घाड़च्या मुरतीयाक पुजतो होय, इयाज पोर पोस्या आपतो होय, आरु इयाज लेतो होय, ती काय चो जीवतेलो रोहसे? चो जीवतेलो नी रोहसे; ओतरान कोरीन की चो ये आखा भुंनला काम कोरलो छे चो छाचीन मोरसे आरु हेरो लुहुय आपसी मुंडी पोर पोड़से।
ओळी कोदी ओसा मानसोन पुर्यो होय आरु चो आपसा बासोक यो आखो पाप देखीन बीकोन हागराये हेंदरे जोसो नी कोरतो होय। नी ते बोयड़ान पुजान जागाम खादो होय, नी इसराएलोन घोरानान मुरतीया भेनी डुळा उचा कोर्यो होय, नी पारकी बायोर पुठी सुवलो होय, नी कुदाक वेला पाड़्यो होय, नी कुदा कोरजा वावन गिरवेन सोमान काजे खोंडतो होय। चो चुरी नी कोरतो होय। चो भुकलाक आपसो खानो आपे आरु नांगराक आपसा छिंदरा पांगरावतो होय। चो गोरब्यान नुकसान कोरने सी पोछो रोहते होय, इयाज आरु इयाज जादा नी लेतो होय मार कायदाक मानतो होय, आरु मार नियोम पोर चालतो होय, ती चो आपसा बासोन पापन कारण नी मोरे पुन जीवतेलो रोहसे। हेरु बास, गोरब्याक लुट्यो होय, आरु ठोग्यो होय, आरु आपसा भास्योन वीच वारला काम कोर्यो होय, चो आपसा पापन कारण मोर जासे।
तेवी तुमु कोहु, काहा? काय पुर्यो बासोन पापन भार नी हुचलीया? जोत्यार पुर्या नियाव आरु धोरमोन काम कोर्या, आरु मार आखा कायदान पाळनी पाळ्या तेनु पोर चाल्या होय, ती चो जीवतेलोत रोहसे। जो जीव पाप कोरे चोत् मोरसे, नी ते पुर्यो बासोन ओधोरमोन भार हुचलसे आरु नी बास पुर्यान; धोरमी आपसा धोरमोन फोव, आरु पापीक आपसा भुंनला कामोन फोव जोड़से।
पुन कोदाम भुंनलो मानुस आपसा आखा पापो सी फिरीन, मार आखा कायदान पाळन कोरे आरु नियाव आरु धोरमोन काम कोरे, ती चो नी मोरसे; पुन जीवतेलो रोहसे। चो जोतरा पाप कोर्यो होय, उना मा गोथो कुदान फोम तेरे वीरुद् नी कोर्यो जाय; जो धोरमोन काम चो कोरलो होय, तेरे लारे चो जीवतेलो रोहसे। पोरबु योहोवान यो बुल छे, काय हांव भुण्डलाक मारने से थुड़ुक वी खुश होयो? काय हांव ऐरेसी खुश नी होयो की चो आपसी वाट सी फिरीन जीवतेला रोहे?
पुन जोत्यार धोरमी आपसा धोरोम सी फीरीन ओंदा काम, पुन भुंनला आखा घाड़्याइन कामोन ओनसारे कोरने लागे, ती काय चो जीवतेलो रोहसे जोतरा धोरमोन काम चो कोरलो होय, उनाम सी कुदाक फोम नी कोर्यो जाय। जो धुकु आरु पाप चो कोरलो होय, तेरे कारण चो मोर जासे।
तेवी तुमु मानसे कोहु, पोरबुन नियाव नियाव सारको नी होय। ऐ इसराएलोन घोराना, देख काय मारो वेवहार एक सारको नी होय? जोत्यार धोरमी आपसा धोरोम गोथा वोवीन, ओंदा काम कोरने बाज जाय, ती चे हेन्दरेन कोरता मोरसे, चे आपसा ओंदा कामोन करतोत् मोर जासे।
ओळी जोत्या भुण्डला आपसा भुंनला कामो सी फिरीन, नियाव आरु धोरोमन काम कोरने लागे, ती आपसो जीव वाचाड़से। चो जो सुच वीचार कोरे आपसा आखा गुना सी फिर जाय, ऐरे जुगु नी मोरसे, जीवतेलो रोहसे। तेवी इसराएलोन घोरानो कोवे की पोरबुन नियाव नियाव सारको नी होय। ऐ इसराएलोन घोराना, काय मारो नियाव नियाव सारको नी होय? काय तुमरो वेवहार नियाव सारको नी होय?
पोरबु योहोवान यो बुल छे, ऐ इसराएलोन घोराना, हांव तुमरे मा सी होरीक मानुसोन नियाव हेरा चाल चालोनोन ओनसारेत कोरीस। पोसतावो कोरु आरु आपसा गुनाक छुड़ु, तीत तुमरो ओधोरोम तुमरे जुगु ठुकोर खानेन कारण नी होयसे। आपसा आखा गुनाक जे तुमु कोरला छे, छेटा कोरु: आपसो मोन आरु आपसा जीवोक बोदली नाखु! ऐ इसराएलोन घोराना, तुमु काहा मोरु? काहकी, पोरबु योहोवान यो बुल छे, जो मोरे, तेरे मोरनेन कोरता हांव खुश नी होयो, ओतरान कोरीन पोसतावु कोरु, ती तुमु जीवतेला रोहसु।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.