सभोपदेशक 7

जीवनन वाराम वीचार

1वारलो नाव मोंहगा इत्तर सी आरु मोतन दाहडू पयदावारीन दाहड़ा सी वारु छे। 2टुळान काखानो खाने सी दु:ख वाळा घरन खानो खाये त्यो वारु छे; काहकी सब मानुसन आखरी यो छे, आरु जो जीवतो छे त्यो मन लगाड़ीन इना पर वीचार करसे। 3हासने सी दु:ख वारु छे, काहकी मुय परुन दु:ख सी मन सधरे। 4ओकोल वाळा मानुस न जीव ते दु:ख झेलने वाळा परीवार पर लागलो रये, पुन वीनअकलीयान ममन सुख करने वाळान घर भेणी लागलो रये। 5वीनअकलीयान गीत समळने सी ओकोल वाळान डाट समळनो वारु छे। 6काहकी वीनअकलीयान हासनो हांडान नेचो धपतला लकड़ा पर सेकने बराबर रये; यो बी वाय बार छे 7छाचली आंधारा सी ओकोलवाळो गांडवाय जाय; आरु मानुसन क वेलापाड़ीन मांगलो धन ओकोल क खतम कर देय। 8काहलास कामन शुरु हुयने सी हेको खतम हुयनो वारु छे; आरु गम राखने वाळो डाहवाळा मनसु सी वारु छे। 9आपसा मन मा उतवाळीयो रीस झुण करे, काहकी रीस वीनअकलीयात् जुन मन मा रये। 10यो नी कयनो की वीतीया दाहड़ा मा इना सी वारु काय हुतो? काहकी यो तु ओकोल सी नी पुछतो। 11ओकोल राजो सारकी छे, राजोन तोसी एक वारली चीज छे आरु तेनु मानसो जुगु नोफान वात कोवाये जे कोळी पोर रोवे। 12काहकी ओकोलन आड़ रीपियान आड़ मा काम आवे; पुन गियानन फायदो यो छे की ओकोल सी हेको राखने वाळान जीव न राखवाळी हुये। 13परमेश्वरन काम क देखो; जीनी चीज क त्यो आड़प करलो छे, हेको कुन सुदो कर सके? 14सुकन दाहड़ा सुक मान, आरु दु:खन दाहड़ेन वारा वीचार कर; काहकी परमेश्वर दुयन क एक सात राखलो छे, जीना से मानुस हेको बाद हुयने वाळी वातोन क नी समझे। 15आपसा रीकामा जीवन मा हांव यो सब काय देखियो; कोय बी धोरमी आपसा नियावन काम करतो जाईन नाश हुय जाय, आरु बुरो मानुस बुराय करतो जाईन ढेरकी उमर हात करे 16आपसाक घण धोरमी झुण बनावे, आरु नी ते आपसाक घणो अकलो वाळो बनावजी; तु कायक आपसा क नाश क कारण हये? 17घणो भुण्डो बी झुण बने, आरु नी बुरो हयजी; तु काह थारी टेम सी पेहले मरे? 18यो वारु छे की तु इनी वातन क धरीन रय आरु उनी वात पर सी बी हाथ झुण उठावे; काहकी जो परमेश्वर क बीक माने त्यो इनी सब वेला सी पार हुय जासे। 19ओकोलुत् सी नगरन दस आदिकारीयान आश राखने मा ओकोल वाळान क जादा ताकत जड़े। 20धरती पर काहय बी असो धोरमी मानुस नी हय जो भलाय करे आरु जीना सी पाप नी हयो हय। 21जतरी वात कये सब पर कान झुण लगाड़े, असो नी हय की तु यी वात समळे की थारो चाखरीया थारी बुराय करे। 22काहाकी तु जाने की तु बी घणी वार दिसरान क सराप दीदलो छे। 23यो सब हांव ओकोल सी जाचीयो; हांव कयो, हांव ओकोल वाळो हुय जाईस, पुन यो म्हार सी दुर रयो। 24त्यो जी वात दुर आरु घणो उंडो छे, हेको पुरावो कुन ली सके? 25हांव आपसा मन लगाड़ीयो की ओकोल न वाराम जानो; की हेको हेरो आरु हेको पुरावो जानो, आरु कुमनियान बुराय आरु बुराय जो गांडवाय छे, हेको जानु। 26आरु हांव मोत सी बी जादा पीड़ा वाळी एक आरु चीज देखीयो, मतलब उनी बायजात क जेको नाव फंदो आरु जाळ छे आरु जेका हाथ मा हाथकड़ी छे, जीना ओदमी सी परमेश्वर खुश छे चोत् हेरेसी वाचसे, पुन पापी हेरो शिकार होयसे। 27देख, उपदेशक कये, हांव गियान वाटे अलग अलग वतोन क जाचीन देखियो आरु यी वात निकळी, 28जीनाक म्हारो मन हाय तक हेरी रयो, पुन जड़्यो नी। हजार मा सी हांव एक ओदमी क हात करीयो, पुन हेनु मा एक बी बायजात क नी देखीयो। 29देखु, हांव अतरीत वात क देखीयो, की परमेश्वर मानुस क सुदो बनायो, पुन त्या घण सवटा वीचार निकाळीया।