सभोपदेशक 1

जीवाय वाय बार छे

1योरुसालेमन राजा, दाऊद न पोर्या आरु सभोपदेशकन वचन। 2सभोपदेश क यो वचन छे, वाय बार वाय बार, वाय बार वाय बार, आखो बी वायेन छे, 3जो मेहनत मानुस इनी धरती पर करे, ओका सी हेको काय फायदु जड़े? 4एक पीढ़ी जाय आरु दिसरी पीढ़ी आवे, पुन धरती जसी की तसीत जोलोम बनली रये 5दाहड़ु उगे आरु डूबी वी जाय, आरु छाटलोत उना जागा पर जात रये जाँ सी त्यो उगे। 6वाहळो ते दोखेवरे भेनी जाय, आरु बोखवरे भेणी फिरती जाय; आरु फिरे आरु चाले, आरु आपसा जागा पोर पछी आत रवे। 7आखा नोंद्‌या एकुत् जागा भेणी ताव-ताव उह्‌या करे। त्या सब दरीया सी मिळ जाय आरु हेको भेणी पछी फिर जाय। 8आखी वात हरबड़ावने वाळी छे, मानुस हेको पुरावो नी कर सके। देखीन भी डुळान हर नी भागे, आरु समळीन भी कान्टा नी भराये। 9जो वात हय गयी त्या अळी पछी हुयसे। जो काय बनगियो त्योत् ओळी बनसे; आरु धरती पर काहय बी नवलो नी हय। 10काय असी काहली वात छे, जेका वाराम लोगहन कय सके की देख यी नवली छे? यी ते वेगला वाराम हामरे सी घण पेहले सी हुयती आय रयी। 11वेगला वारान वात न काय फोम नी रयी, आरु हयने वाळी वातन क भी हेनको बाद मा आवने वाळान क फोम नी रये।

ओक्‌कोल वाय वार छे

12हांव उपदेशक योरुसालेम मा इसराएलन राजो हुतो। 13हाव म्हारो मोन लगाड़ीयो की जो काय धरती पर करीयो जाय, हेको पुरावो ओकोल सी सोची समजीन मालोम करो; की यो मोटा दु:खन काम छे जो परमेश्वर मानुसो वाटे टाकलो छे की त्या हेका मा लागला रोवे तोसे। 14हांव हेनु सब काम क देखीयो जो काय धरती पर हुये; देखु त्यो आखो वायबार छे आरु वाहळाक धरने तोसो छे। 15जो आड़ो छे त्यो सुतरो नी हय सके, आरु जो नी होय त्यो गिनाये नी। 16हांव मारा मोन मा कयो, देख, जतरा म्हार सी पेहले योरुसालेम मा हुता, हेनु आखा सी हांव घणी ओकोल हात करलो छे; आरु मेखे घण जबर ओकोल आरु गियान जड़ गयलो छे। 17आरु हांव म्हारो मोन लगाड़ीयो की ओकोलन पुरावो लेयो आरु भंगलायली आरु वीनअकलाय वात क बी जान लेयो। मेखे पतो लागीयो की यो बी वाहळाक धरने तोसो छे। 18काहकी जादा ओकोलन सात मा जादा दु;ख हये, आरु जो आपसी ओकोल वदाड़े त्यो आपसो दु:ख क बी वदाड़े।