Dhankavi Bible
आमोस 9
परमेश्वरन नियाव
हांव पोरबु काजे बेदी उपोर उबरोवलु देख्यु, आरु होयु कोयु: “खाम्बान बेला पोर दे जेरेसी पोयड़ी हाले, आरु हेनु आखा मानसोन मुनका पोर पाड़ीन टुकड़ा-टुकड़ा कोर; आरु जे नास होयने गोथा वाचे, तेनुक हां तोलवार कोरीन मार दिस; हेनुम गोथो एक वी नी ढासनी निकवसे, आरु जे आपसाक वाचाड़े, चे वाचनो नी जुवे। काहाकी चाहाय चे खुंदिन पाताव मा उतरी जाय, ती चां गोथु हांव हात वोदाड़ीन हेनुक लावीस; चाहाय चे वादवा उपोर चोहोड़ जाय, ती चां गोथु हांव तेनुक उतार लावीस। चाहाय चे कार्मेल बयड़ान कातर मा डुकाय जाय, पुन चां वी हांव हेनुक हेर हेरीन धोर लीस, आरु चाहाय चे दोरीयान तोवे मारी निंगा गोथा आडोव होये, चां वी हांव घोड़सा काजे हेनुक ठुनकावनेन हुकुम आपीस। चाहाय वेरी धोरीन गुलामी मा ली जाय, चां वी हांव हुकुम आपीन तोलवार कोरीन हेनुक मारा नाखीस; आरु हांव हेनु पोर भोलाय कोरने कोरीन नी, बुरायत् कोरने जुगु निंगा कोरीस। सेनाओन परमेश्वर योहोवाक छिमने से धोरती गोळे, आरु हेरा आखा रोवनेवावा कोलपे; आरु हुये आखा की आखा मिसर देसोन नील नोदी जोसा होय जाय, जी जादा होय जाय आरु कोम होय जाय। जे वादवा मा आपसा बोंगलु बोनावे आरु आपसा तारामोन्डळीन निव धोरती पोर नाखे, आरु आपना हुकुम सी दोरीयान पानी धोरती पोर उहवाड़ देये, तेरो नाव योहोवा छे। ऐ इसराएलीयो योहोवान यो बुल छे काय तुमु मारे जुगु कुसियो सारका नी होय? काय हांव इसराएल काजे मिसर देस गोथु आरु पोलीस्ती काजे कोप्तोर गोथु नी निकाव लायु? देखु, पोरबु योहोवान निंगा इना पापी मुलुक पोर लागली छे, आरु हांव इनाक धोरती पोर गोथु नास कोरीस; तोत्यार वी हांव आखी रीती सी याकुबोन घोरानाक नास नी कोरो,” योहोवान यो बुल छे। म्हारा हुकुम सी इसराएलन घरानो आखा मुलुको मा असो जात रयसे जसो ओन चाळनी मा जात रये, पुन हेको एक बी पुसायलो दानु धरती पर नी पड़से। म्हारी परजान सब पापी जे कोवे, होयी पीड़ा हामरे पोर नी पोड़े, आरी नी हामुक घेरवे, होये तोलवार वेर माराय जासे।
इसराएलन ओळी बोननो
तेन टेमे हांव दाऊदोन पोड़ला खोपड़ा काजे उबो कोरीस, आरु हेरा आखा वाड़ान नाका काजे सुदारीस, आरु हेरा उजाड़ काजे ओळी बोनावीस, आरु जोसो पेहले होतो, तेनाक तोसोत् बोनाय दीस। जेरेसी होये वाचला एदोमियों काजे पुन आखा मुलुकोन जे मारा मानसो कोवाये, आपसो होक कोर लेये, योहोवा जो यो काम पुरो कोरे, हेरोत् यो बुल छे। योहोवान यो वी बुल छे, देखु, ओसा दाहड़ा आवे, की होव जुपनेवावा होव गेरनेवावाक आरु ओन्गुर दाख काजे कुस्सनेवावा बिज वेरनेवावा गोथु ओगु नीकवी जासे; आरु बोयड़ाम गोथो नोवलो ओन्गुरोन रोस टोपेकने लागसे, आरु आखा बोयड़ाम गोथो उहुवने लागसे। हांव आपसा मानसे इसराएलोन केदड़ाक पोछु ली आवीस, आरु जे उजेड़ला सोहोर काजे ओवी पोछा बोनावीन हेनुम वोस जासे, होये ओंगुरोन वाड़ी लागाडीन ओन्गुरोन रोस पीसे, आरु वाड़ी लागाडीन हेन्दरा फोळ खासे हांव हेनुक, हेन्दरा जागा मा वेरीस, आरु चे आपसा जागा मा हेनुक आपला छे, ओळी कोदी नी उखावे, तुमरा परमेश्वर योहोवान योत् बुल छे।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.