आमोस 6

इसराएल न वीनाश

1वीखू तेनु पोर जे सियोन मा सुके रोवे, आरु तेनु पोर जे सामरीयान बोयड़ा पोर बीहये वीगुर रोवे, चे जे वारु मुलुकोम नावसादया छे, जीन्दरे जुळ इसराएलोन घोरानो आवे 2कलने सोहोरम जाईन देखु, आरु वां गोथा होमात नावोन मोटला सोहोर मा जावु; ओळी पोलीस्तीयान गोत सोहोर मा जावु। काय ये मुलुक तुमरा दुय मुलुक गोथा वारु छे? काय हेन्दरी काकोड़ तुमरी काकोड़ गोथी मोटी छे? 3तुमु भुन्डला दाहड़ाक छेटा कोर देये, आरु लड़ायीन गादी क धोड़े ली आवतेला।

4तुमु हातीन दातोन खाटला पोर लुटु, आरु आपना आपना आथरुन पोर पाय नांबा कोरीन सुवु, आरु वारु गोंहोवता गाडरा आरु जोबरा आरेग्‌ला वाछड़ा काजे खाय। 5तुमु झुनगा पुठी गीते गावु आरु दाऊद जोसा भाती भातीन वाजान आवाज निकावु; 6आरु कोटेवराम गोथो मोन्‍द पीयु, आरु वारु वारु तेल लागाड़ता होय, पुन युसुफ पोर आवनेवावी पिड़ान वाराम सोमवीन नी घाबरायतेला! 7ओतरान कोरीन चे हेमी देसोम गोथा निकाय देसे, आरु जे पाये खोळवीन सुवता होता, हेन्दरो सुक जातो रोवसे। 8परमेश्वर योहोवा आपसीत् आन खाईन कोवलु छे, जीना पोर याकुब घाड़ाय कोरे, तेरेसी हांव कुहराय, आरु हेरा कीला सी सीगी कोरो; आरु हांव इना सोहोर काजे तेनु आखा भेळ जो हेरेम छे, वेरीन होकोम कोर दिस। 9कोदाम काहना घोरोम दोस ओदमी वाचला रोवे, तेवी चे मोर जासे। 10जोत्यार कुदान काकु, जु तेरु धोपाड़नेवावु होय, हेरा धोड़ काजे घोरोम गोथो निकावने जुगु हुचेलसे, आरु जो घोरोन खुनाम रोवे तीना सी कोवसे, काय तारे जुळ कुदु ओळी छे? तोत्यार हुयो कोवसे, कुदु नी: “तोत्यार हुयो कोवसे” हुग रोव! हामुक योहोवान नाव नी लेनो जुवे। 11काहाकी योहोवान हुकुम सी मोटलो घोर भुकरा भुकरा होय जासे, आरु नानला घोरोम चीसाड़ा होयसे। 12काय घुल्‌ला चाफरीया पोर दोवड़े? काय कुदु ओसा जागा मा बुल्यो काजे जुपे जां तुमु मानसे नियाव काजे जोहोर मा, आरु नियावोन फोळ कोड़वा फोळ मा बोदली नाखलु छे? 13तुमु ओसी चीजोन कोरता खुस्सी होयु जी रीकामी छे; आरु कोवु, हामु आपनात् हेमोत सी ताकोत सी कोरनेम सोहोर काजे जीतला छे। 14ओतरान कोरता सेनाओन परमेश्वर योहोवान यो बुल छे, ए इसराएलोन घोराना, देख, हांव तुमरे वीरुद् एक ओसो मुलुक उबो कोरीस, जो होमातोन घाटी गोथो लीन ओराबान नोदी लोगुन तुमुक वेला पाड़से।