Dhankavi Bible
2 थिस्सलुनीकियो 1
नमस्कार
पौलुस आरू सिलवानुस आरू तीमुथियुस
कि आरू छे चिठ्ठी लिखी छे थिस्सलुनीकियों कि मंडळी क नाव, जो हामरे बास यहोवा–भगवान आरू पोरबु ईशु मसीह मा छे।
हामरे बास यहोवा–भगवान आरू पोरबु ईशु मसीह कि आरू छे तुमू फोकटन दया आरू शांती मिवती रवे।
न्याय क दहाडू
हे भाईस, आरू बहनीस तुमरे विषय मा हर टेहाव यहोवा–भगवान क धन्यवाद करने जुवे, आरू यो वारू भी छे एरकरीन कि तुमरा विश्वास खुप बढ़ता जाता छे आरू तुमू सब क मोंग आपस मा खुप ही बढ़तो जातो छे। याहा तक कि हामु आप यहोवा–भगवान कि मंडळी मा तुमरो विषय मा डाहळाय करता छे की यात्रा झगड़ो करावनो आरू तकलीद तुमू सहित होय, उन सब मा तुमरो धीरज आरू विश्वास प्रगट हुयसे छे।
यो यहोवा–भगवान क सच्चा न्याय क स्पष्ट प्रमाण छे कि तुमू यहोवा–भगवान क राज्य क योग्य ठहराया, ओका करता तुमू दुःख भी हाकलिया होय। काहकि यहोवा–भगवान क निकट यो न्याय छे कि जो तुमू तकलीद देता छे, तीनुक बदलने मा तकलीद देय। आरू तुमू जो तकलीद देता होय, हामरे साथे हुक देय, ओका टेहाव जव कि पोरबु ईशु आपसा ताकत वाळा दूतोन क साथे धधकती होय अगो मा सोरग छे प्रगट होयछे। आरू जो यहोवा–भगवान कि नी उवखता आरू हामरे पोरबु ईशु क खुश खबर क नी मानता उनछे पलटा लेछे। वो पोरबु क सामने छे आरू ओकी शक्ति क तेज छे दूर हईन अमरकाय विनाश क दंड देखछे। यो उना दाहड़ा मा हुयसे, जव चुखलो लोगहन मा महिमा लेने, आरू सब विश्वास करने वाळा उना दाहड़ा मा मोटो काम करसे, काहकि तुमू ने हामरी गवा पर विश्वास कर्या।
एरकरीन हामु सदा तुमरे करता प्रार्थना भी करता छे कि हामरा यहोवा–भगवान तुमू इनीये बुलाहट क योग्य समझे, आरू भलाई की हर एक मरजी आरू विश्वास क हर एक काम क शक्ति सहित पूरो कर्या। ताकि हामरे यहोवा–भगवान आरू पोरबु ईशु मसीह क फोकटन दया क लारे हामरे पोरबु ईशु मसीह क नाव तुमू मा महिमा देख्या, आरू तुमू उना मा।
Source notes (1)
- Cross-reference प्रेरितन 17:1
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.