Dhankavi Bible
1 कुरन्थियो 3
मंडळी मा दुय भाग
हे भाईस, आरू बहनीस, हाव तुमू छे इनीये रीति छे वात नी कर सक्या जोसो आत्मिक मानसे छे, पुन जोसो संसार क मानसे छे, आरू उनछे जो मसीह मा पोर्या छे। 1हाव ने तुम्हे दुध पिवाड्या, अन नी खावड़ाया; काहकि तुमू ओको नी खाय सकता हुता; वरन् हिमी तक भी नी खाय सकता होय, काहकि हिमी तक संसार होय। एरकरीन कि जव तुमू मा किचवाय आरू झगड़ा छे, तो काय तुमू संसार क मानसे जोसो नी? आरू काय मानुस की रीति पर नी चालता? 2काहकि जव एक कयता छे, “हाव पौलुस क छे” आरू दिसरा , “हाव अपुल्लोस क छे” तो काय तुमू जीवो क नी?
अपुल्लोस काय छे? आरू पौलुस काय छे? केवल सेवक, जिनके द्वारा तुमू ने विश्वास कर्या, जोसो पोरबु ने हर एक क काम करनो जुवे। 3हाव ने लागाड़ ्या, अपुल्लोस ने पानी नाख्यो, पुन यहोवा–भगवान ने मोट। एरकरीन नी तो लागाड़ने वावा काय छे आरू नी सीचनेवावा, पुन यहोवा–भगवान ही सब काही छे जो बढ़ावनेवावो छे। लागाड़ने वावा आरू सीचनेवावा दुय एक छे; पुन हर एक आपने ही मेहनत क लारे आपसी ही मजदूरी देख्या। काहकि हामु यहोवा–भगवान क सहकर्मी छे; तुमू यहोवा–भगवान की खेत आरू यहोवा–भगवान की रचना होय। यहोवा–भगवान क उना फोकटन दया क लारे जो मखे दिया गया, हाव ने बुध्दिमान राजमिस्त्री क समान नीव नाखी, आरू दिसरा ओको पर रद्दा राखता छे। पुन हर एक मानुस चोकचौळीया रये कि वो ओको पर कोसो रद्दा राखता छे। काहकि ओको नीव क छुड़ जो पड़ी छे, आरू वो ईशु मसीह छे, काही दीसरी नीव नाख सकता। यदि काही इनीये नीव पर सोना चाँदी या महंगा दगड़ा या लाकड़ो या खोड़ो या पुवो क रद्दा राखे, तो हर एक क काम प्रगट होय जाछे; काहकि वो दाहड़ो ओको देखाड्या, एरकरीन कि आगठो क साथे प्रगट होयछे आरू वो आगठो हर एक क काम पारख छे कि कोसी छे। जेरो काम ओको पर बना होया स्थिर रयछे, वो न्याय क दाहड़ो देखछे। यदि काही क काम धप जाछे, तो वो हानि झेलसे पुन वो वाच जाछे धपतो धपतो। 4काय तुमू नी जानता कि तुमू यहोवा–भगवान क मंदिर होय, आरू यहोवा–भगवान क आत्मा तुमू मा निवास करता छे? यदि काही यहोवा–भगवान क मंदिर क नष्ट करसे तो यहोवा–भगवान ओको नष्ट करसे। काहकि यहोवा–भगवान क मंदिर चुखलो छे, आरू वो तुमू होय। काही आपने आप क धुखो नी देय। यदि तुमू मा छे काही इनीये संसार मा आपने आप क ज्ञानी समझे, तो मुर्ख बने कि ज्ञानी होय जाय। काहकि इनीये संसार क ज्ञान यहोवा–भगवान क निकट मुर्खता छे, जोसो लिख्यो छे, “वो ज्ञानियो क उनकी चतराय मा फोस देता छे” आरू पछु, “पोरबु ज्ञानियो क विचार क जानता छे कि वो व्यर्थ छे।” एरकरीन मानुस पर काही डाहळाय नी करे, काहकि सब काही तुमरो छे: काय पौलुस, काय अपुल्लोस, काय कैफा, काय धरतीम, काय जीवन, काय मरण, काय वर्तमान, काय भविष्य, सब काही तुमरो छे, आरू तुमू मसीह क होय, आरू मसीह यहोवा–भगवान क छे।
Source notes (4)
- Cross-reference इब्रानियों 5:12,13
- Cross-reference 1 कुरन्थियो 1:12
- Cross-reference प्रेरितन 18:4-11 प्रेरितन 18:24-28
- Cross-reference 1 कुरन्थियो 6:19; 2 कुरन्थियो 6:16
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.