Khaih-hwuyên 20

1Yôôch gô hloq muuyq yaak plêêk kahri pôôt xing plêêk, adrơk gay kal ku raluk leh e kalek ji muuyq talơy looy tooy kôt đom ti kơy. 2Kơy rôp xok ôô vayaa, 'ngưq laa volh hnu, đơu nưq laa kamuuych, long Sa-tan, yôôch kal ni hlê đom muuyq ravơu xanưm. 3Kadraq taweek ni muut raluk be e kalek, yôôch kađnip ji kal qwat tol ni, xôq ni leh măn pa ôôh aluut kaluh daak dêh đnoyq dong truh tuôôy muuyq ravơu xanưm jah payôôch. Atêq nưq, ni pheq jah luh vlôh đom muuyq kawat lêq.

4Yôôch gô hloq kaluh ngaai kung khơl manih 'ngôôy tol nưq ji qwuyen xưh xadrah heq jah kahniq ka oot, kaah phool hiel ku khơl dro heq biq dool akoq vii dơơp xanưk ku Lôôk Jê-xu ji vii apok ku Kơy Plêêk, kung dii dêq hloay khơl adro leh kuh ayuôôt ôô long vangưl ni, kung leh nhonq dơuq hlêêl ku ni tol ngưưl long tol ti oot, oot riirh hlê ji dưk xakaq kung dii Lôôk Wơơt Dêh đom muuyq ravơu xanưm. 5(Sôôq măn hlê đom khơl manih kaxêêt yôôych leh riirh hlê dong truh tuôôy heq dêq muuyq ravơu xanưm.) Nưq laa varơuq riirh hlê thưq nhưk. 6Vanong hloay ji vah hloay ka dro leq e phon đom varơuq riirh hlê thưq nhưk! Varơuq kaxêêt thưq vaarq be e qwuyen kajoq tol khơl manih nưq, bơh oot hnoq laa thơy tơơk tưp ku Kơy Plêêk ji ku Lôôk Wơơt Dêh, ji hnoq kung Kadraq dưk xakaq đom muuyq ravơu xanưm.

7Yôôch tuôôy muuyq ravơu xanưm jah payôôch, Sa-tan hnoq jah luh klơlh aduq karuk ku ni, 8yôôch ni hnoq hooy vlôh pa ôôh aluut kaluh daak dêh măn poot panưh tol vari, tamooy Got ji tamooy Ma-got, xôq anguk oot hlê ka varơuq tahmơt. Bing kuun ku oot dang đaji choah tahli. 9Oot garuk tok ranưh loch aduq tol vari ji dưk rawiit raap măn ku khơl vah kung theng xung xiaq, yôôch ôôlh kahri pôôt xing plêêk ji vuh jaq oot. 10Yôôch kamuuych, adro pa ôôh aluut oot, biq taweek muut hlôôk ôôlh ji lưưu hwinh, đơu ôô kung hnhư hlit pa ôôh măn đom aduq nưq, ji oot hnoq biq jiq jiêh ka hngơy hloay ka klôôy dong truh đơơy đơơy, miet miet.

11Atêq nưq, gô hloq muuyq ngaai ko kôt ji Kơy 'ngôôy tol ngaai, vari ji plêêk xadăk klôônq klơlh varơuq e mot ku Kadraq, đơu be e aduq leq jah deng ka oot. 12Yôôch gô hloq khơl adro kaxêêt, kaah khơl kôt hloay khơl de, dưk kangưưr ngaai, ji kaluh rahlăp jah luh vlôh, yôôch muuyq rahlăp kadrơy jah luh vlôh, nưq laa Rahlăp Varơuq Riirh. Khơl kaxêêt biq xưh xadrah tyauq kaluh kajoq jah valơk hlê đom kaluh rahlăp nưq, tyauq tong kaluh varơuq dơơp ku oot. 13Tahli bla hlê khơl adro kaxêêt 'laarq tahli, varơuq kaxêêt ji âm phuh bla hlê khơl adro kaxêêt aduq ni, ji tôôy muuyq dro biq xưh xadrah tyauq tong kaluh varơuq dơơp ku oot. 14Yôôch varơuq kaxêêt ji âm phuh biq taweek muut hlôôk ôôlh. Neq laa varơuq kaxêêt yưk vaarq — 'ngưq laa hlôôk ôôlh. 15Atoh adro leq biq xadrah hloq leh jah valơk đom Rahlăp Varơuq Riirh, yôôych adro nưq biq taweek muut hlôôk ôôlh.