Ma-thi-ơ 11

1Varơuq xalih vlôh tuôôy Lôôk Jê-xu heq padoh pato kưl vaarq dro khơl xatyauq ku kadraq yôôch, Kadraq chuh klơlh đnư xôq pato dayq ji padoh taboon đom kaluh theng ku oot. 2Tuôôy nưq, Jăng, atêq tuôôy xing đom tu jah tameng taboon hlê truh kaluh varơuq dơơp ku Lôôk Wơơt Dêh, yôôych gamưh hlê khơl xatyauq kơy heq patăk hooy, 3heq tơơl dii Kadraq: “Thơy laa Kơy pheq truh, long 'wot đong takôô muuyq Kơy kadrơy?” 4Xôq tơơl hlê, Lôôk Jê-xu đnooy dii oot: “Atêq tuôôy chuh hooy, dayh taboon hlê ka Jăng kaluh kajoq oh ay hloq ji tameng. 5Dro apul 'yo hloq, dro talêêt tawaak hooy, adro paruh jah xarêh xaraat, dro klok tameng ik, dro kaxêêt jah khienq riirh hlê ji dro adrah pơl hwơơl jah tameng Hêêl Kaxay. 6Ji tabơh kơyq leh biq gưlh lôp vii kơq thơy laa adro jah vanong.”

7Tuôôy nưq, tuôôy khơl dro nưq dưk hooy yôôch, Lôôk Jê-xu xarôp đnooy dii manih karôp truh Jăng: “Oh ay hooy vlôh aduq wăngq we xôq 'yo kajoq — ưk kadeer biq anhưh bơyh khiel ih? 8Be aalq anưq yôôych oh ay hooy vlôh xôq 'yo kajoq — muuyq dro jah hlưp qwuân aau đom goh kaxay jơq be? 'Yo hơq, dro hlưp goh kaxay yôôych măn đom hnhư vuua. 9Wih hlê, oh ay hooy vlôh xôq 'yo kajoq — muuyq hnhư hlit jơq be? Gô đnooy dii oh ay, jơq ji pheq đnooy măn iaq ka muuyq hnhư hlit. 10Nưq laa truh kơy đơu apok neq heq jah valơk:

‘'Yo hơq, Gô đong patăk khơl jah patăk ku Gô hooy kangưưr koot, kơy hnoq deep trôôk ku koot kangưưr koot.’

11Dong dik, gô đnooy dii oh ay, leh muuyq dro leq jah panưk tok đom khơl dro jah khơl drê pa iir vlôh laa kôt galơh iaq Jăng Bap-tit, đơu dro de dik đom daak dêh daak plêêk yôôych kôt galơh iaq kơy. 12Bơh, xing hngơy ku Jăng Bap-tit dong truh juneq, daak dêh daak plêêk chiuq tangưưr dii rôp toop, ji khơl adro xơk tauq xok gamưh paraat kalh tagoa xok ni. 13Vii dêq hloay kaluh apok hlit ji ganuun heq đnooy adroyq truh đơơy Jăng; 14ji atoh oh ay e xuum 'yo nhonq, yôôych kơy nưq laa Ê-li, manih pheq truh. 15Kơyq e tôôr xôq tameng, dayh tameng. 16Bơh gô hnoq taso adrơơk neq dii varơuq kajoq? Ni yôôych dang đaji bing oh de 'ngôôy aduq tabôôt xa, đơu oot pariau taayh mamuuyq, 17đaneq: ‘'Wot klôôp taliaq ka êêp ay, đơu êêp ay leh ayuch ayauq. 'Wot ook alo đơu êêp ay be nhim.’ 18Vii Jăng truh, be xa kung be hôôch, yôôych oot đnooy: ‘Kơy nưq biq Kamuuych nhôp.’ 19Koot Manih truh, xa ji hôôch, yôôych oot đnooy: ‘'Yo kơy nưq hơq, muuyq dro ha ak xa, muuyq dro vuul lok, 'wơyq ku khơl adro xok xơu ji bing dro kadrôôp maroh!’ Bơh yôôch varơuq khôôt xet jah 'yo xanưk xing khơl koot xau ku mư.”

20Atêq nưq, Kadraq xarôp toah katưưt kaluh theng đơu dêq hloay kaluh pheep akêh ku Kadraq jah dưk dơơp ka kaluh aduq nưq, vii oot heq leh rawiit xuum. 21“Ra ơơh ka may, theng Kô-ra-xin! Ra ơơh ka may, theng Bêt-sai-đa! Vii atoh kaluh varơuq taay yaak xalih vlôh katul êêp heq jah dơơp vlôh aduq theng Ti-rơ ji Si-đôn, yôôych laa oot heq rawiit xuum đom aau jaliê ji thul vlo xing adroyq yôôch. 22Long anưq, Gô đnooy dii êêp, hnoq e varơuq klêq chiuq iaq ka Ti-rơ ji Si-đôn đom hngơy xưh xadrah iaq laa ka êêp. 23Măn may, Ka-bê-na-um, dang aleq may hnoq jah tơơk tok truh tol plêêk? May hnoq hooy pôôt truh aduq âm phuh. Vii atoh kaluh varơuq taay yaak xalih vlôh aduq may heq jah dưk dơơp aduq Sô-đôm, yôôych laa theng nưq heq măn hlê truh hngơy neng. 24Long anưq, Gô đnooy dii êêp, đom hngơy xưh xadrah, tôôy varơuq hnoq klêq chiuq ka vari Sô-đôm iaq laa ka êêp.”

25Muut tuôôy nưq, Lôôk Jê-xu lơh apok tơơl: “Kuh Vaq, laa Lôôk ku plêêk ji vari, koot ayuôôt laat Vaq, vii Vaq heq kadook padu kaluh varơuq neq khơl manih khôôt xet ji dro hlolh xet, đơu kahnoq varơuq nưq ka oh de. 26Jơq, kuh Vaq, vii đanưq laa varơuq hlah xuum kangưưr Vaq. 27Tôôy varơuq heq jah Vaq gô pahnăp xôq ka gô; leh kơyq xet Koot đêh vlôh Vaq, kung leh kơyq xet Vaq đêh vlôh Koot ji khơl leq đơu atoh Koot trôôch kahnoq ăm. 28Dayh truh dii gô, nee dêq hloay khơl leq pơl hwơơl ji chiuq pơq parêq, ji gô hnoq ăm oh ay varơuq padơy pado. 29Dayh pơq xok varaq ku gô tol oh ay ji hok xing aduq gô, vii gô e xuum hwêêt ji apôôt xăk, yôôch oh ay hnoq axek jah varơuq padơy vado ka phool hiel oh ay. 30Vii varaq ku gô klêq chiuq ji gengq gô laa ahyơơl tơơp.”