Mak 6

1Xing aduq nưq, Kadraq heq chuh hooy, yôôch xuq truh katu hnhư ku kadraq, ji khơl xatyauq ku Kadraq hooy tyauq Kadraq. 2Truh hngơy Sa-bat, Kadraq xarôp pato dayq đom hnhư tagumq. 'Ngưng manih tameng biq tưng hưng, đnooy đaneq: “Kaluh apok pato dayq neq xok vlôh xing leq? Varơuq khôôt xet heq jah kahniq ka kơy neq kung toleq pheep akêh đaji hơq kahnoq vlôh xing ti kơy nưq laa aleq? 3Be aalq neq laa adro thơq môk, koot kanau ku Ma-ri ji ay kanau ku Ja-kơ Jô-sê, Ju-đe ji Si-môn ih? Be aalq toleq dro ma oh kadrê ku kơy nưq đong măn đnen katul haay ih?” Oot biq xatôôlh lôp truh Kadraq. 4Lôôk Jê-xu đnooy dii oot đaneq: “Hnhư hlit yôôych leh thiuq varơuq kul vado, đêh vlôh aduq dêh katu ni, katul khơl takuul takiel ni ji aduq kôôch hnhư ni.” 5Kadraq leh ik dơơp paq kê varơuq taay yaak leq kađnư, đêh vlôh Kadraq heq payơh bingq tuôôy xôq ti tol thier axit adro jiq jiêh. 6Kadraq hloq akêh vii kơq xuum leh tuôq ku oot, yôôch Kadraq hooy pato dayq rawiit kaluh palơy pla.

7Kadraq taayh kưl vaarq dro jah rơơlh ji xarôp patăk dăt oot vlôh hooy, vaarq dro vaarq dro, Kadraq kung kahniq ka oot taay yaak tol kaluh garu xi, 8ji patăk dăt oot đaneq te xagook kajoq tyauq ka tuôôy hooy, đêh vlôh muuyq gay katôôl đơu heq — leh tôôp, leh droong, kung leh baak jêêt đom hnek katêêk — 9đơu e troaq kaxôôp, ji “Oh ay te hlưp vaarq aau.” 10Ji Kadraq đnooy ka oot: “Atoh tuôôy oh ay muut đom hnhư leq, dayh kưq măn aduq nưq dong truh tuôôy leq oh ay chuh hooy klơlh hnhư nưq. 11Paq kê aduq leq leh đoonq nhonq oh ay, long leh chiuq tameng oh ay, yôôych tuôôy chuh klơlh đnư, dayh tapolh thul 'laarq jôôk haay, đaji bơơn xanưk tachơơl hlê oot.” 12Nưq laa, atêq tuôôy dưk hooy, oot padoh taboon đaneq tôôy adro duh pheq wiit xuum. 13Oot druyh 'ngưng kamuuych, kung hloay para dơu ka 'ngưng dro jiq ji payơh oot.

14Anưq yôôch, vuua Hê-rôt heq tameng xet hêêl neq, vii yal ahlôôk Kadraq heq wih vlôh ahlôôk ahna, ji khơl kadrơy đnooy đaneq: “Jăng Bap-tit heq jah dơơp ăm riirh hlê xing aduq kaxêêt, bơyh nưq kaluh pheep akêh taay yaak đong dưk dơơp aduq adro neq.” 15Măn khơl adro kadrơy đnooy đaneq: “Kơy nưq laa Ê-li.” Đơu sôôq kadrơy đnoyq đnooy nưq laa: “Muuyq hnhư hlit, dang đaji muuyq đom khơl hlit.” 16Bơh tuôôy tameng anưq, Hê-rôt đnooy đaneq: “Jăng, manih đơu gô dool akoq, kơy nưq heq jah khienq ăm riirh hlê.” 17Vii kadih Hê-rôt, heq patăk manih, rôp Jăng ji vek kơy đom tu truh varơuq Hê-rô-đia (kadrê ku Phi-lip, ma oh kanau vuua) vii kơq vuua heq pajêêk mo nưq. 18Bơyh Jăng heq đnooy dii Hê-rôt đaneq: “Dik laa lôp ganuun tuôôy Vuua pajêêk kadrê ku ma oh kanau vuua.” 19Bơh Hê-rô-đia tôq jaraq kơy ji xung păk kaxêêt kơy, đơu mo nưq leh ik, 20jo Hê-rôt yôq Jăng, vii xet kơy laa adro hyioh jăk ji xuum kaxay, lunưq vuua jư ka kơy jah hrok hrol, long tuôôy tameng kơy đnooy, vuua thier areh xuum, đơu vuua măn e xuum chiuq tameng kơy. 21Yôôch tuôôy truh kawat tamuut, laa tuôôy Hê-rôt doot waal hngơy pa iir kơy mơơy khơl padrok dơơp ku kơy kung khơl dưk jarooy bing kuun, ji khơl padrok dêh Ga-li-lê, 22yôôych tuôôy nưq koot kadrê Hê-rô-đia ku vuua heq tawaak muut, ayuch ayauq, ji khienq Hê-rôt kung khơl adro kung para dii vuua thier hlah xuum, lunưq vuua heq đnooy dii oh kadrê: “Dayh vôôch gô paq kê varơuq kajoq koot trôôch ji gô hnoq ăm ni ka koot.” 23Kơy paleek dii mư đaneq: “Long koot vôôch gô, truh muut panoot daak dêh ku gô, gô kung hnoq ăm koot.” 24Nưq laa, atêq tuôôy hooy vlôh pi gôk, oh kadrê vôôch miq ni: “Koot duh vôôch kajoq?” Yôôch mo nưq tơơl: “Akoq ku Jăng Bap-tit.” 25Hloay juneq, đom varơuq pơl wol tuôôy wiit muut hlê kung vuua, oh kadrê vôôch: “Koot xung laa hloay juneq vuua ăm ka koot akoq ku Jăng Bap-tit xôq tol garaak.” 26Long vlôh jêêk thier raa hlu rơu, bơh vuua leh trôôch chôôyq ka'lăk oh kadrê bơyh kơq apok paleek ku ni ji khơl manih mơơy đong 'ngôôy kung para dii kơy, 27lunưq vuua hloay juneq, patăk kuun dool, patăk xagook akoq ku Jăng truh, ji atêq tuôôy vlôh pi gôk, ni hooy dool akoq kơy đom tu. 28Ni xagook akoq ku kơy xôq tol garaak ji ăm ni ka oh kadrê, yôôch oh kadrê ăm ni hlê ka miq ni. 29Tuôôy heq tameng xet varơuq, khơl xatyauq ku Jăng truh, xok xaak kơy, ji xagook ni hooy up xôq đom xanưng.

30Khơl jah rơơlh anguk hlê kung Lôôk Jê-xu, taboon ka Kadraq tôôy varơuq oot heq dơơp ji kaluh varơuq oot heq pato. 31Kadraq dăt oot: “Kadih oh ay dayh kadih hooy truh aduq leq nưq đêh raa wăngq vleng, ji dayh padơy vado muuyq jơy.” Vii e thier raa 'ngưng adro hooy dalơh adro hooy hlê, ji oot pheq đnooy leh e kawat xôq xa. 32Oot kung mamuuyq hooy tok ge truh muuyq aduq wăngq vleng. 33'Ngưng adro heq hloq oot chuh hooy ji nhonq vlôh oot, lunưq xing loch kaluh theng, khơl kadrơy heq kung mamuuyq charơơk jôôk truh đnư ji truh aduq adroyq oot. 34Tuôôy heq tawaak vlôh klơlh ge, Kadraq hloq muuyq bing manih thier karôp, ji Kadraq arơơk xuum biit angơuq oot vii oot dang đaji trưưu leh e manih jư, yôôch Kadraq xarôp pato oot 'ngưng varơuq. 35Tuôôy nưq heq ahnuy yôôch, lunưq tuôôy truh kung Kadraq, khơl xatyauq ku Kadraq tơơl đaneq: “Aduq neq laa aduq wăngq vleng ji wat neq heq rayôôp klôôy yôôch. 36Vôôch ăm manih karôp vlôh xuq, xôq atêq tuôôy hooy muut kaluh palơy pla gah gih neq, yôôych oot hnoq ik kadih root kajoq nưq xôq xa.” 37Bơh tuôôy tơơl apok oot, Kadraq dăt: “Oh ay dayh ăm oot xa.” Oot tơơl dii Kadraq: “Tuôôy hooy yôôch, e lưp 'wot hnoq ik root jah vaarq hreek đơ-ni-ê tôôp đơu ăm ka manih karôp xa ih?” 38Anưq yôôch, Kadraq đnooy dii oot: “Dayh hooy. Axek 'yo. Oh ay e toleq poop tôôp?” Atêq tuôôy axek vôôch, oot tơơl: “Dăp poop tôôp ji vaarq poop ka.” 39Kadraq patăk ka dêq hloay manih karôp 'ngôôy pôôt jêêk tưng riak tol rek adriilh. 40Oot 'ngôôy aklah vlôh kaluh riak aklah vlôh muuyq hreek dro ji vlôh dăp kưl dro. 41Atêq tuôôy adrơk dăp poop tôôp ji vaarq poop ka, 'ngơơk mot tok plêêk, Kadraq kuh kway ji pleelh tôôp vlôh yôôch palo ka khơl xatyauq kadraq xôq oot adrơk ahlook ka manih karôp, Kadraq kung ahlook vaarq poop ka vlôh ka tôôy adro. 42Oot raay xa ji jah phiq phơh. 43Ji oot tôôch anguk jah kưl vaarq vuk atar viik kaluh paleh tôôp raah ji ka. 44Khơl adro heq xa tôôp đom kơh dăp ravơu dro khơl kanau.

45Hloay juneq, Kadraq ahluk ahlul khơl xatyauq kadraq tawaak tok ge ji hooy adroyq hlê gah piik hơq, truh Bêt-sai-đa, đom tuôôy Kadraq ăm manih karôp hooy xuq. 46Tuôôy oot heq dưk hooy, Kadraq hooy tok đoot xôq apôôy. 47Truh klôôy, ge heq măn katul tahli, ji Kadraq măn muuyq dro tol vari. 48Hloq oot đong raanq paraat awaayh awơq — vii khiel đong kaxơơlh ngưưr dii oot — yôôych kawah wat poot klôôy nưq, Kadraq hooy jôôk tol raak daak truh aduq oot ji Kadraq xung dalơh hlê oot. 49Bơh tuôôy 'yo hloq Kadraq tawaak hooy tol raak daak, oot biit đaneq nưq laa kamuuych, lunưq oot pariau rawôônq tok, 50vii oot raay 'yo hloq Kadraq ji biq varaal hwaal. Bơh hloay juneq, Kadraq đnooy dii oot ji patăk dăt oot: “Dayh kajưk xuum! Laa thơy neq! Te yôq!” 51Kadraq tawaak muut đom ge dii oot ji khiel langưm hooy hlơơp, khơl xatyauq e varơuq akêh paq ik đom katul khơl oot. 52Vii oot heq leh hlolh truh pheep akêh dơơp vlôh tôôp, tađôôy muut đnư, xuum oot măn ja găk gauq.

53Tuôôy heq tapa hlê piik gah hơq, oot hooy truh Gê-nê-xa-rêt ji muut gah kađnư. 54Tuôôy oot vlôh klơlh ge, vii 'yo xet Kadraq lien, 55lunưq khơl kadrơy charơơk hooy loch dêh nưq ji xarôp xakôôk khơl adro biq bingq tol chanưng truh aduq đơu oot tameng đaneq Kadraq đong măn đnư. 56Long aduq leq Kadraq hooy muut, đom kaluh palơy pla, long đom theng dêh long đom dêh katu, manih karôp raay xagook khơl adro bingq xôq ka aduq tabôôt xa ji vôôch Kadraq xôq axit dik oot hnoq ik vêq muut thơơl aau ku Kadraq, ji paq kê adro leq vêq muut Kadraq raay jah yơh bingq.