Mak 4

1Muuyq yưk tra, Kadraq xarôp pato dayq pi gah tahli, ji muuyq bing manih thier karôp tagumq hlê rawiit gah Kadraq. Vii anưq, Kadraq heq tawaak muut muuyq poop ge tol tahli xôq 'ngôôy aduq nưq, măn dêq hloay bing manih măn tol gah tahli. 2Kadraq pato oot 'ngưng varơuq bơơn apok atoh, ji đom varơuq pato dayq ku kadraq, Kadraq đnooy dii oot: 3“Dayh tameng nee! Hơq, muuyq dro dơơp nôông hooy vlôh paraay adrek. 4Varơuq xalih vlôh tuôôy manih paraay adrek, muuyq sôôq kalook klêh gah trôôk ji kaluh xêêp truh xa dêq sôôq nưq. 5Sôôq kalook kadrơy klêh tol aduq phơu kalook, laa aduq leh e toleq vari dik, ji ni vlok tok hloay juneq, vii leh chah jaruq muut vari. 6Tuôôy mot hngơy vlok tok, ôôlh biq xaar huur vuh, ji vii leh e rayah, kaluh nưq biq ha'yauq kateh. 7Sôôq kadrơy klêh muut katul pôôp jaliê, jaliê jalôk vlok tok taqwaat taqwal ni, ji ni leh vlôh raak play kajoq ik. 8Kaluh kalook kadrơy đnoyq klêh tol vari kaxay, tưng kalook xagook truh raak play, tuôôy vlok tok yôôch jah kôt tok, ji ni raak play vlôh pe kưl, vlôh drơu kưl, ji vlôh muuyq hreek.” 9Ji Kadraq đnooy: “Kơyq e tôôr xôq tameng, dayh tameng.”

10Tuôôy Kadraq măn đêh muuyq dro, khơl adro măn rawiit Kadraq kung kưl vaarq dro jah rơơlh vôôch Kadraq truh kaluh apok atoh nưq. 11Kadraq đnooy dii oot: “Varơuq kadook truh daak dêh ku Kơy Plêêk heq jah kahniq ka oh ay, bơh dii khơl adro kadrơy, tôôy thưq raay laa bơơn apok atoh,

12xôq tuôôy 'yo, yôôych oot măn hnoq ik 'yo, đơu leh hloq ik,

tuôôy tameng, yôôych oot măn hnoq ik tameng, đơu leh hlolh ik,

leh kheoq, oot wiit xuum hlê ji kadrôôp jah ka'lăk ka oot.”

13Kadraq đnooy dii oot: “Oh ay leh hlolh apok atoh neq? Anưq yôôych dơơp aleq oh ay hlolh dêq hloay kaluh apok atoh? 14Manih paraay kalook nưq paraay đaauq. 15Măn neq laa khơl adro pi gah trôôk aduq đơu đaauq jah paraay vlôh, đơu tuôôy oot tameng đaauq nưq, Sa-tan hloay juneq truh ji varoh xok đaauq heq jah paraay aduq oot. 16Kung anưq, neq laa khơl adro aduq phơu kalook tuôôy jah paraay, nưq laa adro đơu tuôôy oot tameng đaauq, hloay nhonq xok đaauq dii xuum hlah, 17đơu oot leh e rayah đom xăk đơu vơ laa đơ đơ. Anưq laa tuôôy pơơl dal long rôp toop xalih vlôh vii kơq đaauq, oot vơ xatôôlh gưlh. 18Sôôq kadrơy laa khơl adro katul pôôp jaliê jah paraay đaauq. Nưq laa khơl adro tameng đaauq, 19đơu kaluh varơuq tabông truh đơơy neq ji biit apau ku varơuq karoh e, kung xuum hmưch trôôch 'ngưng varơuq kadrơy xalieh muut, taqwaat hach đaauq ji ni vlôh leh raak play. 20Ji neq laa khơl adro tol vari kaxay jah paraay đaauq, nưq laa khơl adro tameng đaauq ji nhonq xok, yôôch vlôh raak tagăp play, vlôh pe kưl, vlôh drơu kưl, ji vlôh muuyq hreek.”

21Kadraq đnooy ka oot: “Đeen ataak tok leh aalq xôq ik xôq 'laarq wo long 'laarq chanưng jơq be? Be aalq xôq ni ik xôq tol jôôk đeen? 22Vii be e varơuq leq laa kadook padu atoh be aalq laa xôq jah tauq vlôh, kung leh e varơuq kajoq heq xalih vlôh trôôk padu kadip đơu leh aalq laa xôq jarooy truh aduq kahnoq vlôh. 23Atoh kơyq e tôôr xôq tameng, dayh tameng.” 24Yôôch Kadraq đnooy dii oot: “Dayh rơơt rol varơuq oh ay tameng. Oh ay hlơk wolh tyauq toleq, yôôych tanưq hnoq jah hlơk wolh ka oh ay ji ni hnoq jah hnook athêêp ka oh ay đnoyq. 25Vii adro leq e yôôych ni hnoq jah kahniq ăm adro nưq, măn adro leh e, yôôych pheq đnooy kajoq đơu adro nưq e, hnoq biq xok hooy klơlh ni.”

26Kadraq taboon: “Daak dêh ku Kơy Plêêk laa luneq: dang đaji muuyq adro hơq paraay adrek tol vari, 27ay nưq vik long parol, klôôy long hngơy, kalook adrek vlok muh ji kôt tok luleq — kadih ay leh xet. 28Vari vlôh raak tagăp play tyauq kach ku ni: adroyq dik laa ưk hla, atêq nưq truh 'môôk va, yôôch kalook vôk parêq aduq raak nưq. 29Yôôch tuôôy xiêk va dôôp drêêk, ay vơ palo pla lahaay vii xiêk varoot goch heq truh.”

30Ji Kadraq đnooy: “Haay hnoq ik atoh 'yo daak dêh ku Kơy Plêêk đaji luleq, long haay hnoq ik padoh vlôh daak dêh nưq bơơn apok atoh kajoq? 31Dang đaji muuyq kalook avơy, laa kalook đơu tuôôy jah paraay pôôt vari, 'miêh laa de dik đom dêq hloay kaluh kalook tol vari, 32đơu tuôôy heq jah paraay yôôch, ni vlok tok ji vlôh jêêk kôt yơơt iaq tôôy kaluh kaxeq đom hluôôt, ji ni pachah vlôh kaluh đook kôt, pheq đnooy xêêp plêêk hnoq ik dơơp tapu 'laarq yôôp ni.”

33Dii 'ngưng apok atoh đanưq, Kadraq padoh đaauq ka oot, 'yo tyauq kakơh oot hnoq ik tameng ik, 34bơh Kadraq be padoh kajoq ka oot đơu leh e apok atoh, lunư tuôôy măn đêh, Kadraq padoh hlolh tôôy varơuq ka khơl xatyauq Kadraq.

35Đom hngơy nưq, tuôôy mot hngơy heq wih gach, Kadraq đnooy dii oot: “Haay duh tapa hlê kơn gah pi hơq.” 36Ji atêq tuôôy chuh klơlh manih karôp, oot jarooy Kadraq kung hooy dii oot, vii Kadraq 'miêh đong măn tol ge. Kung e kaluh ge kadrơy xatyauq Kadraq. 37Muuyq đơơt khiel kaxuh thier kôt puh tok ji ranaq kưq kapuh muut ge pheq đnooy ge jeq biq viik daak. 38Măn kadih Kadraq đong măn pi atêq ge, ganưq angôôlh vik. Oot nhơk kah Kadraq ji tơơl kung Kadraq: “Thơy lơơy, thơy leh biit laa haay jeq kaxêêt aleq?” 39Atêq tuôôy kadrăch kah, Kadraq toah khiel ji xanoh dii tahli: “Dayh hnhep yơu! Dayh ieen hnhep yơu!” Anưq laa, khiel dưk kapuh, ji e varơuq ieen hnhep dêq hloay. 40Kadraq đnooy oot: “Aleq oh ay yôq? Oh ay măn koq e xuum tuôq aleq?” 41Oot biq kadrăch varaal dii xuum yôq paal paq ik ji oot đnooy dii mamuuyq: “Anưq yôôych Adro neq laa kơyq, vii pheq đnooy khiel ji tahli pheq tameng apok Kadraq?”