Lu-ka 11

1Varơuq xalih vlôh tuôôy Kadraq đong xadrook apôôy ka muuyq aduq nưq, tuôôy Kadraq xadrook apôôy payôôch, muuyq đom khơl xatyauq tơơl dii Kadraq: “Kuh Lôôk, xiin pato 'wot xadrook apôôy, đaji Jăng kung heq pato khơl xatyauq kơy.” 2Yôôch Kadraq đnooy dii oot: “Tuôôy oh ay xadrook apôôy, dayh tơơl:

‘Kuh Vaq, apôôy yal Vaq jah hlăng vah.

Apôôy daak dêh Vaq jah truh.

3Xiin ăm 'wot koot tuôông xa duh xa tôôy hngơy ku 'wot koot.

4Xiin tha ka'lăk 'wot koot truh kadrôôp maroh ku 'wot koot,

vii 'wot koot kung tha ka'lăk tôôy adro măk lôôkq 'wot koot.

Apôôy te jarooy 'wot koot muut varơuq adô aluut.’”

5Ji Kadraq đnooy dii oot: “kơyq đom oh ay e 'wơyq, ji katul mưng truh dii ay nưq, yôôch đnooy kung ay nưq: ‘'Wơyq lơơy, xiin ăm gô xapo pe poop tôôp, 6vii muuyq adro 'wơyq ku gô xing xangưưy truh kung gô, đơu gô leh e kajoq xôq adoot ka ay nưq’? 7Tuôôy manih hơq tơơl hlê xing pi'lăp hnhư, ay nưq e hnoq đnooy: ‘Te dơơp ngơyq gô. 'Mok heq kađnoch yôôch, ji khơl koot gô đong măn tol chanưng kung dii gô. Gô leh hnoq kah ăm ay kajoq ik.’ 8Thơy đnooy dii oh ay, pheq đnooy ju adro nưq leh kaah xôq xok ka ay hơq vii laa khơl 'wơyq ku ni, bơh xing kơq varơuq chaay mot vôôch ratuut ku ay hơq, lunưq tuôôy đong biq panưk kah, adro neq hnoq xok ka ay hơq đu sôôq tôôp ay hơq duh. 9Thơy kung đnooy dii oh ay, dayh xiin, yôôych varơuq nưq hnoq ik kahniq ka oh ay; dayh axek, yôôych oh ay hnoq tavơh; dayh ahngoq 'mok, yôôych 'mok hnoq luh ka oh ay. 10Vii atoh kơyq xiin yôôych jah; kơyq axek yôôych tavơh; ji 'mok hnoq jah luh ka dro leq ahngoq. 11Adro vaq leq đom oh ay, tuôôy koot xăk xiin kaa, yôôych adro nưq ăm ni volh tađôôy vii kaa? 12Long adro koot xiin katăp, yôôych adro nưq ăm ni ding dip? 13Lunưq, atoh oh ay, ju laa xơuq, heq xet kaluh kadrool tolh xôq ka koot xau oh ay, yôôych Vaq laa Kơy măn tol plêêk hnoq kahniq Kơy Phool Hiel ka adro xiin Kadraq 'ngưng galơh iaq đaleq?”

14Kadraq vơơ druyh avlôh muuyq kamuuych hôp. Nưq yôôch, varơuq xalih vlôh tuôôy kamuuych heq vlôh yôôch, adro hôp đnooy ik, ji bing manih thier tưng hưng. 15Bơh taleq dro đom sôôq nưq đnooy: “Kơy nưq druyh kamuuych, gamưh Bê-ên-xê-bun, laa lôôk kamuuych.” 16Măn sôôq kadrơy, vii xôq thư Kadraq, oot đooy vôôch aduq Kadraq muuyq hlêêl akêh xing plêêk. 17Bơh bơyh heq xet xuum biit ku oot, Kadraq đnooy dii oot: “Daak leq tuôôy biq ahlook aklah kadih tachơơl hlê ni yôôych biq dơơp ka pachaay waay, ji hnhư tachơơl hlê hnhư yôôych hrưp naat. 18Atoh Sa-tan kung biq ahlook aklah kadih tachơơl hlê kadih ni, yôôych dơơp aleq daak dêh ku ni măn hlê ik? Vii khơl kơy đnooy gô druyh kamuuych gamưh Bê-ên-xê-bun. 19Atoh gô druyh kamuuych gamưh Bê-ên-xê-bun, yôôych gamưh kơyq đơu koot xau khơl kơy druyh kamuuych? Vii anưq, oot hnoq laa khơl adro xưh xadrah khơl kơy. 20Lunư, atoh gô druyh kamuuych gamưh lôk ti ku Kơy Plêêk, yôôych daak dêh ku Kơy Plêêk heq truh dii khơl kơy. 21Tuôôy muuyq adro kalh paraat jah jaauq maak viik ngăk jư 'yo hnhư ni, yôôych garuh anôôp ku adro nưq jah jư hlê, 22bơh tuôôy muuyq adro kalh iaq ay nưq kathôp hmơt, yôôych adro nưq jay iaq ay nưq, varoh xok jaauq maak ku ay, laa thưq đơu ay nưq ganưq gamưh muut, yôôch adro nưq aklah ahlook kua varoh jah xing ay nưq. 23Adro leq tuôôy leh măn dii gô laa tachơơl hlê gô, ji adro leq tuôôy leh anguk hlê kung gô yôôych hyaak hyek. 24Tuôôy kamuuych 'moh heq vlôh klơlh muuyq dro, ni hooy dalơh kaluh aduq kateh hriet axek akhiim aduq padơy. Ji tuôôy leh axek ik, ni dăt: ‘Gô hnoq wiit xuq hnhư gô, laa aduq đơu gô heq vlôh klơlh.’ 25Atêq tuôôy xuq truh, ni hloq hnhư heq jah rahiing deep xarêh xaraat ji deep xôq e aduq. 26Tuôôy nưq, ni hooy ji pago tyauq pơh kamuuych kadrơy xơk iaq ni kung muut riirh đom hnhư neq. Ji đơơy riirh tuôôy atêq ku adro nưq jêêk vlôh ra ơơh iaq tuôôy kapa tep.”

27Varơuq xalih vlôh tuôôy Kadraq đong đnooy kaluh apok neq, muuyq khơl kadrê hơq xing katul bing karôp tơơl apok tok, mo đnooy dii Kadraq: “Vanong ka klaak heq pa iir vlôh thơy ji tôôh đơu thơy heq uq.” 28Bơh Kadraq tơơl: “dong dik yôôych, vanong ka kơyq tameng apok Kơy Plêêk ji tameng jư xok.”

29Tuôôy bing karôp đong tưưuq tagumq 'ngưng iaq, Kadraq pa xarôp đnooy: “Adrơơk nooy neq laa muuyq adrơơk nooy xơk tauq. Ni axek akhiim muuyq hlêêl akêh, đơu hnoq leh e hlêêl akêh leq jah kahniq ka ni đêh vlôh hlêêl akêh ku Jô-na. 30Vii Jô-na heq jêêk vlôh hlêêl akêh đaleq ka manih theng Ni-ni-ve, yôôych Koot Manih kung hnoq laa hlêêl akêh đanưq ka adrơơk nooy neq. 31Đom hngơy xưh xadrah, Mư vuua Pi Naam hnoq dưk tok kung dii manih ku adrơơk nooy neq, ji tauq kadrôôp oot, vii mo heq truh xing aduq lôôch dik ku vari xôq tameng apok khôôt xet ku vuua Sa-lô-môn, ji 'yo hơq, muuyq Kơy kôt galơh iaq Sa-lô-môn măn đnen. 32Đom hngơy xưh xadrah, manih theng Ni-ni-ve hnoq dưk tok kung dii adrơơk nooy neq ji hnoq tauq kadrôôp ni, vii oot heq wiit xuum adroyq apok padoh taboon ku Jô-na, ji 'yo neq, muuyq Kơy măn kôt galơh iaq Jô-na măn đnen.

33Atêq tuôôy ataak đeen, leh kơyq xôq ni măn aduq kađoq, kung leh măn 'laarq apoop đêêk tađnưk, bơh măn tol jôôk đeen xôq khơl drơy tawaak muut hnoq ik hloq xaraar tađnah. 34Gooy đeen ku xăk xamơk laa klong mot ku oh ay. Tuôôy mot oh ay laa tolh, dêq xăk oh ay kung jah galaay ngôp xaraar tađnah. Bơh tuôôy ni xơuq, xăk xamơk oh ay kung viik kamơng jaluk. 35Vii anưq, dayh rơơt rol, leh kheoq xaraar tađnah đom oh ay laa kamơng jaluk. 36Nưq atoh dêq xăk oh ay galaay ngôp xaraar tađnah, leh e phon leq kamơng jaluk, yôôych ni hnoq dêq hloay tađnah tađnaak, đaji tuôôy xaraar đeen jaraak tađnah oh ay.”

37Nưq yôôch, tuôôy Kadraq đnooy payôôch, muuyq adro Pha-ri-si mơơy Kadraq aleq ka Kadraq hnoq ik xa kawaal achung dii kơy. Tuôôy heq hooy truh, Kadraq 'ngôôy muut para xa. 38Tuôôy hloq anưq, manih Pha-ri-si thier tưng hưng vii Kadraq leh dưk dơơp varơuq 'nhaau ti patep dik adroyq kawaal xa. 39Bơh Lôôk đnooy dii kơy: “Juneq, manih Pha-ri-si khơl kơy 'nhaau xarêh pi gôk cheet ji dooy, măn pi'lăp khơl kơy yôôych viik varơuq hmưch trôôch ji xơk tauq. 40Khơl adro ta'ngơk hơq! Leh aalq Kơy heq dơơp jêêk pi gôk kung dơơp jêêk pi'lăp ih? 41Ju anưq, dayh kahniq ahlook kaluh kajoq măn pi'lăp đaji varơuq ăm hloh, ji 'yo neq, tôôy thưq laa xarêh ka khơl kơy.

42Lunư, ra ơơh ka manih Pha-ri-si khơl kơy, vii khơl kơy tơơk tưp phon kưl baak ha, hôôy hương ji tôôy thưq kaxeq rek đom hluôôt, đơu khơl kơy ka'lăk hlê hyioh jăk ji xuum xung xiaq Kơy Plêêk. Bơh duh pheq dưk dơơp kaluh varơuq neq, ji be ka'lăk hlê kaluh varơuq hơq. 43Ra ơơh ka manih Pha-ri-si khơl kơy, vii khơl kơy xiaq trôôch aduq 'ngôôy tolh nhưk đom hnhư tagumq ji kaluh apok vôôch hlơq katul aduq tabôôt. 44Ra ơơh ka khơl kơy, vii khơl kơy dang đaji xanưng rap, ji khơl drơy leh xet tuôôy joaq jalon tok taalh.”

45Atêq nưq, xôq tơơl hlê, muuyq đom khơl thơy ganuun đnooy dii Kadraq: “Thơy lơơy, thơy kung đnooy ra ơơh 'wot tuôôy đnooy đanưq.” 46Bơh Kadraq dăt: “Ra ơơh ka thơy pato ganuun khơl kơy đnoyq! Vii khơl kơy chơt ka khơl drơy kaluh gengq parêq khoq pơq, măn kadih xăk khơl kơy be bôk muuyq lôk ti khơl kơy muut gengq parêq nưq. 47Ra ơơh ka khơl kơy, vii khơl kơy xơy xanưng ka khơl kơy hlit, măn mo kơy khơl kơy heq păk kaxêêt oot. 48Đanưq, khơl kơy dơơp xanưk ji kung trôôch varơuq dơơp ku mo kơy êêp, vii oot heq păk kaxêêt khơl kơy hlit, măn khơl kơy xơy xanưng. 49Kung vii anưq, varơuq khôôt xet ku Kơy Plêêk xanoh: ‘Gô hnoq patăk khơl kơy hlit ji khơl jah rơơlh truh dii oot, bơh oot hnoq păk kaxêêt ji rôp toop 'ngưng adro đom sôôq oot’ 50xôq vahaap ku dêq hloay khơl kơy hlit heq kahrôq vlôh xing tuôôy patep panưk jêêk pheq biq vôôch aduq adrơơk đơơy neq, 51xing vahaap ku A-bên dong truh vahaap ku Xa-cha-ri, laa adro heq biq păk kaxêêt măn katul para hơu ji hnhư hơu. Jơq, gô đnooy dii khơl kơy, vahaap nưq hnoq jah vôôch hlê xing adrơơk đơơy neq. 52Ra ơơh ka khơl thơy ganuun khơl kơy, vii khơl kơy xok hooy gay kal ku hlolh xet, kadih khơl kơy leh muut, đơu khơl kơy klơl hlê khơl drơy muut.”

53Atêq tuôôy Kadraq vlôh klơlh aduq nưq, khơl thơy pato ganuun ji manih Pha-ri-si pa xarôp tachơơl hlê Kadraq đangq đik ji takaay tayaat dii Kadraq truh 'ngưng varơuq, 54axek trôôk xôq anơk rayaalh Kadraq truh apok đnooy vlôh xing huuy Kadraq.