Ju-đe 1

1Ju-đe, xapok ku Lôôk Wơơt Dêh Jê-xu ji ma oh kanau ku Ja-kơ, atăq ka khơl dro jah tawooyh taayh, laa ăm khơl dro jah xung xiaq đom Kơy Plêêk, laa Vaq, ji jah jư 'yo đom Lôôk Wơơt Dêh Jê-xu: 2Apôôy vôôch varơuq angơuq ji hrok hrol kung xuum xung xiaq jah athêêp 'ngưng iaq đnoyq ka oh ay.

3Oh ay xung xiaq lơơy, đong tuôôy xok dêq tôôy paraat raanq xôq valơk ka oh ay truh varơuq wơơt xok raa ku haay, gô hloq duh pheq valơk ka oh ay, ahmưk nhăk oh ay tahmơt tadơơp ka xuum tuôq, laa varơuq heq jah pahnăp muuyq yưk đuh dêq ka khơl vah. 4Vii muuyq sôôq dro heq leenq aluq alaq muut đom khơl oh ay, khơl adro xing hnu heq biq đinq adroyq ka varơuq hmơt dook neq, khơl adro leh kuh kul tađôôy vanong plêêk ku Kơy Plêêk haay vlôh varơuq bơyq ba, leh 'yo nhonq Kơy Chuh Têêh vơ muuyq ji Lôôk haay Lôôk Wơơt Dêh Jê-xu.

5Long oh ay heq hmưq xet tôôy varơuq muuyq yưk laa đuh, gô xung panhăk oh ay đaneq Lôôk Jê-xu, tuôôy heq wơơt muuyq tamooy vlôh klơlh dêh Ai Kâp, yôôch atêq nưq, Kadraq heq păk kaxêêt dêq khơl adro be tuôq. 6Hloay kaah dii khơl yaak plêêk, ji khơl kơy heq leh jư ka varơuq qwuyen da uh ku kadih oot, đơu hooy ka'lăk aduq măn thuôk xuq oot, yôôych Kadraq heq karuk jư oot đom looy tooy đơơy đơơy, 'laarq aduq kamơng jaluk, deng ka varơuq xưh xadrah đom hngơy kôt yưk, 7dang đaji Sô-đôm ji Gô-mô-rơ kung kaluh theng gah gih oot, kung varơuq dơơp đaji vaarq theng hơq, heq pagưlh xăk muut varơuq apuq atrăp ji heq charơơk tyauq varơuq hmưch trôôch xăk xamơk đêh dii varơuq e 'miêh, oot jah xok dơơp varơuq atoh pheq chiuq hmơt dook bơơn ôôlh đơơy đơơy. 8Lunư, kung muuyq đanưq, khơl adro apau neq leh vơ dơơp 'moh 'mơy xăk xamơk ni, đơu oot kung leh 'yo khơl kơy taay yaak vlôh kajoq, laay măn đnooy ra ơơh khơl Kơy tađnah tađnaak. 9Wih hlê, yaak plêêk ưk Mi-chen, đom tuôôy tagoa dii kamuuych, tagêh truh xaak ku Môi-se, kơy nưq heq leh hôôk đnooy vlôh apok xưh xadrah e apok đnooy ra ơơh tachơơl hlê ni. Tađôôy muut đnư, kơy yaak plêêk heq đnooy: “Apôôy Lôôk đnooy toah xăk!” 10Bơh bing neq đnooy ra ơơh paq kê varơuq kajoq oot leh hlolh, măn dêq hloay kaluh kajoq oot hlolh tyauq xăk xamơk đaji kaluh ôô leh xet biit, yôôych oot laay biq kaluh varơuq nưq păk kaxêêt. 11Ra ơơh ka oot! Vii oot heq kadih hooy muut trôôk ku Ka-in, oot heq kadih kahluh muut gưlh lôp ku Ba-la-am vii baak jêêt, ji oot heq biq kaxêêt hlơơp đom varơuq tachơơl hlê ku Kô-rê. 12Bing neq laa khơl adro đom kaluh waal xa xung xiaq ku oh ay, đaji kaluh phơu talaat ngôôm, xa hôôch juq lăp dii oh ay kach leh xet kamưưl, vơ lo văch xiap oot; bing nưq laa kaluh đum kluk leh e daak, biq khiel klôôp hooy; laa kaluh ưk xiêk thơơm leh e play, heq kaxêêt vaarq yưk, vii biq vưyq tok dêq rayah; 13laa kaluh đơơt ranaq kapuh diik miik tol daak tahli, vlôh kamuh kahnoq vlôh kaluh varơuq kamưưl ku oot; laa kaluh xalok đôôk hyaak đơu kamơng jaluk ju hwek heq jah deng 'miêh ka oot truh đơơy đơơy. 14Mot kadrơy, Hê-nok, xau đơơy thưq pơh jauq xing A-đam, kung heq đnooy hlit truh bing neq, đaneq: “Dayh 'yo hơq! Lôôk truh dii ka ravơu khơl vah ku Kadraq, 15xôq dưk dơơp varơuq xưh xadrah đôôyq dii tôôy dro, xôq rôp kadrôôp tưng phool hiel truh dêq hloay kaluh varơuq leh kuh kul ku oot, 'ngưq laa kaluh kajoq đơu oot heq dơơp trôôk leh kuh kul, ji truh tôôy apok xơk tauq đơu khơl dro kadrôôp leh kuh kul heq đnooy tachơơl dii Kadraq.” 16Bing neq laa khơl adro đnooy ramôôl, khơl adro alo ook, hooy tyauq kaluh hmưch trôôch ku oot, ji huuy oot đnooy vlôh kaluh apok pa ưưt akhwoak, adô adeng khơl drơy vii axek lơơy.

17Bơh oh ay, khơl dro jah xung xiaq lơơy, dayh văch kaluh apok heq jah đnooy adroyq neq xing khơl jah rơơlh ku Lôôk haay, laa Lôôk Wơơt Dêh Jê-xu, 18đaneq oot heq đnooy dii oh ay: “Đom katuôôy atêq lôôch hnoq e khơl adro đnooy ra ơơh hooy tyauq kaluh hmưch trôôch leh kuh kul ku oot.” 19Bing neq jơq laa khơl adro dơơp aklah vlôh, xuum klaak đaji ôô gôk, leh e Kơy Phool Hiel. 20Bơh oh ay, khơl dro jah xung xiaq lơơy, bơơn varơuq rôôk tok kadih tol kahnier xuum tuôq thier vah ku oh ay, taayh Lôôk Phool Hiel đơu apôôy, 21dayh jư xăk đom xuum xung xiaq ku Kơy Plêêk, tuôôy takôô vanong angơuq ku Lôôk haay, Lôôk Wơơt Dêh Jê-xu, dong truh varơuq riirh đơơy đơơy. 22Pi gah nưq, dayh angơuq khơl leq đong biq biit ravơq. 23Măn khơl adro hơq, dayh waak wơơt, duuy oot vlôh klơlh ôôlh, ji đôôyq dii khơl adro kadrơy, dayh angơuq kung dii varơuq varaal yôq, pheq đnooy 'yarơ ka'lăk poop aau heq biq 'moh 'mơy xing xăk xamơk.

24Apôôy Kơy e taay yaak jư 'yo oh ay klơlh xatôôlh gưlh ji khienq oh ay dưk kajưk đom varơuq hlah hlaak măn kangưưr tađnah tađnaak leh e hlêêl tachoot ku Kadraq, 25apôôy tađnah tađnaak, jah vado, paraat kalh, ji taay yaak thuôk xuq Kơy Plêêk vơ muuyq, Wơơt Lôôk ku haay, gamưh Lôôk Wơơt Dêh Jê-xu, Lôôk haay, xing tôôy đơơy adroyq, juneq ji dong truh tuôôt đơơy đơơy. Amen!