Skip to content
BibleKenya

Cua Bible Literal Text

Jăng 6

Atêq kaluh varơuq nưq, Lôôk Jê-xu dưk hooy hlê gah pi hơq ku daak tahli Ga-li-lê (laa dêh Ti-bê-ri-at). Muuyq bing manih thier karôp hooy tyauq Kadraq, vii oot hmưq 'yo hloq kaluh pheep akêh đơu Kadraq dưk dơơp tol khơl adro jiq jiêh. Tuôôy nưq, Lôôk Jê-xu hooy tok tol đoot, ji aduq nưq Kadraq 'ngôôy pôôt kung dii khơl xatyauq ku Kadraq. (Tuôôy nưq, Lêh Dalơh Hlê, tuôôy lêh ku manih Jo Thaiq, heq jeq truh.) Atêq nưq, tuôôy 'ngơơk mot tok ji hloq đaneq manih karôp thier karôp đong garuk truh kung Kadraq, Lôôk Jê-xu đnooy dii Phi-lip: “Haay hnoq ik root tôôp aduq leq xôq khơl adro neq xa?” (Bơh Kadraq vôôch anưq xôq thưh kơy, vii Kadraq heq xet varơuq Kadraq xung dơơp.) Phi-lip tơơl hlê Kadraq: “Vaarq hreek đơ-ni-ê tôôp kung be đu ka oot xôq tôôy dro hnoq ik nhonq muuyq axit.” Anh-rê, muuyq đom khơl xatyauq Kadraq, ma oh kanau ku Si-môn Phi-e-rơ, tơơl dii Kadraq: “Măn đnen e muuyq ôn de đơu ôn nưq e dăp poop tôôp va away ji vaarq poop kaa, bơh kaluh tuôông neq e đol kajoq taso dii sôôq manih thier karôp?” Lôôk Jê-xu đnooy: “Dayh 'yo dăt manih karôp 'ngôôy pôôt.” (Tuôôy nưq e 'ngưng rek măn aduq nưq.) Anưq, khơl kanau 'ngôôy pôôt, sôôq kơh dăp ravơu. Xatyauq nưq, Lôôk Jê-xu adrơk kaluh poop tôôp ji atêq tuôôy tưp apok kuh kway, Kadraq ahlook ka khơl adro đong 'ngôôy xa, ji kung dơơp đanưq dii kaa, kơyq trôôch taleq kung ik. Yôôch tuôôy manih karôp heq phiq phơh, Kadraq dăt khơl xatyauq kadraq: “Dayh tôôch anguk kaluh tapleh măn rah, xôq leh e thưq kajoq biq ka'lăk alay.” Anưq oot tôôch anguk ji xôq viik kưl vaarq vuk atar tôôp tapleh măn raah hlê xing dăp poop tôôp va away đơu manih karôp heq xa. Kơq nưq, khơl manih jah hloq pheep akêh Kadraq heq dơơp, đnooy đaneq: “Neq jơq laa Kơy hlit pheq truh đom dêh araak.” Anưq, vii 'yo xet đaneq oot xung truh ji băt ahnen kadraq xôq vanê tok dơơp vuua, lunưq Lôôk Jê-xu laay wiit tok ma đoot muuyq dro.

Tuôôy nưq, tuôôy plêêk rayôôp klôôy, khơl xatyauq Kadraq hooy aloh vlôh pi daak tahli, yôôch tuôôy heq tawaak muut ge, oot hooy tapa hlê pi hơq tahli xôq truh Ka-bê-na-um, ji plêêk heq vlôh kamơng jaluk yôôch, đơu Lôôk Jê-xu kung koq truh dii oot. Vii muuyq đơơt khiel kalh klôôp hlê, lunưq daak tahli kapuh ranaq. Tuôôy heq awaayh jah đom kơh vaarq kưl dăp long pe kưl êch-ta-đơ, khơl xatyauq hloq Lôôk Jê-xu hooy jôôk tol raak daak ji truh jeq ge, anưq oot biq varaal hwaal. Bơh Kadraq đnooy dii oot: “Laa thơy neq! Te yôq.” Lunưq, oot xung taayh Kadraq tok ge, hloay juneq ge ngưh muut ka gah, aduq oot đong hooy truh.

Hngơy atêq, manih karôp 'miêh đong măn ka gah tahli piik nưq hloq đaneq đêh vlôh muuyq poop ge yôôych be e ge leq kadrơy măn đnư, ji hloq đaneq Lôôk Jê-xu heq leh muut đom ge dii khơl xatyauq Kadraq, đơu vơ e khơl xatyauq Kadraq chuh hooy. Lunư, kaluh ge kadrơy heq truh xing Ti-bê-ri-at jeq aduq đơu oot heq xa tôôp atêq tuôôy Lôôk heq kuh kway. Anưq, tuôôy manih karôp hloq đaneq Lôôk Jê-xu leh măn đnư, khơl xatyauq kadraq kung leh, yôôych oot tawaak muut ge ji hooy truh Ka-bê-na-um axek Lôôk Jê-xu. Atêq tuôôy axek hloq Kadraq pi gah hơq tahli, oot vôôch Kadraq: “Ra-bi, Thơy truh đnen dong leq?” Lôôk Jê-xu tơơl hlê oot ji Kadraq đnooy: “Dong dik, dong dik, gô đnooy dii oh ay, oh ay axek gô leh aalq vii oh ay heq jah hloq kaluh varơuq akêh, bơh vii oh ay heq xa tôôp ji jah phiq phơh. Te dơơp varơuq vii tuôông xa klêq va ih, bơh vii tuôông xa măn hlê truh varơuq riirh đơơy đơơy đơu Koot Manih hnoq kahniq ka oh ay, vii Kơy Plêêk, laa Vaq, heq đongq dơuq tol Kadraq.” Yôôch anưq oot đnooy dii Kadraq: “'wot duh dơơp varơuq kajoq xôq 'wot hnoq ik dưk dơơp varơuq dơơp ku Kơy Plêêk?” Lôôk Jê-xu tơơl hlê ji Kadraq dăt oot: “Neq laa varơuq dơơp ku Kơy Plêêk, nưq laa oh ay xôq xuum tuôq gamưh aduq Kơy đơu Kadraq heq patăk truh.” Anưq, oot đnooy dii Kadraq: “Anưq yôôych thơy dơơp pheep akêh leq xôq 'wot hloq ji tuôq thơy? Thơy hnoq dơơp varơuq kajoq? Mo kơy ku 'wot xa ma na đom wăngq we, đaji e valơk đaneq: ‘Kadraq kahniq ka oot tôôp xing plêêk xôq xa.’” Yôôch Lôôk Jê-xu tơơl hlê oot: “Dong dik, dong dik, gô đnooy dii oh ay, Môi-se leh hmưq kahniq ka oh ay tôôp xing plêêk, bơh Vaq gô kahniq ka oh ay tôôp dik xing plêêk. Vii tôôp ku Kơy Plêêk laa tôôp xing plêêk pôôt ji kahniq varơuq riirh ka dêh araak.” Lunưq, oot đnooy dii Kadraq: “Thơy lơơy, apôôy kahniq ka 'wot tôôp nưq hloay hloay.” Lôôk Jê-xu đnooy dii oot: “Gô laa tôôp ku varơuq riirh. Kơyq truh dii gô kajưk dik hnoq leh pangoot, ji kơyq tuôq gamưh aduq gô kajưk dik hnoq be thaal dong leq. Bơh gô heq đnooy oh ay đaneq oh ay heq hloq gô đơu oh ay be tuôq. Dêq hloay khơl leq đơu Vaq kahniq ka gô hnoq truh kung gô, ji adro truh dii gô, yôôych gô kajưk dik hnoq leh ka'lăk pi gôk. Vii gô xing plêêk pôôt leh aalq xôq gô dơơp tyauq iq ku gô, bơh tyauq iq ku Kơy patăk dăt gô. Bơh neq laa iq trôôch ku Kơy patăk dăt gô, nưq laa gô leh xôq hlơơp muuyq dro leq đom dêq hloay khơl adro đơu Vaq heq kahniq ka gô, bơh gô hnoq khienq adro nưq riirh hlê muut ka hngơy lôôch dik. Vii neq laa iq trôôch ku Vaq gô, đaneq paq kê kơyq hloq Koot ji tuôq muut Koot laa e jah varơuq riirh đơơy đơơy, măn gô hnoq khienq dro nưq riirh hlê muut ka hngơy lôôch dik.”

Yôôch anưq, manih Jo Thaiq ramooy truh Kadraq vii Kadraq đnooy: “Gô laa tôôp pôôt xing plêêk.” Oot đnooy: “Be aalq neq laa Jê-xu, koot kanau ku Jô-sep đơu haay xet hlolh vaq ji miq ku kơy nưq ih? Anưq aleq juneq kơy nưq đnooy đaneq: ‘Gô pôôt xing plêêk’?” Lôôk Jê-xu tơơl hlê ji dăt oot: “Dayh paq ramooy dii mamuuyq đnoyq. Be kơyq hnoq ik truh kung gô atoh Vaq, Kơy patăk dăt gô, leh taway adro nưq truh, măn gô hnoq khienq adro nưq riirh hlê muut ka hngơy lôôch dik. Nưq laa varơuq jah valơk đom kaluh rahlăp hlit: ‘Yôôch dêq hloay hnoq jah Kơy Plêêk pato dayq.’ Paq kê dro leq heq tameng ji heq hok aduq Vaq yôôych truh kung gô. Vii leh muuyq dro leq hmưq hloq Vaq, đêh vlôh Kơy măn đom varơuq e mot ku Kơy Plêêk — Kadraq heq hloq Vaq. Dong dik, dong dik, gô đnooy dii oh ay, dro leq tuôq yôôch jah varơuq riirh đơơy đơơy. Gô laa tôôp ku varơuq riirh. Mo Kơy ku oh ay heq xa ma-na đom wăngq we, yôôch oot kaxêêt. Neq laa tôôp xing plêêk pôôt, xôq ka xing aduq tôôp nưq, kơyq xa yôôch leh kaxêêt. Gô laa tôôp riirh xing plêêk pôôt. Atoh dro leq xa tôôp neq, dro nưq hnoq riirh dong truh đơơy đơơy. Mot kadrơy, hlek gô kung jơq laa tôôp đơu gô hnoq kahniq ăm vii varơuq riirh ku dêh araak.”

Anưq laa manih Jo Thaiq takaay tayaat dii mamuuyq, đaneq: “Dơơp aleq dro neq hnoq ik ăm haay xa hlek ku kơy nưq?” Lunưq, Lôôk Jê-xu đnooy dii oot: “Dong dik, dong dik, gô đnooy dii oh ay, atoh oh ay leh xa hlek Koot Manih ji hôôch vahaap ku Kadraq, yôôych oh ay hnoq leh e varơuq riirh đom oh ay. Adro leq xa hlek gô ji hôôch vahaap gô yôôych e varơuq riirh đơơy đơơy, măn gô hnoq khienq adro nưq riirh hlê muut ka hngơy lôôch dik. Vii hlek gô laa tuôông xa dik, ji vahaap gô laa tuôông hôôch dik. Kơyq xa hlek gô ji hôôch vahaap gô yôôych kưq măn đom gô, ji gô kung măn đom dro nưq. Đaji Vaq hloay riirh heq patăk dăt gô, măn gô riirh gamưh Vaq luleq, yôôych adro xa hlek gô kung hnoq riirh gamưh gô lunưq. Neq laa tôôp xing plêêk pôôt, leh aalq đaji tôôp khơl mo kơy heq xa yôôch kaxêêt. Adro leq xa tôôp neq hnoq riirh dong truh đơơy đơơy.” Kadraq đnooy kaluh apok nưq đom hnhư tagumq tuôôy pato dayq aduq Ka-bê-na-um.

Yôôch anưq, tuôôy 'ngưng dro đom sôôq khơl xatyauq ku Kadraq tameng đanưq, oot đnooy: “Apok neq thier laa pơơl, kơyq đơu hnoq ik tameng ik ni?” Bơh vii Lôôk Jê-xu kadih xet đaneq khơl xatyauq kadraq đong ramooy truh varơuq nưq, Kadraq đnooy dii oot: “Apok nưq katơơk galơh oh ay ih? Anưq atoh oh ay hloq Koot Manih tok aduq Kadraq măn adroyq neq yôôych aleq? Kơy Phool Hiel laa Kơy dơơp ăm riirh; xăk xamơk be e ich kajoq dêq. Kaluh apok đơu thơy heq đnooy dii oh ay laa kơy phool hiel ji oot laa varơuq riirh. Anưq bơh đom sôôq oh ay e toleq dro be tuôq.” Vii Lôôk Jê-xu heq xet adroyq yôôch kơyq laa adro leh tuôq, ji kơyq laa adro hnoq tachơơl hlê Kadraq. Ji Kadraq đnooy: “Bơy kơq nưq, thơy heq đnooy dii oh ay đaneq leh muuyq dro leq hnoq ik truh dii thơy atoh vanong leh jah Vaq kahniq ka dro nưq.”

Xing tuôôy nưq, 'ngưng dro đom sôôq khơl xatyauq Kadraq wih katoor wiit xuq ji paq măn hooy kung dii Kadraq đnoyq. Kơq nưq, Lôôk Jê-xu đnooy dii kưl vaarq dro jah rơơlh: “Dang aleq oh ay kung xung vlôh hooy?” Si-môn Phi-e-rơ tơơl hlê Kadraq: “Lôôk lơơy, 'wot hnoq hooy tyauq kơyq? Kadraq e kaluh apok ku varơuq riirh đơơy đơơy, 'wot tuôq ji 'yo xet đaneq Kadraq laa Kơy Vah ku Kơy Plêêk.” Lôôk Jê-xu tơơl hlê oot: “Be aalq Thơy heq rơơlh oh ay, laa kưl vaarq dro jah rơơlh, đơu muuyq dro đom oh ay laa kamuuych.” Kadraq đnooy truh Ju-đa koot kanau ku Si-môn Ich-ka-ri-ôt, vii jơq ni, muuyq đom kưl vaarq dro, hnoq xalih xuum Kadraq.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.