Jăng 18

1Atêq tuôôy đnooy yôôch kaluh apok nưq, Lôôk Jê-xu hooy vlôh dii khơl xatyauq kadraq hlê piik hơq alook daak Kêt-rôn, đơu aduq neq e muuyq hluôôt, Kadraq kung khơl xatyauq kadraq hooy muut đom nưq. 2Juneq, Ju-đa, dro xôq vih tachơơl Kadraq, kung xet aduq neq, vii Lôôk Jê-xu ragơy tagumq hlê aduq neq dii khơl xatyauq kadraq. 3Vii anưq, Ju-đa truh aduq nưq, jarooy tyauq muuyq bing kuun kung bing kuun jư 'yo xing aduq khơl thơy tơơk tưp kôt ji xing khơl manih Pha-ri-si, taway tyauq đeen, đuôôk ji valong xieh. 4Tuôôy nưq, vii Lôôk Jê-xu xet tôôy varơuq đong xalih truh ka kadraq, lunưq tuôôy tawaak vlôh, Kadraq vôôch oot: “Êêp kơy axek kơyq?” 5Oot tơơl hlê Kadraq: “Jê-xu, manih Na-xa-ret.” Kadraq đnooy dii oot: “Jơq laa gô.” (Tuôôy nưq, Ju-đa, adro tachơơl Kadraq kung đong dưk kung bing oot.) 6Yôôch anưq, tuôôy Kadraq heq đnooy dii oot: “Jơq laa gô,” yôôch oot xaluuy xuq pi atêq ji gưlh pôôt vari. 7Atêq nưq, Kadraq laay vôôch oot: “Êêp kơy axek kơyq?” Yôôch oot đnooy: “Jê-xu, manih Na-xa-ret.” 8Lôôk Jê-xu tơơl: “Gô heq đnooy dii êêp kơy đaneq jơq laa gô. Lunưq, atoh êêp kơy đong axek gô yôôych dayh ăm khơl adro neq hooy.” 9(Nưq laa xôq jah jêêk apok đơu Kadraq heq đnooy đaneq: “Truh khơl adro Vaq heq pahnăp ka Koot, Koot leh dơơp hlơơp muuyq dro leq đom sôôq oot.”) 10Tuôôy nưq, tuôôy đong e muuyq poop xieh, Si-môn Phi-e-rơ hruut ni vlôh yôôch kathôp dơơp adro xapok ku thơy tơơk tưp kôt ji triet kloh tôôr akoh ku dro neq. Anơng dro xapok laa Man-chu. 11Yôôch anưq Lôôk Jê-xu dăt Phi-e-rơ: “Dayh viet xieh muut đom kadôh! Dooy đơu Vaq heq kahniq ka thơy, thơy hnoq ik leh duh hôôch ni ih?”

12Atêq nưq, bing kuun ji adro dưk jarooy kung bing kuun jư 'yo ku manih Jo Thaiq rôp jư Lôôk Jê-xu ji vek Kadraq hlê. 13Adroyq dik, oot jarooy Kadraq truh An-ne, vii kơy nưq laa Vaq kadrê ku Kai-phe, đơu Kai-phe laa thơy tơơk tưp kôt đom xanưm nưq. 14(Mot kadrơy, Kai-phe laa manih heq ahluk manih Jo Thaiq đaneq dik laa tolh iaq tuôôy muuyq dro kaxêêt thay ka dêq hloay tamooy.)

15Tuôôy nưq, Si-môn Phi-e-rơ ji muuyq khơl xatyauq kadrơy hooy tyauq Lôôk Jê-xu. Bơh khơl xatyauq nưq 'miêh e qween xet dii thơy tơơk tưp kôt, anưq dro nưq hooy dii Lôôk Jê-xu muut đom chaal hnhư ku thơy tơơk tưp kôt. 16Măn Phi-e-rơ măn dưk ka aduq 'mok pi gôk, lunưq khơl xatyauq hơq, laa adro e qween xet dii thơy tơơk tưp kôt, hooy vlôh đnooy dii mư jư 'mok, yôôch jarooy Phi-e-rơ muut. 17Atêq nưq, mư xapok, laa manih jư 'mok, đnooy dii Phi-e-rơ: “Be aalq kơy kung măn đom sôôq khơl xatyauq ku manih neq ih?” Kơy tơơl: “Leh aalq gô.” 18Tuôôy nưq, khơl xapok ji bing kuun jư 'yo đong dưk đnư, atuut muuyq đum ôôlh kheng vii plêêk jaleek, ji oot đong kadih kajôôl xatôq. Phi-e-rơ kung măn kung oot, dưk đnư ji kadih kajôôl xatôq.

19Tuôôy nưq, thơy tơơk tưp kôt vôôch Lôôk Jê-xu truh khơl xatyauq Kadraq ji truh varơuq pato dayq ku Kadraq. 20Lôôk Jê-xu tơơl hlê kơy nưq: “Gô heq đnooy trôôk ăm xet ka tôôy dro. Gô hloay pato dayq đom hnhư anguk ji đom hnhư hơu, laa aduq tôôy dro manih Jo Thaiq anguk tagumq kung mamuuyq, ji gô be đnooy kajoq padu kadook dêq. 21Aleq kơy vôôch gô? Dayh vôôch khơl adro heq tameng apok đơu gô heq đnooy dii oot. 'Yo hơq, khơl adro nưq xet gô heq đnooy varơuq kajoq.” 22Tuôôy Lôôk Jê-xu đnooy đanưq, yôôych muuyq dro đom bing kuun jư 'yo đong dưk đnư ăm Lôôk Jê-xu muuyq pađa, đnooy đaneq: “Kơy tơơl apok thơy tơơk tưp kôt lunưq ih?” 23Lôôk Jê-xu tơơl apok ni: “Atoh gô đnooy leh troq, dayh pato vlôh aduq leh troq nưq. Măn atoh laa troq, nưq aleq ay đnayh gô?” 24Yôôch tuôôy đong măn biq vek, An-ne ăm jarooy Kadraq hooy truh thơy tơơk tưp kôt Kai-phe.

25Tuôôy nưq, Si-môn Phi-e-rơ đong măn dưk ji kadih kajôôl. Yôôch anưq, khơl drơy đnooy dii kơy: “Leh aalq kơy kung măn đom sôôq khơl xatyauq ku dro nưq ih?” Kơy leh nhonq ji tơơl: “Leh aalq gô.” 26Muuyq dro đom sôôq khơl xapok ku thơy tơơk tưp kôt laa takuul takiel dii manih đơu Phi-e-rơ heq triet kloh tôôr, đnooy: “Be aalq gô heq hloq kơy măn đom hluôôt kung dro nưq ih?” 27Anưq laa Phi-e-rơ leh nhonq yưk tra đnoyq yôôch vơ hloay jơnưq ier rok.

28Atêq nưq, oot jarooy Lôôk Jê-xu xing aduq Kai-phe truh hnhư padrok. (Tuôôy nưq, đong măn xaroq meel, oot leh hooy muut đom hnhư padrok xôq oot leh huq biq klơơr 'yêq, đơu gamưh anưq oot hnoq ik xa Lêh Dalơh Hlê.) 29Lunưq, Phi-lat heq hooy vlôh tavơh oot ji đnooy: “Êêp kơy taway tyauq apok rôp xadrah kajoq tachơơl hlê adro neq?” 30Oot tơơl hlê ji đnooy dii kơy: “Atoh dro neq leh e dơơp varơuq xơk aak, yôôych 'wot heq be rôp atăq ni ka padrok.” 31Vii anưq, Phi-lat đnooy dii oot: “Êêp kơy dayh jarooy manih neq xuq yôôch xưh ni tyauq ganuun ku êêp kơy.” Manih Jo Thaiq đnooy dii kơy nưq: “Be e pheep ka 'wot xưh kaxêêt ka adro leq dêq.” 32(Nưq laa xôq jah jêêk apok Lôôk Jê-xu, đơu Kadraq heq đnooy xôq pato truh trôôk kaxêêt đaleq Kadraq xarôp pheq chiuq.)

33Anưq laa Phi-lat laay hooy muut đom hnhư padrok, ji dăt taayh Lôôk Jê-xu truh yôôch kơy nưq đnooy dii Kadraq: “Ay e jơq laa Vuua manih Jo Thaiq?” 34Lôôk Jê-xu tơơl hlê: “Kơy kadih kơy đnooy varơuq neq long dro leq heq đnooy ka kơy truh gô?” 35Phi-lat tơơl apok: “Gô lưp aalq laa manih Jo Thaiq 'leq? Kadih manih dêh ku ay ji khơl thơy tơơk tưp kôt rôp atăq ay ka gô. Ay heq dơơp varơuq kajoq?” 36Lôôk Jê-xu tơơl hlê: “Daak dêh ku gô leh thuôk ku dêh araak neq. Atoh daak dêh ku gô thuôk ku dêh araak neq, yôôych heq đol khơl xapok ku gô heq tahmơt xôq gô leh biq rôp atăq ka manih Jo Thaiq. Bơh juneq daak dêh ku gô be măn aduq neq.” 37Yôôch anưq Phi-lat đnooy dii Kadraq: “Anưq e jơq ay laa vuua?” Lôôk Jê-xu tơơl: “Kơy đnooy đaneq gô laa vuua. Gô heq jah pa iir vlôh vii varơuq neq, ji gô heq truh đom dêh araak kung vii varơuq nưq, nưq laa xôq dơơp xanưk ka varơuq dik, Dro leq thuôk xuq varơuq dik yôôych tameng apok ku gô.” 38Phi-lat đnooy dii Kadraq: “Varơuq dik laa kajoq?” Đnooy yôôch apok nưq, kơy nưq laay hooy vlôh tavơh manih Jo Thaiq ji đnooy dii oot: “Gô be axek hloq kadrôôp maroh kajoq aduq dro neq. 39Lunư, tyauq ganuun ku êêp kơy yôôych gô luh vlôh ka êêp kơy muuyq dro muut katuôôy Lêh Dalơh Hlê. Anưq, êêp kơy trôôch gô luh vlôh Vuua ku manih Jo Thaiq ka êêp kơy be?” 40Yôôch anưq oot laay pariau tok, đaneq: “Leh aalq dro neq, đơu laa Ba-ra-ba.” Tuôôy nưq, Ba-ra-ba laa muuyq dro atôk.