Jăng 16:33

1“Thơy heq đnooy kaluh varơuq nưq ka oh ay, xôq oh ay leh huq xatôôlh gưlh. 2Oot hnoq khienq ka oh ay biq pađuôôy klơlh hnhư tagumq. Lunưq đơu kawat jeq truh laa deng ka tôôy dro păk kaxêêt oh ay biit đaneq oot đong tưp kuah lêh ayuôôt laat tok Kơy Plêêk. 3Oot hnoq dơơp kaluh varơuq nưq vii oot leh xet Vaq, kung leh xet thơy. 4Long anưq, thơy heq đnooy kaluh varơuq neq ka oh ay xôq tuôôy kawat ku bơy oot truh, oh ay văch hlê kaluh apok đơu thơy heq xanoh ka oh ay. Mot kadrơy, thơy leh đnooy kaluh varơuq neq ka oh ay xing tuôôy patep vii thơy 'miêh đong măn dii oh ay. 5Măn juneq thơy hooy truh Kơy patăk dăt thơy, ji be kơyq đom oh ay vôôch thơy: ‘Thơy đong hooy maleq?’ 6Wiit hlê, varơuq hlu rơu heq galôp viik xuum klaak ku oh ay vii thơy heq đnooy dii oh ay kaluh varơuq neq. 7Lunư, thơy đnooy varơuq dik dii oh ay, thơy vlôh hooy nưq laa varơuq taway ich lơơy ka oh ay. Vii atoh thơy leh vlôh hooy, yôôych Kơy Hơq Hlôôp hnoq leh truh dii oh ay. Măn atoh thơy hooy, yôôych thơy hnoq patăk dăt Kơy nưq truh kung oh ay. 8Tuôôy heq truh, Kơy nưq hnoq kahnoq vlôh dêh araak truh kadrôôp maroh, truh varơuq hyioh jăk, ji truh varơuq xưh xadrah — 9truh kadrôôp maroh, laa vii oot leh tuôq aduq thơy; 10truh varơuq hyioh jăk, laa vii thơy truh dii Vaq, lunưq oh ay hnoq paq măn hloq thơy đnoyq; 11măn truh varơuq xưh xadrah, laa vii adro dưk xanok dêh araak neq heq biq xưh xadrah. 12Thơy e 'ngưng varơuq iaq xôq đnooy dii oh ay, bơh juneq oh ay koq lưp ik tameng hlolh ik. 13Bơh tuôôy Kơy nưq, laa Yaak Varơuq Dik truh, Kadraq hnoq jarooy oh ay muut đom tôôy varơuq dik, vii Kadraq hnoq leh kadih kadraq đnooy vlôh, đơu Kadraq hnoq đnooy paq kê varơuq kajoq Kadraq tameng, ji Kadraq hnoq đnooy pahêêr ka oh ay kaluh varơuq đong xalih truh. 14Kơy nưq hnoq vanê ayuôôt thơy, vii Kadraq hnoq nhonq xok kaluh varơuq xing aduq thơy yôôch hnoq kahnoq vlôh ka oh ay. 15Tôôy varơuq, paq kê kaluh kajoq Vaq e, laa thuôk ku thơy. Vii anưq, thơy đnooy đaneq, Kơy nưq hnoq nhonq xok kaluh varơuq ku thơy ji kahnoq ka oh ay. 16Măn leh xiik đnoyq, oh ay leh măn hloq thơy, yôôch laay atêq leh xiik, oh ay hnoq hloq thơy.” 17Atêq nưq, toleq dro đom sôôq khơl xatyauq Kadraq đnooy dii mamuuyq: “Varơuq neq laa đaleq tuôôy thơy đnooy dii haay đaneq: ‘Đom leh xiik đnoyq, oh ay leh hloq thơy, yôôch laay atêq leh xiik, oh ay hnoq hloq thơy’ ji: ‘Vii thơy truh dii Vaq’?” 18Kơq nưq, oot đnooy: “‘Leh xiik’ iq laa aleq? Haay be xet thơy đong đnooy kajoq.” 19Lôôk Jê-xu xet đaneq oot xung vôôch Kadraq, anưq Kadraq đnooy dii oot: “E jơq oh ay đong kadih oh ay axek akhiim truh apok đơu thơy heq đnooy: ‘Đom leh xiik đnoyq, oh ay leh hloq thơy, yôôch laay atêq leh xiik, oh ay hnoq hloq thơy’? 20Dong dik, dong dik, thơy đnooy dii oh ay đaneq oh ay hnoq nhim ook, alo, măn dêh araak hnoq hlah hlaak. Oh ay hnoq hlu rơu, bơh varơuq hlu rơu ku oh ay hnoq vlôh jêêk varơuq hlah hlaak. 21Tuôôy khơl drê pa iir yôôych e đơơt jiq jiêh vii wat ni heq truh, bơh tuôôy heq pa iir ik oh de, mư paq măn văch truh đơơt pơơl jiq ku ni đnoyq vii kơq xuum hlah hlaak vii muuyq dro heq jah pa iir vlôh đom dêh araak. 22Kung đanưq, juneq oh ay e varơuq hlu rơu, bơh thơy hnoq tavơh hlê oh ay, yôôch xuum oh ay hnoq jah hlah hlaak, ji leh kơyq taway hooy ik xuum hlah hlaak ku oh ay klơlh oh ay. 23Muut hngơy nưq oh ay hnoq leh vôôch thơy varơuq kajoq. Dong dik, dong dik, thơy đnooy dii oh ay, paq kê varơuq kajoq oh ay apôôy vôôch Vaq taayh yal thơy, Kadraq hnoq kahniq ka oh ay. 24Dong truh juneq, oh ay koq lưp apôôy vôôch varơuq kajoq taayh yal thơy. Dayh apôôy vôôch yơu, yôôych oh ay hnoq nhonq jah, xôq hlah hlaak ku oh ay jah xaleep.

25Thơy heq đnooy kaluh varơuq neq dii oh ay bơơn kaluh apok atoh; tuôôy kawat truh, thơy hnoq paq măn đnooy dii oh ay bơơn kaluh apok atoh đnoyq, tađôôy muut đnư, thơy hnoq kahnoq ka oh ay kach xet hlolh truh Vaq. 26Đom hngơy nưq, oh ay hnoq apôôy vôôch taayh yal thơy, ji thơy leh đnooy dii oh ay đaneq thơy hnoq apôôy vôôch Vaq thay ka oh ay, 27vii jơq Vaq xung xiaq oh ay, vii oh ay xung xiaq thơy ji tuôq đaneq thơy heq truh xing Vaq. 28Thơy heq truh xing Vaq ji heq muut đom dêh araak. Yôôch thơy laay hooy klơlh dêh araak ji hooy truh kung Vaq.” 29Khơl xatyauq ku Kadraq tơơl: “'Yo hơq, juneq thơy đong đnooy ăm xet hlolh, đơu leh đnooy bơơn apok atoh. 30Juneq, 'wot xet đaneq thơy hlolh xet tôôy varơuq, ji be duh pheq e kơyq vôôch thơy. Vii nưq, 'wot tuôq đaneq thơy heq truh xing Kơy Plêêk.” 31Lôôk Jê-xu tơơl hlê oot: “Juneq oh ay e tuôq be? 32Dayh 'yo, wat đong truh — ji heq truh — yôôych oh ay biq pachaay hyaak, tôôy dro tyauq trôôk đêh raa ni, măn thơy yôôych oh ay ka'lăk hlê muuyq dro. Long anưq, thơy be hmưq biq muuyq dro, vii Vaq măn kung thơy. 33Thơy heq đnooy kaluh varơuq neq ka oh ay xôq ka oh ay e varơuq hrok hrol aduq thơy. Oh ay tavơh pơơl dal đom dêh araak, bơh dayh kajưk xuum, thơy heq jay dêh araak yôôch.”