Jăng 13:34

1Tuôôy nưq, adroyq Lêh Dalơh Hlê, Lôôk Jê-xu xet đaneq wat ku Kadraq heq truh, xôq ka Kadraq hooy klơlh dêh araak neq xuq dii Vaq. Tuôôy heq xiaq khơl adro thuôk ku kadraq đom dêh araak, yôôych Kadraq xiaq oot dong truh lôôch đơơy. 2Đong waal xa klôôy, atêq tuôôy kamuuych heq xôq muut xuum Ju-đa Ich-ka-ri-ôt, koot kanau ku Si-môn, xôq ni xalih xuum hlê Kadraq, 3vii xet đaneq Vaq heq pahnăp muut ti Kadraq tôôy varơuq, ji xet đaneq Kadraq truh xing Kơy Plêêk ji jeq wiit xuq dii Kơy Plêêk, 4lunưq Kadraq dưk tok klơlh waal xa, leh aau gôk. Ji atêq tuôôy xok khanh, Kadraq gwonq rawiit xăk kadraq. 5Atêq nưq, Kadraq uk daak muut xalaau ji xarôp 'nhaau jôôk khơl xatyauq, ji 'nhuôôt kateh bơơn khanh đơu ni heq jah gwonq rawiit xăk. 6Yôôch anưq, Kadraq truh aduq Si-môn Phi-e-rơ. Kơy đnooy dii Kadraq: “Kuh Lôôk, Kadraq 'nhaau jôôk ku gô ih?” 7Lôôk Jê-xu tơơl hlê ji đnooy dii kơy: “Varơuq thơy đong dơơp, juneq ay koq hlolh, bơh atêq kaluh varơuq neq, ay hnoq hlolh.” 8Phi-e-rơ tơơl dii Kadraq: “Kajưk dik leh e 'leq thơy 'nhaau jôôk ku gô.” Lôôk Jê-xu tơơl hlê kơy: “Atoh thơy leh 'nhaau ka ay, yôôych ay be e phon kajoq dii thơy.” 9Si-môn Phi-e-rơ đnooy dii Kadraq: “Kuh Lôôk, leh vơ jôôk gô heq, đơu măn ka ti ji akoq gô đnoyq.” 10Lôôk Jê-xu đnooy dii kơy: “Dro leq heq jah hôôp yôôch yôôych leh e duh đanưq, đêh vlôh 'nhaau jôôk, măn dro nưq jah xarơyh xaleep, ji oh ay yôôych jah xarơyh bơh leh aalq dêq hloay oh ay.” 11(Vii Kadraq xet kơyq xalih xuum hlê Kadraq, kơq anưq Kadraq đnooy đaneq: “Leh aalq dêq hloay raay jah xarơyh.”)

12Anưq, tuôôy Kadraq heq 'nhaau jôôk oot yôôch ji hlưp aau gôk ku kadraq muut, yôôych Kadraq 'ngôôy pôôt hlê, đnooy dii oot: “Oh ay e xet thơy đơơu dơơp kajoq ka oh ay be? 13Oh ay taayh Thơy laa ‘Thơy’, ji laa ‘Lôôk’: oh ay đnooy jơq dik vii thơy dik laa đanưq. 14Lunưq, atoh thơy, laa Lôôk, ji laa Thơy, heq 'nhaau jôôk ku oh ay, yôôch oh ay kung pheq 'nhaau jôôk ku mamuuyq. 15Vii Thơy heq dơơp ramil ka oh ay xôq oh ay kung dơơp dang đaji thơy heq dơơp ka oh ay. 16Dong dik, dong dik, thơy đnooy dii oh ay, xapok yôôych leh kôt iaq kôôch ni; adro jah patăk kung leh kôt iaq adro patăk dăt ni. 17Atoh oh ay heq xet kaluh varơuq neq, yôôych oh ay jah vanong atoh oh ay dưk dơơp kaluh varơuq nưq. 18Thơy leh đong đnooy truh dêq hloay oh ay; thơy xet adro đơu thơy heq rơơlh — bơh xôq apok Rahlăp Vah jah jêêk: ‘Adro xa tôôp kung dii gô tơơk jôôk ni tachơơl hlê gô.’ 19Xing juneq, thơy đnooy ka oh ay adroyq tuôôy varơuq xalih vlôh, xôq tuôôy ni xalih vlôh, oh ay hnoq ik tuôq đaneq thơy Hloay E. 20Dong dik, dong dik, thơy đnooy dii oh ay, kơyq tiip dro leq đơu thơy patăk dăt laa tiip thơy, ji kơyq tiip thơy laa tiip Kơy heq patăk dăt thơy.”

21Atêq tuôôy đnooy yôôch kaluh varơuq nưq, Lôôk Jê-xu hlu rơu đom xuum klaak, yôôch Kadraq 'yo nhonq ji đnooy: “Dong dik, dong dik, thơy đnooy dii oh ay, muuyq dro đom khơl oh ay hnoq xalih xuum hlê thơy.” 22Khơl xatyauq 'yo mamuuyq, leh xet Kadraq đong đnooy truh kơyq. 23Tuôôy nưq, muuyq đom khơl xatyauq Kadraq, adro đơu Lôôk Jê-xu xiaq, đong 'ngôôy pi para xa, ganưq muut tada ku Lôôk Jê-xu. 24Kơq nưq, Si-môn Phi-e-rơ dơơp dơuq ka adro neq vôôch 'yo, “Adro đơu thơy đong đnooy truh laa dro leq?” 25Vii anưq lunưq, atêq tuôôy 'ngiik xăk ka tada Lôôk Jê-xu, dro nưq đnooy dii Kadraq: “Kuh Lôôk, nưq laa kơyq?” 26Lôôk Jê-xu tơơl: “Nưq laa dro đơu atêq katuôôy 'nharuuk kapleh tôôp neq, thơy hnoq xôq ni ji palo ka adro nưq.” Yôôch anưq, 'nharuuk kapleh tôôp nưq yôôch, Kadraq palo ka Ju-đa, koot ku Si-môn Ich-ka-ri-ôt. 27Atêq kapleh tôôp nưq, yôôych tuôôy nưq Sa-tan nhôp muut ni. Lunưq, Lôôk Jê-xu dăt ni: “Varơuq ay đong dơơp, dayh dơơp dayh yơu.” 28(Tuôôy nưq, leh kơyq đong 'ngôôy aduq para xet ik vii aleq Kadraq đnooy dii ni đanưq. 29Vii toleq dro măn biit, vii Ju-đa jư thuuyq jêêt, lunưq Lôôk Jê-xu dăt ni: “Dayh root kaluh thưq kơn duh ka tuôôy lêh,” long xôq ahlook axit kajoq nưq ka adro adrah.) 30Anưq laa, tuôôy heq nhonq kapleh tôôp, ni vơ hloay hooy vlôh. Tuôôy nưq, dêh heq kamơng.

31Anưq, tuôôy ni heq hooy klơlh, Lôôk Jê-xu đnooy: “Juneq, Koot Manih heq jah vanê ayuôôt, ji Kơy Plêêk heq jah vanê ayuôôt aduq Kadraq. 32Yôôch Kơy Plêêk hnoq vanê ayuôôt Koot Manih đom kadih Kadraq, ji Kadraq hnoq vanê ayuôôt Koot Manih hloay jơnưq. 33Êêp koot de lơơy, thơy măn dii oh ay leh xiit đnoyq 'leq. Oh ay hnoq axek thơy, ji đaji thơy heq đnooy dii khơl manih Jo Thaiq đaneq, ‘Aduq gô hooy, êêp kơy leh ik truh ik.’ Juneq, thơy kung đnooy đanưq dii oh ay. 34Thơy kahniq ka oh ay muuyq ganeen đơơu, xôq ka oh ay hnoq ik xung xiaq mamuuyq; đaji thơy heq xung xiaq oh ay, xôq oh ay kung hnoq ik xung xiaq mamuuyq. 35Atoh oh ay e xung xiaq deng ka mamuuyq, yôôych vii nưq, tôôy dro hnoq xet đaneq oh ay laa khơl xatyauq ku thơy.”

36Si-môn Phi-e-rơ đnooy dii Kadraq: “Lôôk lơơy, Kadraq hooy maleq?” Lôôk Jê-xu tơơl hlê kơy: “Aduq Thơy hooy, juneq oh ay koq ik tyauq Thơy ik, bơh atêq neq, oh ay hnoq hooy tyauq.” 37Phi-e-rơ đnooy dii Kadraq: “Kuh Lôôk, vii aleq gô leh ik tyauq Kadraq hloay juneq ik? Gô hnoq chiuq kaxêêt xăk riirh gô vii Kadraq.” 38Lôôk Jê-xu tơơl: “Ay hnoq chiuq kaxêêt xăk riirh ay vii thơy ih? Dong dik, dong dik, thơy đnooy dii ay, kajưk dik ier pôô leh rok dong truh tuôôy ay chôôyq thơy pe yưk.”