Jăng 11

1Tuôôy nưq, e muuyq dro hơq biq bingq, anơng La-xa-rơ dêh Bê-tha-ni, măn palơy ku Ma-ri ji ay ku mư laa Ma-thê. 2Măn Ma-ri laa adro para jơu thơơm ka Lôôk yôôch 'nhuôôt jôôk Kadraq bơơn hlôôk ku mư, đơu ma oh kanau ku mư laa La-xa-rơ 'miêh đong jiq bingq. 3Lunưq, baarq oh ay gamưh adro atăq hêêl truh Kadraq đaneq: “Kuh Lôôk, 'yo hơq, manih đơu Kadraq xung xiaq đong biq bingq.” 4Bơh atêq tuôôy tameng anưq, Lôôk Jê-xu đnooy: “Bingq neq leh pheq truh kaxêêt, lunư, vii tađnah tađnaak ku Kơy Plêêk, xôq Koot Kơy Plêêk jah ayuôôt laat gamưh varơuq nưq.” 5(Lôôk Jê-xu xung xiaq Ma-thê, ma oh kadrê ku mư, ji La-xa-rơ.) 6Kơq nưq, tuôôy Kadraq tameng đaneq La-xa-rơ đong jiq bingq, long anưq tuôôy nưq, Kadraq măn hlê vaarq hngơy ka aduq đơu Kadraq đong măn. 7Atêq nưq, atêq varơuq tahyơq hlê nưq, Kadraq đnooy dii khơl xatyauq: “Haay kơn hooy truh dêh Ju-đê yưk tra.” 8Khơl xatyauq tơơl dii Kadraq: “Ra-bi, juneq manih Jo Thaiq đong axek trôôk tiip phơu thơy, đơu thơy măn hooy xuq đnư yưk tra ih?” 9Lôôk Jê-xu tơơl: “Be aalq e kưl vaarq wat muut ka hngơy ih? Atoh dro leq hooy đom ka hngơy yôôych dro nưq leh xatôôlh gưlh, vii ni 'yo hloq xaraar tađnah ku dêh araak neq. 10Măn atoh dro leq hooy đom ka klôôy, yôôych dro nưq xatôôlh gưlh, vii xaraar tađnah leh măn aduq ni.” 11Kadraq heq đnooy đanưq, yôôch atêq nưq, Kadraq đnooy ka oot: “La-xa-rơ, 'wơyq ku haay, heq vik tawol hlơơp, bơh thơy truh laa xôq hnoq ik nhơk kah ay nưq.” 12Lunưq, khơl xatyauq đnooy dii Kadraq: “Lôôk lơơy, atoh ay nưq heq vik tawol hlơơp, yôôch ay nưq hnoq ik yơh hlê.” 13(Tuôôy nưq, Lôôk Jê-xu 'miêh đnooy truh varơuq kaxêêt ku La-xa-rơ, bơh khơl dro nưq biit đaneq Kadraq đong đnooy truh varơuq padơy vado ku varơuq vik.) 14Lunưq, tuôôy nưq Lôôk Jê-xu đnooy hlolh vlôh ka oot: “La-xa-rơ heq kaxêêt. 15Thơy hlah hlaak vii kơq e ich ku oh ay vii thơy heq leh e mot măn đnư, xôq oh ay hnoq ik tuôq. Long anưq, haay duh truh dii ay nưq.” 16Anưq yôôch, Thô-ma, jah taayh laa Đi-đim, đnooy dii khơl xatyauq kung tyauq Kadraq: “Haay kung duh hooy xôq haay hnoq ik kaxêêt muuyq aduq dii Kadraq.”

17Vii anưq, tuôôy truh aduq, Lôôk Jê-xu 'yo hloq ay nưq heq măn đom xanưng poot hngơy yôôch. 18Tuôôy nưq, Bê-tha-ni măn jeq Jê-ru-sa-lem, kaplah xing nưq kơh kưl dăp êch-ta-đơ. 19'Ngưng dro đom sôôq khơl manih Jo Thaiq heq truh dii Ma-thê ji Ma-ri xôq oot hnoq ik hlơq hlôôp baarq mư truh adro ma oh kanau. 20Anưq yôôch, tuôôy Ma-thê tameng đaneq Lôôk Jê-xu truh, mư hooy đoonq Kadraq, măn Ma-ri 'ngôôy đom hnhư. 21Tuôôy nưq, Ma-thê đnooy dii Lôôk Jê-xu: “Lôôk lơơy, atoh Kadraq 'miêh măn đnen, yôôych heq laa ma oh kanau gô heq leh kaxêêt. 22Lunư, pheq đnooy tuôôy nưq, gô xet đaneq paq kê varơuq kajoq đơu Kadraq vôôch Kơy Plêêk, Kơy Plêêk hnoq kahniq ka Kadraq.” 23Lôôk Jê-xu đnooy dii mư: “Ma oh kanau ku mư hnoq riirh hlê.” 24Ma-thê tơơl dii Kadraq: “Gô xet đaneq oh nưq hnoq riirh hlê đom varơuq riirh hlê muut ka hngơy lôôch dik.” 25Lôôk Jê-xu đnooy dii mư: “Thơy laa varơuq riirh hlê ji varơuq riirh; adro leq tuôq aduq thơy hnoq riirh, long tabơh heq kaxêêt yôôch; 26măn kơyq riirh đơu tuôq aduq thơy yôôych kajưk dik leh hnoq kaxêêt truh đơơy đơơy. Ay e tuôq varơuq neq be?” 27Mư tơơl hlê Kadraq: “Jơq, Lôôk lơơy, gô tuôq đaneq Kadraq laa Lôôk Wơơt Dêh, Koot Kơy Plêêk, laa Kơy pheq truh đom dêh araak.” 28Đnooy đanưq yôôch, mư wiit xuq ji taayh đêh Ma-ri, oh mư, đnooy: “Thơy măn đnen ji đong taayh oh.” 29Tuôôy mư nưq tameng anưq, yôôych mư vơ dưk tok hloay ji truh dii Kadraq. 30Tuôôy nưq, Lôôk Jê-xu koq muut đom palơy bơh măn ja măn ka aduq đơu Ma-thê heq tavơh Kadraq. 31Tuôôy nưq, toleq dro manih Jo Thaiq, laa khơl adro đong măn dii mư đom hnhư ji hlơq hlôôp mư, tuôôy hloq đaneq Ma-ri pơl wol dưk tok ji hooy vlôh pi gôk, yôôych hooy tyauq mư, biit laa mư hooy truh xanưng xôq mư nhim aduq nưq. 32Anưq yôôch, hloay tuôôy Ma-ri truh aduq Lôôk Jê-xu dưk padơy, tuôôy 'yo hloq Kadraq, mư kul pôôt aduq jôôk Kadraq, đnooy dii Kadraq: “Kuh Lôôk, atoh Kadraq 'miêh măn đnen, yôôych heq laa ma oh kanau gô heq leh kaxêêt.” 33Anưq, tuôôy Lôôk Jê-xu hloq mư nhim, ji khơl manih Jo Thaiq hooy muuyq aduq dii mư kung nhim, Kadraq hloq jiq xuum đom phool hiel ji kadih xăk Kadraq arơơk xuum. 34Kadraq vôôch: “Oh ay xôq ay nưq măn ka'leq?” Oot đnooy dii Kadraq: “Kuh Lôôk, apôôy truh ji 'yo.” 35Lôôk Jê-xu nhim. 36Vii anưq, toleq dro Jo Thaiq đnooy: “'Yo hơq, kơy nưq xung xiaq ay nưq xet toleq!” 37Bơh toleq dro đom sôôq oot đnooy: “Kơy neq, laa manih heq luh mot ku adro apul, kung leh ik dơơp kajoq ik xôq ka adro neq klơlh kaxêêt ih?” 38Vii anưq, đom tuôôy laay jiq xuum đom xăk, Lôôk Jê-xu hooy truh xanưng. Tuôôy nưq, nưq laa muuyq kôôp phơu, ji muuyq talaat phơu jah klook đơ kangưưr kôôp. 39Lôôk Jê-xu patăk: “Dayh vlơq phơu hooy.” Ma-thê, ay ku adro heq kaxêêt, đnooy dii Kadraq: “Kuh Lôôk, oh nưq heq tek hlôôl yôôch, vii hngơy neng laa hngơy thưq poot.” 40Lôôk Jê-xu đnooy dii mư: “Be aalq Thơy heq đnooy dii ay đaneq atoh ay tuôq, yôôych ay hnoq hloq tađnah tađnaak ku Kơy Plêêk ih?” 41Lunưq, oot vlơq kuk phơu vlôh. Yôôch Lôôk Jê-xu 'ngơơk mot tol plêêk ji đnooy: “Kuh Vaq, koot kuh kway Vaq vii Vaq heq tameng koot. 42Đơu koot 'miêh heq xet đaneq Vaq hloay hloay tameng, bơh koot đnooy vlôh vii kơq manih karôp đong dưk gah gih neq, xôq oot hnoq ik tuôq đaneq Vaq patăk koot truh.” 43Ji atêq tuôôy đnooy đanưq, Kadraq taayh atok kôt apok: “La-xa-rơ, dayh hooy vlôh pi gôk!” 44Adro heq kaxêêt hooy vlôh, jôôk ji ti măn ja biq gwonq vaayh ko, măn mot ay đong biq gwonq khanh. Lôôk Jê-xu đnooy dii oot: “Dayh tơq vlôh waak ay nưq ji xôq ay nưq hooy.”

45Kơq nưq, 'ngưng dro đom bing manih Jo Thaiq, laa khơl adro heq truh hlơq Ma-ri ji atêq tuôôy jah hloq varơuq Kadraq dơơp, oot heq xôq xuum tuôq aduq Kadraq. 46Bơh toleq dro đom bing oot hooy truh dii bing manih Pha-ri-si ji taboon hlê ka toleq dro neq kaluh varơuq đơu Lôôk Jê-xu heq dơơp.

47Lunưq, khơl thơy tơơk tưp kôt kung manih Pha-ri-si anguk hlê Tayuup Karôp Jo Thaiq ji athêêk tajauq: “Haay pheq dơơp kajoq neq, vii dro neq dơơp 'ngưng dơuq akêh dik? 48Atoh haay kưq xôq anưq kơy nưq đanưq, yôôych tôôy dro hnoq tuôq muut kơy nưq, yôôch manih La-mah hnoq truh ji hmơt xok dêq aduq neq hloay daak dêh ku haay.” 49Lunư, Kai-phe, muuyq dro đom sôôq oot, laa thơy tơơk tưp kôt đom xanưm nưq, đnooy dii oot: “Êêp kơy leh xet kajoq dêq. 50Êêp kơy leh biit truh đaneq nưq laa varơuq tolh iaq ka êêp kơy tuôôy xôq muuyq dro kaxêêt thay ka manih karôp đơu dêq hloay tamooy leh biq kaxêêt hlơơp ih?” 51Tuôôy nưq, kơy nưq heq đnooy varơuq nưq leh truh xing kadih kơy, bơh vii laa thơy tơơk tưp kôt xanưm nưq, lunưq kơy heq đnooy hlit đaneq Lôôk Jê-xu jeq pheq kaxêêt vii tamooy, 52ji leh vơ laa vii tamooy neq, đơu măn laa xôq koot xau ku Kơy Plêêk biq măn pachaay hnoq ik wiit xuq jêêk muuyq. 53Lunưq, xing hngơy nưq, oot xôq vih xôq oot hnoq ik jarooy Kadraq muut aduq kaxêêt.

54Kơq nưq, Lôôk Jê-xu leh măn hooy hlê ăm xet đom khơl manih Jo Thaiq đnoyq, bơh Kadraq hooy klơlh aduq nưq hooy truh dêh jeq wăngq we, đom muuyq theng jah taayh laa Ep-ra-im. Kadraq măn aduq nưq dii khơl xatyauq. 55Tuôôy nưq, Lêh Dalơh Hlê ku manih Jo Thaiq jeq truh, 'ngưng dro xing dêh palơy hooy tok truh Jê-ru-sa-lem adroyq ka hngơy Lêh Dalơh Hlê xôq oot hnoq ik paxa rêh kadih oot. 56Anưq laa, oot axek akhiim Lôôk Jê-xu, ji đnooy dii mamuuyq tuôôy dưk đom hnhư hơu: “Dii khơl kơy, varơuq nưq 'yo dang đaji luleq? Đaneq kơy nưq kajưk dik hnoq leh truh jưq lêh?” 57Tuôôy nưq, khơl thơy tơơk tưp kôt ji manih Pha-ri-si heq patăk dăt, xôq ka atoh dro leq xet Kadraq măn 'leq, dro nưq pheq tauq hlê xôq oot hnoq ik rôp Kadraq.