Ga-la-ti 5

1Lôôk Wơơt Dêh heq wơơt xaloot haay xôq jah rayơh rayơơy. Vii anưq, dayh dưk kajưk ji te chiuq pơq xok varaq xapok đnoyq.

2Xiin dayh tabông, gô, Phao-lô, đnooy dii oh ay đaneq atoh oh ay duh chiuq goch kađuh, yôôych Lôôk Wơơt Dêh hnoq be taway ich lơơy kajoq ka oh ay dêq. 3Gô đnooy kajưk yưk tra dii tôôy muuyq dro chiuq goch kađuh đaneq adro nưq băt pheq tameng jư dêq hloay ganuun. 4Oh ay leq trôôch jah xưng hyioh jăk bơyh ganuun yôôych heq biq goch ka'lăk klơlh Lôôk Wơơt Dêh, heq vlôh klơlh vanong plêêk. 5Măn phon haay, gamưh Kơy Phool Hiel, bơyh xuum tuôq, haay ra uk ra aar takôô xuum takôô gamưh truh varơuq hyioh jăk. 6Vii đom Lôôk Wơơt Dêh Jê-xu, varơuq 'yo duh be aalq laa goch kađuh long leh goch kađuh, đơu laa xuum tuôq jah dưk dơơp gamưh xuum xung xiaq. 7Oh ay 'miêh đong charơơk tolh. Kơyq heq klơl đơ oh ay xôq leh jah tameng tyauq hyioh jăk? 8Varơuq patuut ahluk nưq be truh xing Kơy tawooyh taayh oh ay! 9Muuyq takiêh tape dơơp vôô tok dêq đum bôôt. 10Đom Lôôk, gô e xuum tuôq kajưk truh oh ay, đaneq oh ay hnoq leh biit đêh 'leq. Mot kadrơy, adro leq dơơp xôôl dôôl xuum biit oh ay hnoq chiuq hmơt dook, ju paq kê adro nưq laa kơyq. 11Bơh, wơơy oh ay, atoh đaji gô măn padoh taboon pheep goch kađuh yôôych vii aleq gô măn biq rôp toop? Atoh anưq yôôych varơuq gưlh lôp vii kơq gay charăk heq jah deep ka'lăk yôôch. 12Gô pheq đnooy trôôch khơl adro dơơp paloanq oh ay hnoq kadih thienq oot dơyh.

13Wơơy oh ay, vii oh ay heq jah tawooyh taayh truh varơuq rayơh rayơơy, vơ laa varơuq rayơh rayơơy leh aalq xôq taway hlê kawah ka varơuq katik xăk xamơk, tađôôy muut đnư, dayh hơu varơuq mamuuyq bơyh xuum xung xiaq. 14Vii dêq hloay ganuun jah dơơp xaleep đom muuyq apok tanưưl: “Koot pheq xung xiaq manih gah gih koot đaji xăk koot.” 15Măn atoh oh ay kek chieh ji xaluôt mamuuyq, yôôych dayh rơơt rol, leh kheoq oh ay păk kaxêêt mamuuyq.

16Wih hlê, gô đnooy đaneq, dayh tawaak hooy tyauq Kơy Phool hiel, yôôych oh ay kajưk dik leh dơơp xaleep kaluh hmưch trôôch ku xăk xamơk. 17Vii xăk xamơk hmưch trôôch đêh dii Kơy Phool Hiel, măn Kơy Phool Hiel đêh dii xăk xamơk. Vii vaarq panưh tachơơl dii mamuuyq, vii anưq leh e varơuq long oh ay trôôch kaluh varơuq neq, yôôych kưq dơơp. 18Bơh atoh oh ay jah Lôôk Phool Hiel jarooy pato, yôôych oh ay leh măn 'laarq ganuun. 19Kaluh varơuq dơơp ku xăk xamơk laa ro raang, kaluh nưq laa: varơuq apuq atrăp, klơơr 'yêq, xa agưt bơyq ba, 20akuh vangưl, đơơp pheep, tachơơl mamuuyq, tagoa tayaat, 'yarơ, tôq jaraq, takhuk tayaat, leh tagu, bing ja, 21'yarơ geet, vuul weel, trôôch xa hôôch kung kaluh kajoq dang đaji kaluh varơuq nưq, đơu truh varơuq nưq, gô đnooy panhăk ka oh ay, đaji gô heq đnooy panhăk adroyq neq, đaneq khơl leq dơơp kaluh varơuq đanưq hnoq leh nhonq jah ik daak dêh Kơy Plêêk. 22Bơh play ku Kơy Phool Hiel laa xuum xung xiaq, hlah hlaak, hrok hrol, atuq xuum, be huq, xuum kaxay, muuyq xuum, 23hien tamaq, jư xăk; be e ganuun leq tachơơl hlê dii kaluh varơuq đanưq. 24Mot kadrơy, khơl dro thuôk xuq Lôôk Wơơt Dêh Jê-xu heq đongq đing varơuq katik xăk xamơk kung dii kaluh xuum trôôch ji hmưch trôôch tol gay charăk.

25Atoh haay riirh gamưh Kơy Phool Hiel, yôôych haay kung duh tawaak hooy tyauq Kơy Phool Hiel. 26Te vlôh jêêk apok pa ôôh tuôôy tache jaraq mamuuyq, 'yarơ mamuuyq.