Ê-phê-sô 4

1Lunưq, gô, adro karuk đom Lôôk, ahmưk nhăk oh ay pheq riirh trôôk xưngq đangq dii varơuq tawooyh taayh đơu oh ay heq jah taayh truh, 2bơơn dêq hloay varơuq apôôt xăk ji be huq, kung dii atuq xuum, chiuq uunq mamuuyq đom xuum xung xiaq, 3paraanq dêq paraat xôq jư varơuq tagumq muuyq ku Kơy Phool Hiel đom thơơl taboot tagu hlê. 4Vơ muuyq xăk xamơk ji muuyq Kơy Phool Hiel, kung đaji oh ay heq jah taayh truh muuyq xuum takôô gamưh đom varơuq tawooyh taayh ku oh ay, 5vơ muuyq Lôôk, muuyq xuum tuôq, muuyq pheep bap-tem, 6vơ muuyq Kơy Plêêk, Vaq ku tôôy dro, Kơy măn ataalh tôôy dro, katul tôôy dro ji đom tôôy dro. 7Bơh, vanong plêêk heq jah kahniq ka tôôy dro muuyq đom haay tyauq kamưk đom varơuq kahniq ăm ku Kơy Lôôk Wơơt Dêh. 8Kơq nưq, e apok valơk:

“Tuôôy Kadraq 'ngôôy tol kaluh aduq yơơt,

Kadraq hooy adroyq jarooy tyauq bing xapok,

ji kahniq 'ngưng kadrool ka koot manih.”

9Lunư, “Kadraq 'ngôôy tok” iq laa kajoq atoh leh aalq laa Kadraq kung heq pôôt truh kaluh aduq lêq ku vari? 10Jơq Kơy heq pôôt kung laa Kơy heq 'ngôôy tok yơơt iaq dêq hloay kaluh tal plêêk, xôq Kadraq hnoq ik dơơp galơh galaay tôôy varơuq. 11Jơq Kadraq heq xôq muuyq sôôq dơơp khơl jah rơơlh, muuyq sôôq dơơp hnhư hlit, muuyq sôôq dơơp hnhư padoh pato Hêêl Kaxay, muuyq sôôq dơơp muk sư ji thơy pato, 12xôq taway truh varơuq ralauq xôq khơl vah ka varơuq dơơp hơu varơuq, wih truh varơuq rôôk tok xăk xamơk ku Lôôk Wơơt Dêh, 13dong truh tuôôy dêq hloay haay varơyh truh varơuq tagumq muuyq đom xuum tuôq ji varơuq hlolh xet Koot Kơy Plêêk, vlôh jêêk dro kôt xet, varơyh truh kaphook xăk xaleep ku Lôôk Wơơt Dêh, 14xôq haay paq măn laa on oh, biq taluq talek ji hwoa hoot tyauq tôôy ngưưr khiel pato dayq vii xuum 'moh ku khơl kadrơy gamưh xuum xôq vih dii varơuq pa ôôh, xơk lar. 15Tađôôy muut đnư, tuôôy đnooy vlôh varơuq dik đom xuum xung xiaq, haay hnoq ik kôt tok đom tôôy panưh wih truh Kadraq, Kơy laa akoq, nưq laa Lôôk Wơơt Dêh, 16xing aduq Kadraq đơu dêq xăk xamơk jah tagumq hlê ji tabôk hlê dii mamuuyq gamưh tôôy thơơl tabôk vek waak, tyauq đaji kamưk dơơp đom tôôy muuyq bôq phânq, dơơp ka xăk xamơk kôt tok xôq kadih rôôk tok đom xuum xung xiaq.

17Kơq nưq, gô đnooy varơuq neq ji ahmưk nhăk oh ay đom Lôôk xôq paq măn xa măn dang đaji tamooy kadrơy đnoyq, oot riirh đom varơuq hư hlơơp ku xuum biit oot. 18Vii xuum biit oot heq biq dơơp kamơng jaluk, vlôh jêêk đêh xangưưy dii varơuq riirh ku Kơy Plêêk vii varơuq vlô apoop măn đom oot, vii xuum oot găk khăk. 19Tuôôy vlôh jêêk paq măn xet biit kajoq, oot ka'lăk xăk oot muut đom varơuq xagưt xôq lôp tôôy varơuq klơơr 'yêq dii xuum hmưch trôôch. 20Bơh oh ay heq leh hok xet Lôôk Wơơt Dêh đanưq, 21vii dik laa oh ay heq tameng truh Kadraq ji heq jah pato dayq đom Kadraq, tyauq đaji varơuq dik măn đom Lôôk Jê-xu, 22đaneq pheq leh ka'lăk klơlh oh ay kaluh kajoq thuôk xuq đơơy riirh adroyq neq, nưq laa koot manih duut biq hư hlơơp vii xuum hmưch xơk lar, 23đơu jah dơơp vlôh đơu gamưh Kơy Phool Hiel đom xuum biit oh ay, 24ji hlưp muut koot manih đơơu, laa manih jah panưk jêêk tyauq Kơy Plêêk — đom varơuq hyioh jăk ji varơuq vah xarêh ku varơuq dik.

25Đanưq, tuôôy heq ka'lăk varơuq pa ôôh lar, tôôy dro pheq đnooy varơuq dong dik dii manih gah gih oh ay, vii kơq haay laa chi thêêh ku mamuuyq. 26Oh ay ik tôq jaraq đơu leh lôp kadrôôp. Dayh xôq mot hngơy leh lôp tol varơuq dơơp jaraq oh ay, 27kung te xôq kawah leq ka kamuuych. 28Dro atôk te atôk đnoyq. Bơh, tolh iaq, dro nưq pheq raanq paraat dơơp varơuq tamaq kaxay bơơn kadih ti ni, xôq ka dro nưq e tuôông kajoq xôq ahlook ăm dii dro leq đong măn đom tuôôy pangoot hrah. 29Te xôq apok đnooy xơk 'moh leq đnooy vlôh xing huuy oh ay, đơu dayh đnooy kaluh apok leq tolh kaxay jarooy truh varơuq rôôk tơơk dro leq đom tuôôy pơơl hwơơl, xôq apok nưq hnoq ik taway vanong ka dro tameng, 30ji te dơơp hlu Kơy Phool Hiel ku Kơy Plêêk, vii Kadraq đơu oh ay jah dơơp dơuq ka hngơy wơơt bla. 31Dayh ka'lăk klơlh oh ay dêq hloay jiq xuum, tôq xuum, tôq jaraq, tayaat, đnooy ra ơơh, kung tôôy varơuq xơk tauq. 32Tađôôy muut đnư, dayh kahnoq vlôh ka mamuuyq xuum hwêêt, xuum angơuq, ka'lăk ka mamuuyq kung đaji Kơy Plêêk heq ka'lăk ka oh ay đom Lôôk Wơơt Dêh.