Skip to content
BibleKenya

Cua Bible Literal Text

Ê-phê-sô 1

Phao-lô, Khơl jah rơơlh ku Lôôk Wơơt Dêh Jê-xu vii iq trôôch ku Kơy Plêêk, atăq ka khơl vah, laa khơl tuôq măn aduq Ê-phê-sô ji laa khơl adro muuyq xuum đom Lôôk Wơơt Dêh Jê-xu. Apôôy vanong plêêk ji varơuq hrok hrol xing Kơy Plêêk, Vaq haay, ji Lôôk, laa Lôôk Wơơt Dêh Jê-xu, truh tol oh ay.

Đangq ayuôôt laat Kơy Plêêk, Vaq ku Lôôk Wơơt Dêh Jê-xu, Lôôk haay, laa Kơy heq apôôt vanong ka haay dii tôôy vanong danưng kooy măn kaluh aduq tol plêêk đom Lôôk Wơơt Dêh, kung đaji Kadraq heq rơơlh haay đom Lôôk Wơơt Dêh xing adroyq tuôôy panưk pajêêk play vari, xôq haay jah yuôôr vah ji leh e aduq xôq đnooy ik kangưưr Kadraq. Vii xuum xung xiaq Kadraq heq đinq adroyq haay xôq dơơp koot văch ku Kadraq gamưh Lôôk Wơơt Dêh Jê-xu, tyauq varơuq hlah xuum ku iq trôôch Kadraq, xôq vlôh play bơơn varơuq ayuôôt laat tađnah tađnaak ku vanong plêêk Kadraq đơu Kadraq heq ranưh ranơơy kahniq ăm ka haay đom Koot Xung Xiaq ku Kadraq, đơu đom Koot nưq, haay e varơuq wơơt bla gamưh vahaap Kadraq, varơuq tha ka'lăk kadrôôp maroh tyauq varơuq karoh e ku vanong plêêk Kadraq, laa vanong plêêk đơu Kadraq heq kahniq ăm ka haay kach raah jôôh đom tôôy varơuq khôôt xet ji hlolh xet, khienq ka haay nhonq xet varơuq kadook ku xuum trôôch Kadraq tyauq varơuq hlah xuum Kadraq, laa varơuq đơu Kadraq heq ralauq xôq xing droyq đom Lôôk Wơơt Dêh, xôq tuôôy truh kawah đinq jah payôôch ka varơuq heq đinq xôq, yôôych anguk tagumq tôôy paroh hlê đom Lôôk Wơơt Dêh, kung kaluh paroh tol plêêk hloay kaluh paroh 'laarq vari, đom Kadraq, nưq laa đom Kơy đơu haay kung jah ahlook phon kơ ngiip, vii heq jah đinq adroyq tyauq ka iq ku Kơy dơơp yuôôr tôôy varơuq dang đaji ka varơuq ku iq trôôch Kadraq, xôq ka haay, khơl ado adroyq dik xôq xuum takôô gamưh aduq Lôôk Wơơt Dêh, jah raak play bơơn varơuq ayuôôt laat truh tađnah tađnaak ku Kadraq. Laay kung đom Kadraq, atêq tuôôy tameng đaauq ku varơuq dik, laa Hêêl Kaxay truh varơuq wơơt bla oh ay, ji tuôôy heq tuôq aduq Kadraq, yôôych oh ay heq jah dơơp hlêêl bơơn Kơy Phool Hiel tyauq apok tavek, đơu Kơy nưq laa varơuq dơơp xanưk truh kơ ngiip ku haay dong truh tuôôy root bla dêq hloay kơ ngiip, xôq raak play bơơn varơuq ayuôôt laat truh tađnah tađnaak ku Kadraq.

Vii anưq, xing ka tuôôy gô tameng truh xuum tuôq ku oh ay đom Lôôk, laa Lôôk Jê-xu, ji xung xiaq deng ka dêq hloay ka khơl vah, yôôych gô leh padơy tưp apok kuh kway vii oh ay, văch truh oh ay đom apok apôôy ku gô, xôq ka Kơy Plêêk ku Lôôk Wơơt Dêh Jê-xu, Lôôk haay, laa Vaq tađnah tađnaak, hnoq kahniq ka oh ay yaak ku varơuq khôôt xet ji varơuq kahnoq tauq đom varơuq nhonq xet Kadraq, khienq kalook mot ku xuum oh ay jah ahnhe tađnah, xôq oh ay xet xuum takôô gamưh truh varơuq tawooyh taayh ku Kadraq laa kajoq, varơuq karoh e ku Kơ ngiip tađnah tađnaak Kadraq đom khơl vah luleq, ji varơuq kôt lơyq leh kajoq taso ku taay yaak Kadraq laa luleq đôôyq dii haay, laa khơl adro e xuum tuôq, tyauq varơuq dưk dơơp xing paraat kalh taay yaak ku Kadraq, đơu Kadraq heq dưk dơơp đom Lôôk Wơơt Dêh tuôôy khienq Lôôk Wơơt Dêh xing aduq kaxêêt riirh hlê ji xôq 'ngôôy pi akoh Kadraq măn kaluh aduq tol plêêk, galơh iaq tol tôôy khơl dưk xanok, qwuyen da uh, taay yaak, ji chuh qwuyen, kung tôôy anơng taayh jah atok yal, leh vơ đom đơơy neq đơu hloay đom đơơy jeq truh đnoyq. Kadraq heq khienq tôôy paroh kuh kul 'laarq jôôk Lôôk Wơơt Dêh ji xôq Lôôk Wơơt Dêh dơơp akoq măn ataalh tôôy varơuq đôôyq dii tayuup vah, đơu tayuup vah laa xăk xamơk Kadraq, laa varơuq xaleep ku Kơy dơơp xaleep tôôy varơuq đom tôôy paroh.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.