Kông-vuq 12

1Tuôôy nưq, muut kawat nưq, vuua Hê-rôt vlôh ti dơơp ra ơơh muuyq sôôq manih đom tayuup vah. 2Tuôôy nưq, kơy nưq păk kaxêêt Ja-kơ, ay ku Jăng, bơơn xieh. 3Nưq yôôch, tuôôy hloq đaneq varơuq neq laa varơuq nhăp iq đôôyq dii manih Jo Thaiq, kơy nưq kung laay hooy truh rôp jư Phi-e-rơ (đơu kaluh varơuq nưq xalih vlôh muut kaluh hngơy ku tuôôy lêh Tôôp Leh Tape), 4ji atêq tuôôy rôp jư phi-e-rơ, kơy nưq heq ăm xagook muut karuk, phon ahlook poot bing kuun jư 'yo kơy, xung đinq hoot kơy vlôh kangưưr manih karôp atêq Lêh Dalơh Hlê. 5Nưq laa, long Phi-e-rơ đong biq karuk đom tu, bơh varơuq xadrook apôôy yôôych măn jah dưk dơơp muuyq kach dêq xuum wih truh Kơy Plêêk deng ka kơy xing tayuup vah. 6Tuôôy nưq, muut tuôôy Hê-rôt xarôp xagook kơy vlôh xadrah, jơq klôôy nưq, Phi-e-rơ đong vik katul vaarq dro kuun, biq kal bơơn vaarq raq looy tooy, katuôôy khơl kuun jư pi adroyq 'mok đong jư 'yo tu. 7'Yo hơq, muuyq kơy hơu ku Lôôk truh dưk gah kơy, xaraar tađnah jaraak ahnhe đom phong karuk. Tuôôy nưq, atêq tuôôy pah muut katêêk Phi-e-rơ, viq kơy hơu nhơk kah kơy, dăt: “Dayh kah yơu,” ji kaluh talơy looy tooy kơy rôh vlôh klơlh ti. 8Tuôôy nưq, Kơy hơu đnooy dii kơy: “Dayh kadih hnek katêêk ji troaq kaxôôp ku ay muut.” Nưq yôôch, kơy dơơp dang đanưq. Kơy yaak plêêk kung đnooy dii kơy: “Dayh hlưp aau pi gôk ku ay muut ji tyauq gô.” 9Atêq tuôôy vlôh pi gôk, kơy tyauq kơy nưq đơu kơy heq be xet đaneq varơuq đong jah dưk dơơp xing kơy hơu laa dik bơh kơy 'miêh biit laa đong hloq muuyq varơuq ăm xet adroyq. 10Tuôôy heq dalơh hlê bing kuun jư thưq muuyq ji thưq vaarq, oot hooy truh kahlăk 'măk 'mok bơơn maam jarooy muut theng, đơu ni kadih luh vlôh ka oot. Atêq tuôôy vlôh pi gôk, oot hooy aloh muuyq trôôk ji kơy hơu nhăp vơ chuh klơlh kơy. 11Tuôôy kadih xăk heq văch hlê, Phi-e-rơ đnooy: “Dong dik, juneq gô đơơu xet đaneq Lôôk heq patăk kơy hơu Kadraq ji wơơt gô klơlh ti Hê-rôt, kung tôôy takôô ku manih Jo Thaiq.” 12Katuôôy, tuôôy heq hlolh đanưq, kơy hooy truh hnhư Ma-ri, miq ku Jăng, jah taayh laa Mak, đơu aduq neq e 'ngưng khơl tuôq jah tưưuq hlê ji đong xadrook apôôy. 13Tuôôy nưq, tuôôy kơy ahngoq 'mok ngo, muuyq xapok kadrê, anơng Rô-đơ, tawaak hlê jeq xôq tơơl apok. 14Atêq tuôôy nhonq vlôh xarooy ku Phi-e-rơ, đơu vii hlah hlaak, mư heq leh luh 'mok, bơh wih charơơk muut 'lăp, mư pahêêr đaneq: “Phi-e-rơ đong dưk kangưưr 'mok.” 15Lunư, oot đnooy dii mư: “Mư đong vlôh rapơ.” Bơh mư kưq chăk chănq varơuq xalih vlôh đanưq. Lunưq, oot đnooy: “Nưq laa kơy hơu ku kơy nưq.” 16Wih hlê, Phi-e-rơ ahngoq đnoyq, ji atêq tuôôy luh vlôh, oot 'yo hloq kơy ji xok dơơp akêh. 17Tuôôy nưq, tuôôy heq vlôh hlêêl bơơn ti ka oot hnhep, kơy padoh bơơn kach leq đơu Lôôk heq jarooy kơy vlôh klơlh tu. Katuôôy, kơy dăt: “Dayh taboon hlê kaluh varơuq neq ka Ja-kơ ji ka khơl oh ay.” Yôôch tawaak vlôh pi gôk, kơy hooy truh muuyq aduq kadrơy. 18Tuôôy nưq, tuôôy heq xaroq, e varơuq tarok 'nhih leh de đom bơy bing kuun vii varơuq heq xalih vlôh ka Phi-e-rơ. 19Măn Hê-rôt, tuôôy heq ăm arơơk aruôh axek manih đơu leh hloq, tuôôy tra vôôch yôôch bing kuun jư, kơy nưq patăk ăm păk kaxêêt oot. Ji atêq tuôôy hooy xing Ju-đê aloh truh Sê-sa-rê, kơy nưq măn hlê ka đnư.

20Tuôôy nưq, kơy nưq đong măn jaraq tamooy Ti-rơ ji tamooy Si-đôn. Nưq yôôch, oot kung mamuuyq hooy truh tavơh kơy nưq, ji tuôôy heq xok xuum Ba-la-tut, laa padrok jư 'yo ku vuua, oot athêêk tagu vii dêh oot jah xok tuôông xa xing dêh ku vuua. 21Tuôôy nưq, muut hngơy heq đinq, atêq tuôôy hlưp aau vuua ji 'ngôôy tol ngaai, Hê-rôt đnooy vlôh kangưưr oot. 22Tuôôy nưq, manih karôp taayh kôt: “Nưq laa apok ku muuyq kơy yaak, leh aalq ku koot manih!” 23Yôôch hloay jơnưq, muuyq kơy hơu ku Lôôk dook kơy nưq bơyh vii kơy nưq leh tơơk varơuq tađnah tađnaak ka Kơy Plêêk, ji atêq tuôôy biq hraay xa, yôôych kơy nưq kloh hơơy.

24Măn apok ku Kơy Plêêk kưq lơy ranưh ji jah athêêp 'ngưng.

25Xatyauq nưq, Ba-na-ba ji Sau-lơ wiit xuq truh Jê-ru-sa-lem, tuôôy heq payôôch kaluh varơuq hơu dơơp ku oot, jarooy xatyauq Jăng kung hooy, adro jah taayh laa Mak.