Kông-vuq 10

1Tuôôy nưq aduq theng Sê-sa-rê, muuyq dro nưq anơng Kot-nây, laa padrok xakaq kôt thuôk bing kuun jah taayh laa I-ta-li, 2laa manih tamaq xuum ji kuh yôq Kơy Plêêk kung dii hloay hnhư kơy, dơơp 'ngưng varơuq ăm hloh ka manih karôp ji xadrook apôôy dii Kơy Plêêk kach hloay hloay. 3Đom kơh kawah wat thưq xiit đom hngơy, đom muuyq varơuq ăm xet adroyq, kơy 'yo hloq ro raang muuyq yaak plêêk ku Kơy Plêêk truh dii kơy ji đnooy kung kơy: “Kot-nây!” 4Bơh atêq tuôôy 'yo anhinq muut kơy yaak plêêk ji kadrăch varaal, kơy đnooy: “Wơơy kadraq, e varơuq kajoq?” Yôôch kơy nưq đnooy dii kơy: “Kaluh apok xadrook apôôy ku kơy kung dii kaluh varơuq tamaq kaxay ku kơy heq tok truh kangưưr Kơy Plêêk đaji muuyq kuah lêh văch truh. 5Tuôôy nưq, dayh patăk manih truh Jôp-bê ji ăm mơơy Si-môn nưq, adro jah taayh laa Phi-e-rơ. 6Kơy nưq đong jah đoonq tiip xing muuyq Si-môn hơq, thơq thuôk kađuh, laa dro e hnhư ka gah tahli.” 7Anưq yôôch, tuôôy yaak plêêk, laa kơy xanoh dii kơy, heq chuh hooy, yôôych atêq tuôôy taayh vaarq dro xapok đom hnhư, kung dii muuyq dro kuun kuh kul đom sôôq khơl manih hơu varơuq kơy, 8ji tuôôy heq taboon ka oot tôôy varơuq, kơy patăk oot truh Jôp-bê.

9Hngơy atêq, đong tuôôy khơl manih nưq hooy trôôk ji jeq truh theng, Phi-e-rơ hooy tok ataalh apo hnhư xôq xadrook apôôy kawah wat thưq drơu. 10Tuôôy nưq, kơy xarôp tek pangoot ji trôôch xa, bơh đom tuôôy khơl drơy đong palauq tuôông xa, muuyq varơuq ăm xet adroyq truh tol kơy, 11kơy hloq lawah plêêk heq jah luh vlôh ji muuyq tuôông tađnưk nưq kahri pôôt, dang đaji muuyq tômq khanh kôt, jah ahlea pôôt vari xing poot muum, 12đơu đom nưq laa dêq hloay kaluh paroh ôô poot jôôk, kaluh paroh ahoot kanaap tol vari ji kaluh xêêp plêêk, 13Yôôch muuyq apok xanoh truh kung kơy: “Phi-e-rơ, atêq tuôôy kah, dayh dơơp ôq ji xa yơu.” 14Bơh Phi-e-rơ tơơl: “Kuh Lôôk, leh ik 'leq, vii koot be dong leq xa paq kê thưq kajoq klơơr 'yêq ji leh xarêh xaraat.” 15Ji muuyq yưk tra, apok xanoh nưq truh dii kơy đom yưk thưq vaarq: “Kaluh kajoq Kơy Plêêk heq dơơp xarêh, koot te 'yo laa klơơr 'yêq.” 16Anưq yôôch, varơuq neq xalih vlôh truh pe yưk, ji vâk nưq hloay jơnưq jah atok tol plêêk.

17Tuôôy nưq, đom tuôôy Phi-e-rơ đong xôôl dôôl đom xuum truh varơuq ăm xet adroyq đơu kơy vơơ hloq laa kajoq, yôôych 'yo hơq, khơl adro jah Kot-nây patăk hooy heq dưk kangưưr 'mok, atêq tuôôy axek vôôch hnhư Si-môn. 18Tok apok taayh, oot vôôch Si-môn, jah taayh laa Phi-e-rơ, e jơq long leh laa đong jah tiip đoonq ka đnen. 19Măn Phi-e-rơ, đom tuôôy măn đong biit truh varơuq ăm xet adroyq hơq, yôôych Kơy Phool Hiel xanoh dii kơy: “'Yo hơq, pe dro khơl kanau đong axek koot. 20Lunư atêq tuôôy dưk tok, koot dayh pôôt ji hooy dii oot, leh kamưưl ier kajoq, vii Gô heq patăk oot.” 21Nưq laa, tuôôy heq hooy pôôt truh taleq dro nưq, Phi-e-rơ đnooy: “'Yo ne, gô laa dro khơl ay đong axek. Vii kakơq kajoq đơu khơl ay truh đnen?” 22Tuôôy nưq, oot đnooy: “Padrok ưk kôt Kot-nây, muuyq dro hyioh jăk ji kul yôq Kơy Plêêk, kung hloay jah xanưk tolh xing padêq manih Jo Thaiq, heq jah muuyq kơy hơu vah pato dayq pheq taayh kơy truh hnhư kơy xôq tameng kaluh apok pato dăt xing aduq kơy.” 23Anưq, tuôôy heq mơơy oot muut hnhư, kơy tiip đoonq oot.

Yôôch hngơy atêq đnoyq, atêq tuôôy dưk tok, kơy hooy vlôh dii oot, ji taleq oh ay xing Jôp-bê raay hooy dii kơy. 24Ji yôôch, hngơy atêq, oot hooy truh Sê-sa-rê. Tuôôy nưq, Kot-nây đong kôô oot, đom tuôôy heq taayh 'ngưng oh ay kơy kung khơl 'wơyq qween xet tagumq tưưuq hlê. 25Tuôôy nưq, varơuq xalih vlôh tuôôy Phi-e-rơ tawaak muut, tuôôy tavơh mot kơy, yôôych Kot-nây kuh ayuôôt, kul pôôt aduq jôôk kơy. 26Bơh Phi-e-rơ rôôk kơy dưk, đnooy: “Xiin dayh dưk tok! Xăk xamơk gô kung laa koot manih đơu heq.” 27Đom tuôôy đnooy athêêk dii Kot-nây, kơy tawaak muut ji hloq 'ngưng dro heq tưưuq anguk hlê. 28Katuôôy, kơy đnooy dii oot: “Kadih oh ay xet neq laa varơuq aklơ ganuun vlôh aleq đôôyq dii muuyq manih Jo Thaiq xa athêêk long truh hlơq muuyq dro daak kadrơy, bơh dii gô, Kơy Plêêk heq pato dăt leh taayh muuyq dro laa klơơr 'yêq long leh xarêh. 29Vii anưq, atêq tuôôy jah mơơy, gô heq hooy muuyq kach leh duh biit. Anưq, gô đong thăk măk, kakơq kajoq đơu oh ay ăm mơơy gô?” 30Kot-nây tơơl: “Poot hngơy adroyq, truh wat neq, gô đong xadrook apôôy đom hnhư gô muut wat thưq xiit, yôôych 'yo hơq, muuyq dro dưk kangưưr gô đom qwuân aau ah raliek, 31ji dro nưq đnooy: ‘Kot-nây, apok xadrook apôôy ku ay heq jah tameng ji kaluh varơuq kaxay ku ay heq jah văch truh kangưưr Kơy Plêêk. 32Anưq, dayh patăk manih truh Jôp-bê ji mơơy Si-môn, laa manih jah taayh laa Phi-e-rơ. Kơy nưq đong jah tiip đoonq aduq hnhư ku Si-môn, muuyq thơq thuôk kađuh, gah tahli.’ 33Vii anưq, gô hloay jơnưq ăm manih hooy mơơy kơy, kung hloay kơy kung heq dơơp kach hyioh troq tuôôy truh đnen. Lunưq, juneq, dêq hloay 'wot đong măn đnen kangưưr Kơy Plêêk xôq tameng tôôy varơuq heq jah Lôôk padoh pato ka kơy.” 34Tuôôy nưq, tuôôy luh apok đnooy vlôh, Phi-e-rơ đnooy: “Gamưh tol varơuq dik, gô nhonq xet đaneq Kơy Plêêk be aalq laa Kơy bing kơyq. 35Tađôôy muut đnư, đom tôôy khơl tamooy, kơyq kuh yôq Kadraq ji dơơp varơuq hyioh jăk yôôych jah 'yo nhonq đôôyq dii Kadraq. 36Apok kơy plêêk đơu Kadraq heq atăq truh ka manih I-sơ-ra-ên, tuôôy padoh vlôh Hêêl Kaxay truh varơuq hrok hrol gamưh hlê Lôôk Wơơt Dêh Jê-xu — Kadraq laa Lôôk ku dêq hloay — 37oh ay heq xet tuôôy kaluh varơuq xalih vlôh ratơh tuôôt loch dêh Ju-đê, pa xarôp aduq Ga-li-lê, atêq pheep bap-tem đơu Jăng heq padoh taboon, 38truh Jê-xu, Kơy vlôh xing Na-xa-ret, đaleq đơu Kơy Plêêk heq para jơu ka Kadraq bơơn Lôôk Phool Hiel ji taay yaak, laa kơy hooy kađneng kahơ dơơp varơuq kaxay tamaq ji payơh tôôy dro biq kamuuych nhôp, vii Kơy Plêêk măn dii Kadraq. 39'Wot laa khơl manih dơơp xanưk truh dêq hloay kaluh varơuq đơu Kadraq heq dơơp, tol daak dêh ku manih Jo Thaiq ji măn aduq Jê-ru-sa-lem, kung laa Kơy đơu oot heq păk kaxêêt hlơơp bơơn kach kađnok Kadraq tol gay charăk. 40Kơy Plêêk heq dơơp ka Kadraq riirh hlê muut hngơy thưq pe ji khienq Kadraq rama vlôh ro raang, 41leh aalq ăm dêq hloay tôôy dro, bơh ăm khơl dơơp xanưk heq jah Kơy Plêêk rơơlh xing adroyq — nưq laa ăm 'wot, khơl dro heq xa ji hôôch kung dii Kadraq atêq tuôôy Kadraq riirh hlê xing aduq kaxêêt. 42Kadraq heq đnooy dăt 'wot padoh taboon ka manih karôp ji dơơp xanưk kach kôk kalh đaneq Kadraq laa Kơy heq jah Kơy Plêêk rơơlh dơơp Kơy xưh xadrah adro riirh hloay adro kaxêêt. 43Nưq laa truh Kadraq, dêq hloay khơl kơy hlit dơơp xanưk đaneq atoh kơyq xôq xuum tuôq aduq Kadraq yôôych nhonq xok varơuq ka'lăk kadrôôp maroh gamưh yal Kadraq.”

44Đom tuôôy Phi-e-rơ măn đong đnooy kaluh apok nưq, yôôych Lôôk Phool Hiel kahri tol tôôy dro đong tameng apok kơy plêêk ku Kơy. 45Khơl manih tuôq thuôk nhomq chiuq goch kađuh — nưq laa dêq hloay khơl leq heq hooy achung dii Phi-e-rơ — raay tưng hưng, vii varơuq kahniq ăm Lôôk Phool Hiel kung jah uk pôôt tol tamooy daak kadrơy. 46Vii oot tameng khơl manih neq đnooy bơơn kaluh thưq apok đêh ji ayuôôt laat Kơy Plêêk. Đom tuôôy nưq, Phi-e-rơ luh apok: 47“Be aleq kơyq nưq hnoq ik klơl đơ daak xôq khơl manih neq leh jah dơơp bap-tem, nưq laa khơl dro heq nhonq xok Lôôk Phool Hiel kung đaji 'wot?” 48Anưq yôôch, kơy dăt ka oot chiuq bap-tem đom yal Lôôk Wơơt Dêh Jê-xu. Atêq nưq, oot xiin kơy măn hlê axit hngơy.