2 Kô-rinh-tô 12:9

1Nưq laa băt pheq khwoe xăk, ju be xagook ich lơơy kajoq, bơh gô hnoq đnooy đnoyq hlê kaluh varơuq ăm xet adroyq ji kaluh varơuq kahnoq vlôh ku Lôôk. 2Gô xet muuyq adro đom Lôôk Wơơt Dêh, kưl poot xanưm adroyq — e măn đom xăk xamơk long be, gô be xet, long laa măn pi gôk xăk xamơk, gô be xet, Kơy plêêk xet — muuyq adro đanưq heq jah xagook tok dong truh tal plêêk thưq pe. 3Gô heq xet muuyq dro đanưq — ju đom xăk xamơk long pi gôk xăk xamơk, gô be xet, Kơy Plêêk xet — 4đaneq adro nưq heq jah xagook truh Ba-ra-đi ji heq tameng kaluh apok leh ik đnooy đơu be ăm pheep muuyq adro leq đnooy vlôh. 5Truh muuyq adro đanưq, gô hnoq pa ưưt. Bơh truh kadih xăk, gô hnoq leh pa ưưt, đêh vlôh măn đom kaluh ravoch ku gô. 6Vii atoh gô xung trôôch pa ưưt vlôh, yôôych gô hnoq be aalq laa vlô khưrq, vii gô hnoq đnooy dong dik; bơh gô jư hlê, te be muuyq akơyq nưq hnoq ik biit truh gô galơh iaq varơuq adro nưq hloq ik aduq gô long tameng xing gô. 7Vii kơq varơuq kôt galơh ku kaluh kahnoq vlôh, lunưq xôq gô be jêêk vlôh katơơk galơh, yôôych muuyq jaliê 'mooch đom xăk xamơk — muuyq kamuuych xơuq ku Sa-tan — heq jah kahniq ka gô xôq ni hnoq ik tiel dook gô, xôq ka gô leh jêêk vlôh katơơk galơh. 8Truh varơuq neq, gô heq apôôy vôôch Lôôk pe yưk xôq Kadraq hruut ka'lăk ni klơlh gô. 9Nưq đơu Kadraq heq xanoh dii gô: “Vanong plêêk ku Gô laa đu ka koot, vii taay yaak ku Gô jah kahnoq vlôh xaleep đom varơuq ravoch.” Vii anưq, gô hnoq thier raa hlah hlaak pa ưưt vlôh iaq đnoyq đom varơuq ravoch ku gô, xôq ka taay yaak ku Lôôk Wơơt Dêh măn tol gô. 10Jo nưq, gô hlah xuum đom kaluh ravoch, dơơp ra ơơh, pơơl dal, rôp toop, pơơl hwơơl vii kơq Lôôk Wơơt Dêh; vii tuôôy leq gô ravoch, yôôych tuôôy nưq gô jah kalh paraat.

11Gô heq jêêk vlôh vlô khưrq; kadih oh ay heq eep băt gô đanưq. Vii gô 'miêh pheq jah oh ay ayuôôt laat, vii gô heq be thiuq muuyq varơuq kajoq ku “khơl jah rơơlh thier kôt” hơq, ju gô pheq đnooy be laa kajoq dêq. 12Kaluh dơuq hlêêl ku muuyq adro jah rơơlh heq jah kahnoq vlôh đom katul oh ay dii dêq hloay varơuq atuq xuum — kaah dơuq hlêêl ji pheep akêh, kung kaluh varơuq taay yaak. 13Vii 'leq laa varơuq đơu oh ay heq biq thuua iaq kaluh tayuup vah kadrơy, đêh vlôh varơuq kadih gô heq leh dơơp gengq parêq ka oh ay? Dayh ka'lăk dơyh ka gô varơuq lưp hyioh neq!

14Dayh 'yo neq! Gô đong ralauq 'miêh truh dii oh ay yưk thưq pe neq, ji gô hnoq leh dơơp gengq parêq kajoq dêq. Vii gô be axek akhiim kaluh garuh anôôp ku oh ay, đơu laa kadih oh ay. Vii koot xau be aalq tagoop xôq ka miq vaq, bơh laa miq vaq deng ka koot xau. 15Măn gô hnoq thier hlah hlaak tayuh haau, pheq đnooy chiuq tayuh xarêh dêq hloay vii kơq phool hiel oh ay. Jơq be tuôôy xung xiaq oh ay 'ngưng iaq, yôôych gô jah xung xiaq axit bơơt? 16Bơh dayh kưq xôq anưq, kadih gô heq leh dơơp gengq parêq ka oh ay, lunư, vii laa adro khôôt xet, gô heq rôp xok oh ay bơơn aluut patuut. 17Jơq be muuyq akơyq nưq, laa adro gô hmưq patăk truh oh ay, đơu gô heq gamưh adro nưq aluut oh ay? 18Gô heq ahmưk dăt Tit ji patăk muuyq dro oh ay kadrơy kung hooy dii nhu nưq. Tabơh e aalq Tit heq aluut oh ay be? 'Wot heq be tawaak hooy dii kung muuyq danưng kooy ih? Leh achung kaluh hlêêl jôôk ih?

19Adroyq neq, e aalq oh ay biit đaneq 'wot đong đnooy bing kadih dii oh ay? 'Wot laa đong đnooy kangưưr Kơy plêêk đom Lôôk Wơơt Dêh. Bơh, oh ay xung xiaq lơơy, dêq hloay kaluh varơuq neq laa vii ich lơơy ka varơuq rôôk đơ oh ay. 20Vii gô biit yôq, te be tyauq kach leq nưq, atêq tuôôy truh, gô be hnoq ik hloq oh ay đaji kaluh kajoq đơu gô biit trôôch, gô kung leh jah oh ay hloq đaji kiêuh đơu oh ay xung trôôch; te be e 'leq nưq varơuq takaay tayaat, 'yarơ, tôq jaraq, tagoa, đnooy pahnhiq, đnooy xơuq pi katoor, katơơk galơh, xalôônq xalaaoq, 21te be atêq tuôôy gô truh yưk tra, Kơy Plêêk ku gô hnoq ik dơơp gô kamưưl mot truh oh ay, ji gô dik pheq alo nhim ka 'ngưng adro đom sôôq khơl adro tuôôy adroyq heq lôp kadrôôp ji heq be wiit xuum truh varơuq klơơr 'yêq, apuq atrăp ji bơyq ba đơu oot heq lôp.