Cua Bible Literal Text
1 Ti-mô-thê 4:12
Verse 12 is marked below, with the whole chapter around it. Read from the start
Kơy Phool Hiel xanoh ro raang đaneq đom katuôôy đơơy atêq neq, 'ngưng adro hnoq ka'lăk xuum tuôq, charơơk tyauq kaluh garu xi aluut pa ôôh ji apok pato ku kamuuych, đom varơuq dơơp bôô ku bing pa ôôh lar, xuum klaak ku bing nưq heq biq găk gulq, tuôôy leh ăm vôôch pajêêk, đooy deek kaluh tuôông xa đơu Kơy Plêêk dơơp vlôh xôq nhonq xok dii xuum xet kuh kway xing manih tuôq gamưh ji hlolh xet varơuq dik. Vii tôôy paroh ku Kơy Plêêk laa kaxay tamaq, ji be e paroh kajoq đangq vih ka'lăk tuôôy jah nhonq xok dii xuum xet kuh kway, vii tuôông xa jah vah xarêh gamưh apok Kơy Plêêk ji apok apôôy.
Tuôôy xôq kaluh varơuq nưq kangưưr oh ay, koot hnoq laa xapok hyioh jăk ku Lôôk Wơơt Dêh Jê-xu, jah văch xiap xing apok ku xuum tuôq ji pato dayq kaxay tamaq đơu koot heq tameng tyauq. Bơh dayh chôôyq ka'lăk kaluh varơuq taboon leh e dêh araak ku taleq adro mo karaq. Tađôôy muut đnư, dayh atuq arieq kadih koot ka varơuq tuôq kuh kul, vii “varơuq atuq arieq xăk xamơk yôôych ich lơơy đom kawat lêq, bơh varơuq atuq arieq xuum tuôq kuh kul yôôych ich lơơy ka tôôy varơuq, vii e apok tavek ka đơơy neq ji đơơy têq.” Apok nưq laa đangq tuôq gamưh ji đangq đoonq nhonq dêq hloay, vii haay pơq galeh ji tahmơt tagoa ka varơuq neq, vii haay xôq xuum takôô gamưh aduq Kơy Plêêk hloay riirh, Kadraq laa Wơơt Lôôk ku tôôy adro, nhưk laa ku khơl tuôq.
Dayh padoh dăt ji pato dayq kaluh varơuq nưq. Te xôq akơyq 'yo leh ra kajoq tuuyh tadăp ku koot, đơu dayh jêêk vlôh ramil ka khơl tuôq, đom apok đnooy, đom kach xa thêêk, đom xuum xung xiaq, đom xuum tuôq, đom varơuq xarêh xaraat. Dayh tabông muut varơuq đok rahlăp, đnooy panhăk, pato dayq dong truh tuôôy gô truh. Te ka'lăk tăk vanong măn đom koot, laa vanong heq jah kahniq ka koot xing apok hlit, kung dii varơuq xôq ti ku khơl draq.
Dayh atuq arieq kaluh varơuq nưq, dayh tabông muut varơuq nưq, xôq varơuq kôt tok ku koot jêêk vlôh ro raang đôôyq dii tôôy adro. Dayh rơơt rol 'yo hlê kadih xăk koot ji kông varơuq pato dayq. Dayh wêêt kajưk đom kaluh varơuq nưq, vii dơơp anưq koot hnoq wơơt kaah kadih xăk koot hloay khơl adro tameng koot.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.