Cua Bible Literal Text
1 Kô-rinh-tô 8
Truh kaluh thưq đơơp ka vangưl: Haay xet đaneq dêq hloay haay e hlolh xet. Hlolh xet yôôych khienq katơơk galơh, bơh xuum xung xiaq yôôych rôôk đơ. Atoh kơyq biit ni xet varơuq kajoq nưq, yôôych adro nưq măn koq xet đaji ni duh xet. Bơh atoh kơyq vado xiaq Kơy Plêêk, yôôych adro nưq jah Kadraq nhonq xet. Anưq, truh varơuq xa kaluh thưq đơơp đok ka vangưl: Haay xet đaneq vangưl đom dêh araak laa leh e dik, ji đaneq be e yaak vah leq đêh vlôh Kơy Plêêk vơ muuyq. Vii hloay kaah atoh e kaluh thưq jah taayh laa yaak, long măn tol plêêk long 'laarq vari, dang đaji e 'ngưng “yaak” ji 'ngưng “lôôk”, bơh đôôyq dii haay vơ e muuyq Kơy Plêêk, laa Vaq, Kơy đơu tôôy paroh đơơu e, ji laa Kơy đơu haay wih xuq, kung muuyq Lôôk laa Lôôk Wơơt Dêh Jê-xu, gamưh Kadraq đơu tôôy paroh jah panưk jêêk, ji gamưh Kadraq đơu haay jah e mot.
Lunưq, hlolh xet neq leh măn đom tôôy adro. Bơh 'ngưng adro nưq tyauq katik xing adroyq truh juneq dii vangưl, oot xa kaluh thưq nưq đaji laa tuôông heq đơơp ka vangưl, yôôch xuum klaak 'miêh ravoch ku oot biq klơơr 'yêq. Panưh kadrơy, tuôông xa hnoq be taway haay truh jeq Kơy Plêêk; atoh leh xa, haay kung be axit hlê, atoh xa haay kung be athêêp iaq. Bơh dayh rơơt rol, leh kheoq bơơn kach leq nưq, qwuyen rayơh rayơơy neq ku oh ay hnoq ik jêêk vlôh kơq xatôôlh lôp ka adro ravoch. Vii atoh kơyq nưq 'yo hloq adro e hlolh xet 'ngôôy xa đom hnhư akuh vangưl, yôôych be aalq xuum klaak 'miêh ravoch ku oot hnoq biq ahluk ahlul xôq xa kaluh thưq jah đơơp ka vangưl ih? Nưq yôôych, muuyq adro ravoch, muuyq adro oh ay đơu Lôôk Wơơt Dêh heq kaxêêt thay, biq hư hlơơp bơyh hlolh xet ku oh ay. Panưh kadrơy, tyauq kach nưq, tuôôy lôp kadrôôp tachơơl hlê dii khơl oh ay haay ji dơơp jiq xuum xuum klaak ravoch ku oot, yôôych oh ay lôp kadrôôp tachơơl hlê dii Lôôk Wơơt Dêh. Lunưq atoh tuôông xa dơơp ka muuyq adro oh ay ku gô lôp kadrôôp, yôôych gô kajưk dik hnoq leh 'leq xa ôq, xôq ka gô be dơơp xatôôlh lôp ka adro oh ay ku gô.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.