Cua Bible Literal Text
1 Kô-rinh-tô 15:58
Verse 58 is marked below, with the whole chapter around it. Read from the start
Wơơy oh ay, gô kahnoq ka oh ay xet truh Hêêl Kaxay đơu gô heq đnooy vlôh ka oh ay, laa varơuq đơu oh ay kung heq nhonq xok, ji dưk kajưk tol nưq, kung xing Hêêl Kaxay nưq đơu oh ay jah wơơt, atoh oh ay rôp kajưk xok hêêl kaxay đơu gô heq padoh taboon ka oh ay, atoh leh aalq anưq, yôôych oh ay heq tuôq kach đaji hloh. Vii đom sôôq kaluh varơuq adroyq nhưk gô heq pato ka oh ay, laa varơuq đơu gô kung heq nhonq xok — nưq laa Lôôk Wơơt Dêh heq kaxêêt vii kadrôôp maroh ku haay tyauq apok Rahlăp Vah, Kadraq heq biq up, ji heq jah khienq riirh hlê muut hngơy thưq pe tyauq apok Rahlăp Vah, ji Kadraq heq rama vlôh ka Sê-pha, yôôch ka kưl vaarq adro jah rơơlh. Atêq nưq, Kadraq heq kahnoq xăk ka 'ngưng iaq dăp hreek oh ay 'yo hloq kung muuyq yưk, đa sôôq 'ngưng adro đom sôôq oot juneq đong măn riirh, bơh muuyq sôôq heq vik. Atêq nưq, Kadraq heq rama vlôh ka Ja-kơ, yôôch ka dêq hloay khơl jah rơơlh. Nưq yôôch, dong truh lôôch dik ku tôôy manih, Kadraq kung heq kahnoq xăk ka gô 'yo hloq, đaji laa ka muuyq adro oh pa iir kaxeq. Vii gô laa adro de nhưk đom khơl jah rơơlh, laa adro be e xưngq đangq kajoq xôq jah taayh laa adro jah rơơlh, vii gô heq rôp toop tayuup vah ku Kơy Plêêk. Bơh bơyh vanong plêêk ku Kơy Plêêk đơu gô laa kadih gô juneq, ji vanong plêêk ku kadraq đom gô be aalq laa đaji hloh. Tađôôy muut đnư, gô heq pơơl hwơơl 'ngưng galơh iaq dêq hloay khơl kơy nưq, bơh leh aalq gô, đơu laa vanong plêêk ku Kơy Plêêk măn dii gô. Anưq, ju laa gô long laa khơl kơy nưq, yôôych 'wot padoh taboon đanưq ji oh ay heq tuôq đanưq.
Lunư, atoh Lôôk Wơơt Dêh jah padoh taboon đaneq Kadraq heq jah khienq riirh hlê xing aduq kaxêêt, yôôych dơơp aleq muuyq sôôq adro đom oh ay đnooy đaneq leh e varơuq riirh hlê ku manih kaxêêt? Bơh atoh leh e varơuq riirh hlê ku manih kaxêêt, yôôych hloay kaah Lôôk Wơơt Dêh kung heq leh jah khienq riirh hlê; đơu atoh Lôôk Wơơt Dêh heq leh jah khienq riirh hlê, yôôych varơuq pato dayq ku 'wot laa đaji hloh, ji xuum tuôq ku oh ay kung be ik xung liq. Măn 'wot pheq đnooy biq 'yo laa taleq adro dơơp xanưk pa ôôh ku Kơy Plêêk, vii 'wot heq dơơp xanưk truh Kơy Plêêk đaneq Kadraq heq khienq Lôôk Wơơt Dêh riirh hlê, lunưq atoh đaji manih kaxêêt leh jah dơơp ka riirh hlê, yôôych Kadraq heq be khienq Kơy nưq riirh hlê. Vii atoh manih kaxêêt leh jah dơơp ka riirh hlê, yôôych hloay kaah Lôôk Wơơt Dêh kung heq leh jah khienq riirh hlê, đơu atoh Lôôk Wơơt Dêh heq leh jah khienq riirh hlê, yôôych xuum tuôq ku oh ay laa đaji hloh; oh ay đong măn ja đom kadrôôp maroh oh ay. Lunưq khơl adro heq vik đom Lôôk Wơơt Dêh kung biq hư hlơơp. Atoh haay e takôô gamưh aduq Lôôk Wơơt Dêh vơ đom đơơy riirh neq, yôôych haay laa khơl adro đangq tarôôy iaq dêq đom dêq hloay tôôy manih.
Bơh juneq, Lôôk Wơơt Dêh heq jah khienq riirh hlê xing aduq kaxêêt, laa play droyq dik ku khơl adro heq vik. Bơyh vii gamưh muuyq adro đơu e varơuq kaxêêt, yôôych kung gamưh muuyq adro đơu e varơuq riirh hlê ku adro kaxêêt. Vii đaleq đom A-đam, tôôy manih raay kaxêêt, yôôych kung đanưq, đom Lôôk Wơơt Dêh, tôôy manih hnoq jah dơơp ka riirh. Bơh tôôy adro tyauq thưq tưq đêh ku ni: Lôôk Wơơt Dêh laa play droyq dik; atêq nưq laa khơl adro thuôk xuq Lôôk Wơơt Dêh muut tuôôy wiit truh hlê ku Kadraq. Atêq nưq hnoq laa varơuq lôôch dik, tuôôy Kadraq pahnăp daak dêh hlê ka Kơy Plêêk laa Vaq, tuôôy Kadraq heq păk kaxêêt dêq hloay qwuyen dưk xanok, kung tôôy qwuyen da uh ji qwuyen lưk. Vii Kơy nưq pheq dưk xanok dong truh tuôôy Kadraq heq xôq dêq hloay khơl adro tachơơl hlê 'laarq jôôk kadraq. Khơl tachơơl lôôch dik biq păk kaxêêt laa varơuq kaxêêt. Vii “Kadraq heq xôq tôôy paroh 'laarq jôôk kadraq.” Bơh tuôôy đnooy đaneq “Kadraq heq xôq tôôy paroh,” yôôych ro raang laa leh jauq e Kơy khienq tôôy paroh tameng tyauq Kadraq. Tuôôy nưq, tuôôy tôôy paroh heq biq rôp pheq tameng tyauq Kadraq, yôôych tuôôy nưq, kadih Koot kung hnoq chiuq tameng tyauq Kơy heq rôp tôôy paroh tameng tyauq kadraq, xôq Kơy Plêêk hnoq ik laa dêq hloay đom tôôy varơuq.
Atoh leh aalq anưq, yôôych khơl adro chiuq bap-tem thay ka adro kaxêêt hnoq dơơp kajoq? Atoh adro kaxêêt leh dong dik jah khienq ăm riirh hlê, yôôych vii aleq taleq adro nưq chiuq bap-tem thay ka khơl adro hơq? Yôôch vii aleq 'wot chiuq ngwi hiêmh tôôy wat? Oh ay lơơy, gô kaxêêt tôôy hngơy, vii varơuq mưng me truh oh ay, laa varơuq gô e đom Lôôk Wơơt Dêh Jê-xu, Lôôk haay. Atoh đaji tyauq kach ku koot manih, gô heq damưq dii kaluh ôô gôk aduq Ê-phê-sô, yôôych varơuq ich lơơy kajoq deng ka gô? Atoh adro kaxêêt be jah khienq riirh hlê, yôôych “Dayh xa ji hôôch, vii hngơy dơh haay kaxêêt.” Te xôq biq aluut pa ôôh: “Khơl adro 'wơyq xơuq dơơp hư hlơơp kaluh katik kaxay.” Dayh talăng jăk wiit hlê đaji đangq pheq e! Ji te dơơp đnoyq lôp kadrôôp. Vii muuyq sôôq adro be e hlolh xet kajoq truh Kơy Plêêk — Gô đnooy varơuq neq pato truh varơuq kamưưl ku oh ay.
Lunư, muuyq adro hơq hnoq dăt: “Adro kaxêêt jah khienq riirh hlê bơơn kach leq, đơu oot truh dii đa xăk xamơk kajoq?” Adro vlô apoop hơq lơơy! Thưq đơu ay taway paraay be ik dơơp ka riirh atoh ni leh kaxêêt hămq. Ji thưq ay taway paraay yôôych leh aalq dang xăk ni hnoq jêêk vlôh, wih hlê, ay taway paraay vơ laa kalook adreek — bơh ni hnoq ik laa kalook va away long kalook kadrơy. Bơh Kơy Plêêk kahniq ka ni muuyq xăk ưk xatyauq iq Kadraq trôôch, ji ka tôôy kalook adreek muuyq xăk ưk đêh raa. Be aalq tôôy xăk xamơk laa kung muuyq xăk xamơk. Wih hlê laa xăk xamơk đêh raa ku koot manih, xăk xamơk đêh raa ku kaluh ôô gôk, xăk xamơk đêh raa ku kaluh paroh xêêp ji xăk xamơk đêh raa ku kaluh paroh kaa. Kung e kaluh xăk xamơk tol plêêk ji kaluh xăk xamơk 'laarq vari, Lunư, tađnah tađnaak thuôk xuq plêêk laa luneq, măn tađnah tađnaak thuôk xuq vari laa đahơq. Tađnah tađnaak ku mot hngơy laa luneq, tađnah tađnaak ku xiêk laa đahơq, ji tađnah tađnaak ku kaluh xalok yôôych đêh đnoyq. Vii xalok neq đêh raa dii xalok hơq truh tađnah tađnaak. Varơuq riirh hlê ku manih kaxêêt kung đanưq. Xăk xamơk jah up pôôt đom ka varơuq oop hruh, xăk xamơk jah riirh hlê đom ka varơuq paq kaxêêt; jah paraay pôôt đom kamưưl ier; jah riirh hlê đom tađnah tađnaak; jah paraay pôôt đom ravoch, jah riirh hlê đom taay yaak; jah paraay pôôt laa xăk xamơk khiêk hlek, jah riirh hlê laa xăk xamơk thiêêng liêng. Atoh e xăk xamơk khiêk hlek, yôôych kung e xăk xamơk thiêêng liêng. Lunưq kung e apok valơk: “Adro adroyq dik laa A-đam heq jêêk vlôh phool hiel riirh.” A-đam lôôch dik laa yaak kahniq varơuq riirh. Bơh leh aalq xăk xamơk thiêêng liêng e adroyq, đơu laa xăk xamơk khiêk hlek, atêq nưq đơơu truh xăk xamơk thiêêng liêng. Manih thưq nhưk vlôh xing vari, laa manih thuôk xuq vari. Manih thưq vaarq truh xing plêêk. Manih thuôk xuq vari nưq đaleq, yôôych khơl adro thuôk xuq vari kung đanưq; ji Kơy thuôk xuq plêêk đaleq, yôôych khơl adro thuôk xuq plêêk kung đanưq. Đaji haay heq kanôôp long lơuq ku manih thuôk xuq vari, yôôych haay kung duh kanôôp long lơuq ku Kơy thuôk xuq plêêk.
Panưh kadrơy, wơơy oh ay, gô xiin đnooy varơuq neq, đaneq hlek ji vahaap leh ik nhonq jah daak dêh ku Kơy Plêêk. Raay hư hlơơp kung be nhonq jah varơuq leh hư hlơơp. 'Yo ne, gô ăm oh ay xet muuyq varơuq kadook: Be aalq dêq hloay haay hnoq vik, bơh dêq hloay haay hnoq jah tađôôy đơơu, đom ka'mek mot, đom kableuh mot, muut ahlôôk keeng lôôch. Vii keeng hnoq ahna tok, ji khơl adro kaxêêt hnoq jah khienq riirh hlê đom varơuq leh hư hlơơp, yôôch haay hnoq jah tađôôy đơơu. Vii băt dăt xăk xamơk hư hlơơp neq hlưp xok varơuq leh hư hlơơp, ji xăk xamơk pheq kaxêêt neq hlưp xok varơuq leh kaxêêt hlơơp. Yôôch tuôôy xăk xamơk hư hlơơp neq heq hlưp xok varơuq leh hư hlơơp, ji xăk xamơk pheq kaxêêt neq heq hlưp xok varơuq leh kaxêêt hlơơp, yôôych tuôôy nưq, apok heq valơk hnoq xalih vlôh, đaneq:
“Varơuq kaxêêt heq biq luôôt apoop đom varơuq jah jay.”
“Wơơy varơuq kaxêêt, varơuq jah jay ku may măn 'leq?
Wơơy varơuq kaxêêt, nok đôk ku may măn 'leq?”
Đơu nok đôk ku varơuq kaxêêt laa kadrôôp maroh, măn qwuyen paraat ku kadrôôp maroh laa ganuun. Bơh tưp tok Kơy Plêêk apok kuh kway, Kơy kahniq ka haay varơuq jah jay gamưh Lôôk haay, laa Lôôk Wơơt Dêh Jê-xu! Vii anưq, oh ay xung xiaq ku gô lơơy, dayh jêêk vlôh dưk kajưk, leh ahluch tađôôy, tuôôy hloay hloay raah jôh đom varơuq dơơp Lôôk, vii xet đaneq varơuq pơơl hwơơl ku oh ay be aalq laa đaji hloh đom Lôôk.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.