Ishipa 9

Ucikpi u Ka̱shile adama afada a mayun.

Kadanshi a kubana u vuza vu kelime vi ishipa: Vishipa vu Dawuda: a kubana u ma̱zuɓi, a yaꞋan vu ɗa tsu ka̱la̱ka̱tsu ka <<Ukpa̱ u maku ma̱ va̱.>>

1Vuzavaguɗu, mi ta̱ a kucikpa wu n ka̱ɗu ka̱ va̱ ra̱ka̱,

mi ta̱ a kudansa ili i mereve i na vu yain.

2MalaꞋimili dem, mi ta̱ a kuyaꞋan ma̱za̱nga̱ adama a̱ nu.

Mi ta̱ a kuyaꞋan ishipa n cikpa kula ku nu.

3Irala i va̱ i bono ta̱ n ka̱ca̱pa̱ ana ene nu,

a̱ yikpa̱i ɗa a̱ kuwa̱i.

4Avu na vi kayaꞋinkafada ka usuɓi,

vu da̱sa̱ngi a kakuba ko tsugono ka̱ nu.

vu yaꞋin afada a na a yaꞋin mu derere.

5Vu ɓarangi uduniyan.

ɗa vu unai uma a gbani-gbani,

vu urai ula e le ko wannai.

6Unai irala i tsu ko wannai,

vu mutsukpa̱i likuci-likuci i le,

a cinukpai n ula e le gbende-gbende.

7Ama Vuzavaguɗu mogono maꞋa ko wannai,

u zuwa ta̱ kakuba ko tsugono ci ni adama afada.

8Wi ta̱ a kuyaꞋanka aduniyan afada a usuɓi,

a kukiɗaka uduniyan afada derere.

9Vuzavaguɗu ɗa ubuta̱ u kusheɗeku wa aza a na a takacikai,

ubuta̱ u kusheɗeku u ɗa a makyan ma atakaci.

10Vuzavaguɗu, aza a na e yevei nu,

i ta̱ a kuzuwa a̱ɗu e le wa̱ a̱ nu,

vu tsu varuku vuza na u ta̱wa̱i wa̱ a̱ nu ba.

11Cikpai Vuzavaguɗu,

vuza na wi o tsugono tsu Sihiyona,

danai uduniyan ili i na u yain.

12Ka̱shile ki ta̱ a kuciɓa n aza a na i atakaci,

u tsu cinukpa m ma̱shi me le ba,

ama u tsu takacika ta̱ aza a na i o kudoro le.

13Vuzavaguɗu, pana asuvayali a̱ va̱,

la̱na̱ tsu na irala i va̱ yi a kuyaꞋanka mu.

Isa mu a̱ ubuta̱ wu ukpa̱, Vuzavaguɗu,

14adama a na n cikpa wu,

e kelime ka uma a Sihiyona,

ka̱ta̱ n yaꞋan ma̱za̱nga̱ adama a wishi u nu.

15Uma a̱ ga̱va̱ ta̱ kpenle, ɗa a̱ yikpa̱i punu,

a dasai ayakuru e le,

ɗa ene e le a̱ cila̱i punu.

16Vuzavaguɗu u zuwa ta̱ e yeve ni,

a̱ ubuta̱ u kuyaꞋan ka afada a usuɓi,

uma a gbani-gbani a̱ ka̱na̱i ka̱ci ke le n ka na a yaꞋin.Kuvuka

17Uma a gbani-gbani i ta̱ a̱ gida̱la̱ a kubana asaun e le,

ta feu nannai uduniyan u na u iwain Ka̱shile.

18Makyan dem ɗa a kucinukpa n aza na i a kuciga uɓa̱nki ba,

e kupece vuza vu u unambi n kukeɗe a̱pa̱Ꞌa̱ ba, ko wannai.

19Vuzavaguɗu, ɗa̱nga̱!

adama a na ka̱ta̱ uma a̱ ciya̱ ulyaꞋi wa̱ a̱ nu ba,

yaꞋan a yaꞋanka uma a gbani-gbani afada e kelime ka̱ nu,

20Vuzavaguɗu, zuwa le e jeꞋeke ikyamba adama o wovon.

vu zuwa le e yeve a na e le uma a ɗa koci. Kuvuka