Ishipa 80

Avasa adama kusabaꞋasaka Isaraila

Kadanshi a kubana u vuza vu kelime vi ishipa: A yaꞋan vu ɗa n ka̱la̱ka̱tsu ka Uzuwakpani u apulufa. Vishipa vu Asafa.

1Zuwaka tsu atsuvu,

avu maguɓi mi Isaraila,

avu vu na vu tonoi n kumaci

ku Isufu tsu ushiga.

Avu na vi a̱ ida̱shi a kakuba

ko tsugono ka̱ nu,

a gaɗi vu Corobi vu akana,

2e kelime ka Ifirayimu,

m Bayami m Manasa,

yotsongu utsura u nu

ka̱ ta̱ vu ta̱wa̱ vu wawa tsu.

3Ka̱shile, bonoko tsu,

vu pana asuvayali a̱ tsu,

ka̱ta̱ vu wawa tsu.

4Vuzavaguɗu Ka̱shile MalaꞋimili,

Ali n wannai ɗai va̱ ku ka̱na̱ wupa

n avasa a uma a̱ nu?

5N kujilya ku ɗa vu lyaꞋatangi tsu,

n kujilya ku ɗa vu nekei tsu moko ma̱ mini tsu soꞋi.

6Vu bonokoi tsu ili i vishili

wa aza a na ci ida̱shi ɗeɗevu,

irala i tsu kpamu o ku zoꞋoso tsu.

7Ka̱shile MalaꞋimili, bonoko tsu,

vu pana asuvayali a̱ tsu,

ka̱ta̱ vu wawa tsu.

8Vu utuka̱i uma a̱ nu tsu maɗanga mi itacishi a Masar,

vu lokoi uduniyan

u na wi ida̱shi a KanaꞋana,

ɗa vu shikpa̱i le.

9Ɗa vu lapulakai le ubuta̱ adama a na o gbonguro

aralu a̱ ni a uwai a iɗika ka̱u,

a tatsai a palai ubuta̱ dem a iɗika ya.

10A palai aginda n ululu e le,

a palai nɗanga m gbagbain n Sida n acaka e le.

11Acaka a̱ ni a lazai,

a kubana a mala me mere,

ali a kubana a Mala ma Yufiretu.

12Yiɗa̱i i zuwai ɗa vu ɓosoi

nshilya n na mi uka̱ra̱Ꞌi

n maɗanga mi itacishi ma?

Adama a na irala i ni i na yi a kulaza lo dem

a uwa o boko umaci u ni.

13Njuma mi ta̱ a kudasa le,

nnama n kakamba n takuma le.

14Ka̱shile MalaꞋimili, bono wa̱ tsu,

la̱na̱ku ɗe gaɗi vu ene,

ta̱wa̱ vu wawa kashina ki itacishi ka̱ nu.

15Ta̱wa̱ vu wawa maɗanga mi itacishi ma,

ma na avu n ka̱ci ka̱ nu vu shikpa̱i,

ma na vu ɗa̱ngusa̱i

adama a̱ ka̱ci ka̱ nu.

16Irala i tsu i kapai le i songi le n akina,

vu yaꞋin wupa n ele

vu unai le ra̱ka̱.

17YaꞋan kukiye ku singai ku nu

ku yongo n uma a̱ nu a na vu zagbai,

maku ma vuma ma na vu kumgbasai

adama a̱ ka̱ci ka̱ nu.

18Ci a kukpatala tsu ka̱sukpa̱ wu ba,

neke tsu wuma u savu,

adama a na tsu ɗeke a kula ku nu.

19Ka̱shile MalaꞋimili, bonoko tsu,

vu pana asuvayali a̱ tsu,

ka̱ta̱ vu wawa tsu.