Ishipa 78

Usuɓi u Ka̱shile a uma a̱ ni

VicuꞋu vu tsuwaꞋi tsu Asafa

1Uma a̱ va̱, zuwai atsuvu,

i pana kuyotsongusu ku va̱,

zuwakai n ili i na mi a kudansa.

2Mi ta̱ a kuyaꞋan kadanshi n asan,

n tonuko ɗa̱ ili i na yi usokongi ayin a cau,

3Ili i na tsu panai ɗa kpamu tsu yevei,

ili i na ikaya i tsu i danai tsu.

4Ci o kusokongu ku muku n le i ɗa ba,

ama ci ta̱ a kudana tsukaya tsu na tsa̱ kuta̱wa̱,

Tsugbayin tsu Vuzavaguɗu n ulinga u gbagbaꞋin u ni,

n ili i mereve i na u yaꞋansai.

5U nekei Yakubu ili i kutono

ɗa u zuwai wila̱ a Isaraila,

u na u danai ikaya i tsu,

a piꞋisaka muku n le u ɗa.

6Adama a na ntsukaya n na n kuta̱wa̱ e yeve u ɗa,

ali n muku n na a kumatsa,

e le tamkpamu feu a dana muku n le.

7Adama a na a zuwa a̱ɗu e le u Ka̱shile,

ka̱ta̱ a cinukpa n ulinga u na u yaꞋin ba,

ama a̱ ka̱na̱ kutono kadanshi ka̱ ni,

8Ka̱ta̱ okpo ci ikaya i le ba,

ntsukaya mu ugbamukaci n aza a ugbamiwasuvu,

aza a na e neke Vuzavaguɗu a̱ɗu e le ba,

aza a na a a̱ɗu e le i m ma̱riki u Ka̱shile ba.

9Aza a Ifirayimu, aza a na a uta̱i vishili n ayaꞋa,

a kpatalai a sumai a kanna ko kuvon.

10A shatangu uzuwakpani u le n Ka̱shile ba,

a̱ kpa̱ɗa̱i kutono wila̱ u ni.

11A cinukpai n ulinga u na u yaꞋin,

n ili i mereve i na u yotsongi le dem.

12U yaꞋin ili i mereve a̱ a̱shi a ikaya i le,

a uɓon u Zowan a iɗika i Masar.

13U pecei mala ɗa u tonoi n ele punu,

u zuwai mini ma shamgbai tsu mashilya.

14N kanna ɗa u tonoi n ele n keleshu,

n kayin ka̱ɓula̱ u tonoi n ele n kutashi ka akina.

15U ɓatsai atali e meremune,

ɗa̱ u nekei le mini n a̱bunda̱i tsu mala mu uga̱vi.

16U zuwai nyeneke mu uta̱i a katali,

u zuwai mini ma̱ ka̱na̱i kuyene tsu kuyene.

17Ama ɗa a lyaꞋi kelime

n kuyaꞋanka yi unushi,

a yaꞋankai MalaꞋimili

ugbamiwasuvu ɗe e kakamba.

18N ucigi u ka̱ɗu u le u ɗa o kondoi Ka̱shile,

a na a danai u neke le ilikulyaꞋa i na a cigai.

19A yaꞋankai Ka̱shile kadanshi ka gbani-gbani, a danai,

<<Ko Ka̱shile ki ta̱ o kufoɓuso ka̱ɗiva̱ e meremune?

20Ko ana u lapai katali ɗa mini ma̱ uta̱i gbani,

ɗa mini ma̱ uta̱i n a̱bunda̱i,

ama wi ta̱ kpamu e kuneke tsu ilikulyaꞋa?

Wi ta̱ kpamu a̱ kuciya̱ka̱ uma a̱ ni inyama?>>

21Adama a nannai ana Vuzavaguɗu

u panakai le ɗa u yaꞋin wupa ka̱u,

u suꞋuki uma a Yakubu n akina a usuɗukpi ka̱u,

u va̱sa̱i n wupa wa aza a Isaraila,

22Adama a na ushuku n Ka̱shile ba,

kpamu e neke ka̱ɗu n wishi u ni ba.

23N nannai dem u nekei eleshu kadanshi gaɗi,

ɗa u zuwai le a̱ ɓa̱yuwa̱i utsutsu u gaɗi.

24U tsuwa̱nka̱i le Mana tsu mini a lyaꞋa,

ɗa u nekei le ili i kashina i gaɗi.

25Ɗa a lyaꞋi ilikulyaꞋa ya alingata a̱ Ka̱shile,

Ka̱shile ke nekei le ilikulyaꞋa

n a̱bunda̱i a lyaꞋi ali a̱ cuwa̱i.

26U zuwai wunla̱i u vugula̱i ɗe a kasana,

n utsura u ni ɗa u zuwai wunla̱i

wu uɓonɗakai u ɗa̱nga̱i,

27u tsuwa̱nka̱i le inyama tsu kubuta̱,

nnunu n ciꞋimkpi,

tsu kayala ka̱ iga̱Ꞌin i mala,

28U zuwai le a̱ yikpa̱sa̱i e mere ma̱ ka̱tsura̱ ke le,

uka̱ra̱Ꞌi n a̱pa̱m e le.

29Ɗa uma a takumai ali a̱ cuwa̱i ka̱u,

adama a na u neke le ta̱ ili i na i mali.

30Ama babu a̱ cuwa̱ n ili i na i a mali

i ɗa biꞋi punu a una̱ u le,

31ana Ka̱shile ka panai,

ɗa wupa u ni u va̱sa̱i wa aza a Isaraila,

wu unai uma a utsura a̱ ka̱tsuma̱ ke le,

ɗa u lapai a̱ɗa̱nga̱ni aza a Israila.

32N ili i nampa ra̱ka̱,

a lyaꞋi kelime n kuyaꞋan unushi,

n li i mereve i na u yaꞋin dem,

ushuku n a̱yi ba.

33Ta u zuwai ayin e le o kotsoi nannai gbani,

a̱ya̱ e le okpoi tukpa n atakaci.

34Ana Ka̱shile ka unai aza o yoku,

a̱ shika̱i unushi u le,

a̱ la̱nsa̱i Ka̱shile o bonoi wa̱ ni kpamu.

35A ciɓai a na Ka̱shile kaꞋa ubuta̱ u kusheɗeku u le,

a ciɓai a na Ka̱shile MalaꞋimili maꞋa ka̱shibi ke le.

36Ama ɗa a̱ ya̱nsa̱i ni kadanshi ka̱ una̱ u le,

a kuyaꞋanka yi aꞋuwa n elentsu e le.

37A̱ɗu ele o tono kadanshi ka̱ ni ba,

o tono uzuwakpani u ni ba.

38N nannai dem Ka̱shile ka panai

asuvayali a uma a̱ ni,

u cinukpakai le unushi u le,

ɗa u kpa̱ɗa̱i ku una le,

makyan dem u tsu reme ta̱ ka̱ɗu ka̱ ni,

ka̱ta̱ u vaꞋanka wupa u ni.

39U tsu ciɓa ta̱ ele uma a gbani ɗa i koci,

tsu wunla̱i u na u tsu laza kpamu u tsu bono ba.

40A yaꞋansaka yi ta̱ ugbamiwasuvu e meremune,

a zuwai ni una̱mgbuka̱tsuma̱ a kakamba!

41Makyan dem a̱ ka̱na̱i kukondo Ka̱shile,

ɗa a zuwai vuza ciɗa vi Israila kuyaꞋan wupa.

42A ciɓa n utsura u ni

a ayin a na u shiba̱i le

ekiye a irala i le ba,

43ana u yaꞋin urotu wi ili i mereve a iɗika i Masar,

ili i mereve i na vi yaꞋin a uɓon u Zowan.

44U bonokoi nɗolu n le mo okpoi mpasa,

a fuɗa o soꞋo mini ma nyeneke n le ba.

45U suꞋuki le n ka̱kuma̱ ka ayun ka takacikai le,

opoɗo tamkpamu a̱ la̱nga̱sa̱i iɗika i le.

46U zuwai akyun takumai ucanuku wa ashina e le,

nta̱ɗa̱ma̱ci tamkpamu n la̱nga̱sa̱i ashina e le.

47U la̱nga̱sa̱i ashina a itacishi e le m mini ma atali,

nɗanga mu mbiri n egele.

48Wu unai anaka e le n mini ma atali,

ɗa kpamu wu unai ushiga wu nkyon le,

nu nraɗika n le n akpanga.

49U tsuwa̱nka̱i le n wupa u ni,

asuvu a usuɗukpi,

n una̱mgbuka̱tsuma̱

u zuwai le atakaci,

u suꞋuki le n alingata a munuka.

50U tsuwa̱nka̱i le n wupa u gbani-gbani u ni,

wu ere le a̱ ubuta̱ wu ukpa̱ ba,

ama ɗa wu unai le m ma̱dukpa̱.

51Wu unai muku mu ugiti n ali a masar,

muku mu ugiti,

mu utsura u le a Ham.

52Ɗa wu uta̱i n uma a̱ ni tsu ushiga,

u tonoi n ele tsu nkyon e meremune.

53U tonoi n ele m ma̱ta̱na̱,

adama a na ka̱ta̱ a pana wovon ba,

ama mala ma lyaꞋa ta̱ irala i le.

54U tuka̱i le e kureꞋe ki iɗika i ciɗa,

u tuka̱i le a kusan ku na kukiye

ku utsura ku ni ku lyaꞋi n kuvon.

55U lokoi uduniyan u na wi e kelime ke le,

ɗa u pecekei aza a Isaraila iɗika ya,

yo okpoi ili yi uka̱ni i le,

u zuwai uma a Isaraila

a̱ da̱sa̱ngi punu a iꞋuwa i uma ya.

56Ama ɗa o kondoi Ka̱shile,

a yaꞋankai MalaꞋimili ugbamiwasuvu,

a zuwaka n kadanshi ka̱ ni ba,

57a yaꞋan ili i na i gaꞋin ba,

ci ikaya i le,

i n kamayun ba,

tsu kokondori ka kayaꞋa ka na a taɗuki,

58A zuwai ni u yaꞋin wupa,

adama a nva̱li ma̱ a̱ma̱li e le,

ɗa a zuwai ni cisheꞋe

adama a̱ma̱li e le.

59Ana Ka̱shile ka panakai le,

ɗa u yaꞋin wupa n ele ka̱u,

u iwain aza a Isaraila ra̱ka̱-ra̱ka̱.

60U ka̱sukpa̱i Ma̱va̱li mo oɓolo a Shilo,

a̱ ubuta̱ u na wi a̱ ida̱shi e mere ma uma.

61U ka̱sukpa̱i akpati vu uzuwakpani vu utsura u ni va,

a kubana ugbashi,

u ka̱sukpa̱i tsugbayin ci ni

a kubana wa aza a na a iwain ni.

62U yaꞋan ta̱ wupa n ili yi uka̱ni a̱ ni

ɗa u nekei le e ekiye a irala i le

yi unai le n kotokobi.

63Akina o songi muku mo olobo n le,

nkere tankpamu n nambai ali o ku olo,

64Anan ganu e le a banai ukpa̱ u kotokobi,

agapa a̱ma̱ci e le tana a̱ shika̱ ba.

65Ɗa Vuzavaguɗu u ɗa̱nga̱i,

a danshi wishi ta̱ alavu,

tsu vuza na u jimgbai

n kagimi ku soꞋi u ma̱ra̱.

66U lapai irala i ni,

ɗa okpoi n wono ko wannai.

67Vuzavaguɗu u iwain kefeku ka̱ Isufu,

u zagba kefeku ka̱ Ifirayimu ba.

68Ama ɗa kucikpa u zagbai kefeku ka̱ Yahuda,

kusan ku Sihiyona ku na u cigai ka̱u.

69Ta ɗe u maꞋi A̱Ꞌisa̱ a gbayin a̱ ni,

tsu gaɗi ko wannai,

u maꞋi ku ɗa n utsura

tsu na u shikpa̱i aduniyan ko wannai.

70U zagbai kagbashi ka̱ ni Dawuda,

u ɗikai ni a̱ ubuta̱ u kaguɓa ko nkyon,

71u ta̱wa̱i n a̱yi a̱ ubuta̱ u kaguɓa ko nkyon,

ɗa u zuwai ni maguɓi ma uma a̱ ni a Yakubu,

ɗaɗa Isaraila ili yi uka̱ni i ni

72Dawuda tana u guɓai le

n ka̱ɗu ke te,

n kuyeve kpamu.