Ishipa 73

Katagarda ka tatsu

(Ishp 73--89)

Kasingai ka̱ Ka̱shile

Vishipa vu Asafa.

1Mayun Ka̱shile ki ta̱ a kuyaꞋanka Isaraila kasingai,

wa aza a na a̱ɗu e le i ciɗa.

2Ama mpa n yaꞋan ta̱ ɗevu n kutakpa asuvu,

ali ka̱ɗu ka̱ va̱ ka yaꞋin ɗevu n ku uta̱.

3Adama a na mi ta̱ e cisheꞋe n aza a ugbamukaci,

ɗa baci me enei uma a gbani-gbani a lyaꞋi kelime n kuciya̱ ma̱ta̱na̱.

4A tsu takacika ba,

ikyamba i le yi ta̱ gbaga n utsura.

5A tsu takacika tsu uma a na a buwai ba,

kawuya ka̱ tsu ciya̱ le tsu aza a na buwai ba.

6Adama a nannai ɗa a ɗikai a̱ra̱ɗi okpoi le itali i kuɗeku,

ɗa a zuwai vishili vu okpoi le tsu motogu.

7Ka gbani-gbani ka tsu ta̱ a̱ɗu e le,

kusheshe ku le dem nsata n ɗa.

8O tsu zoꞋoso ta̱ aza o yoku,

ka̱ ta̱ a dansa ka gbani-gbani,

e kusheshe n a̱ra̱ɗi tsu na o kudoro aza o yoku.

9A tsu dansa ta̱ kadanshi ka ishikushi u Ka̱shile ka gaɗi,

Elentsu e le i ta̱ a kadanshi ka̱ a̱ra̱ɗi a ili i na a yaꞋin aduniyan.

10Adama a na uma a̱ Ka̱shile o bono we le,

ushuku n ili i na a dansai.

11A tsu dana ta̱, <<Nini ɗai Ka̱shile ke kuyeve?

MalaꞋimili mi ta̱ e kuyeve?>>

12Ta uma a gbani-gbani i nannai,

makyan dem i n kadama ba,

uciyi u le o kudoku.

13Mayun, gbani ɗa m bonokoi ka̱ɗu ka̱ va̱ ciɗa,

gbani ɗa mu uta̱ka̱i ekiye a̱ va̱.

14Kanna dem mpa e kene kadama,

usana lakam mpa atakaci.

15Ishi baci n dana ta̱, <<Mi ta̱ a kudansa nannai.>> Mi ishi ta̱ a̱ ku vakangu muku n nu.

16Ana n yaꞋin tsu na n kuyaꞋan

adama a na n yeve,

yiɗa̱i i zuwai ɗa uma a gbani-gbani i a kulyaꞋa kelime,

ɗa wo okpoi mu n atakaci ka̱u.

17Ama ana n uwai ubuta̱ u ciɗa u Ka̱shile,

ɗa n yevei ili i na i kuciya̱ uma gbani-gbani.

18Mayun ɗa vi ta̱ a kuzuwa le a̱ ubuta̱ u kederi,

vu zuwai le a̱ yikpa̱i ɗa a̱ kuwa̱i ra̱ka̱.

19GogoꞋo lo ɗa unai le,

wovon u pura̱ngi le n ku te.

20Vuzavaguɗu, i ta̱ o ko okpo tsa alatani,

a na a tsu cinukpa n usana,

tsu na vuza u tsu cinukpa a ɗa u jimgba baci.

21Makyan ma na baci ka̱ɗu ka̱ va̱ ka̱ na̱mgba̱i,

ɗa ka̱ɗu ka̱ va̱ ka̱ ɗa̱nga̱i,

22Ka̱ta̱ yeve a na mpa kalau kaꞋa ko ugboji,

ɗa mo okpoi tsu manama e kelime ka̱ nu.

23N nannai dem mi ta̱ koɓolo n avu makyan dem,

vi ta̱ uɓa̱ni n kukiye ku u singai ku va̱.

24Vi o kutono nu mpa n odoki a̱ nu,

a ukocishi kpamu vi ta̱ a ku isa mu n tsugbayin.

25Avu ɗa mi n a̱yi koci gaɗi,

a na mi n avu, yiɗa̱i kpamu mi a̱ kula̱nsa̱ aduniyan?

26Ikyamba n ka̱ɗu ka̱ va̱,

i ta̱ a kufuɗa ku kuwa̱,

ama Ka̱shile avu ɗa utsura u ka̱ɗu u va̱,

n ili i na mi n i ɗa ko wannai.

27Mayun aza a na i daꞋangi n avu i ta̱ a̱ ku kuwa̱,

vi ta̱ a ku una aza a cishakanlai o kutono a̱ma̱li.

28Ama n tsu va̱,

u laꞋaka mu ta̱ n kugaꞋan n yongo ɗevu n Ka̱shile,

m bonoko ta̱ Vuzavaguɗu Ka̱shile ubuta̱ u kusheɗeku u vu,

adama a na n sala ili i na u yaꞋin ra̱ka̱.