Ishipa 48

Sihiyona likuci i Ka̱shile

Vishipa vu muku n Kora.

1Vuzavaguɗu vuza gbayin ɗa,

u yawa ta̱ a cikpa yi,

a̱ likuci i gbayin Ka̱shile ka̱ tsu,

a kusan ku ciɗa.

2Kusan ku Sihiyona ki ta̱ n ugaɗi,

ili i ma̱za̱nga̱ ma aduniyan ra̱ka̱,

likuci i mogono ma gbayin,

tsu kusan ku uɓon u gaɗi,

ku na ku laꞋi nu mgbayin.

3Ka̱shile ki ta̱ punu a̱ likuci yi nshilya ma,

adama a na a̱yi n ka̱ci ka̱ ni,

ubuta̱ u kusheɗeku u ɗa.

4Ɗa ngono n gbaɓai aci e le,

adama a na a̱ tuka̱ n kuvon a kusan ku Sihiyona.

5Ama a na enei ni,

a̱ rikpa̱i ɗa a yaꞋin mereve,

a panai wovon, ɗa a sumai.

6E jeꞋekei ikyamba,

ɗa a takacikai,

tsu vuka vu na vi a̱ga̱nda̱ a limata.

7Tsu wunla̱i u kasana,

u na u tsu ɓososo antsu a̱ mini a Tarishi.

8Tsu na tsu panai arabali ili i nanlo,

gogo na tana tsu ene ta̱ i ɗa,

a̱ likuci i Ka̱shile ka̱ tsu MalaꞋimili,

wi ta̱ a ku ere likuci ya m ma̱ta̱na̱ ko wannai, Kuvuka

9Ka̱shile, punu A̱Ꞌisa̱ a gbayin a̱ nu,

ci ta̱ a kusheshe ucigi u nu u na u tsu sabaꞋa ba,

10Ka̱shile, tsu na kula ku nu ki,

ucikpi u nu u ka̱ra̱Ꞌa ta̱ aduniyan ra̱ka̱.

Kukiye ku usingai ku nu,

ki ta̱ a kuyaꞋan afada a usuɓi.

11YaꞋan uma a Sihiyona a yaꞋan ma̱za̱nga̱,

likuci i wawaꞋa i Yahuda i yaꞋan ma̱za̱nga̱,

adama afada a usuɓi.

12Banai i ka̱ra̱Ꞌa̱ likuci i Sihiyona,

ka̱ta̱ i kece nshilya mu ugaɗi n ni,

13I la̱na̱ asaka a,

ka̱ta̱ kpamu i coꞋoko n nshilya ma,

adama a na i ciya̱ i na i ku dana,

ntsukaya n ɗa̱ n na n kuta̱wa̱.

14Ta Ka̱shile ka̱ tsu ki nannai,

Ka̱shile ka ko wannai,

vuza na u tsu tono n a̱ tsu ko wannai.