Ishipa 144

Vishipa vu Dawuda.

1Ucikpi u Vuzavaguɗu a̱yi na wi

katali ke kusheɗeku ka̱ va̱

u piꞋisaka mu ta̱ vishili

ɗa u foɓusoi mu adama o kuvon,

2a̱yi ɗa Ka̱shile macigi ma̱ va̱ n ke ere ka̱ va̱

mashilya ma̱ va̱ n kawawi ka̱ va̱,

ma̱ra̱ga̱ ma̱ va̱ ma na

mi a̱ kula̱nsa̱ ubuta̱ u kusheɗeku wa̱ ni,

a̱yi ɗa u zuwai uduniyan o tsugono tsu va̱.

3Vuzavaguɗu, yayi vuma

ali ɗa vi a̱ kula̱na̱ yi?

Maku ma vuma, ali ɗa vi e kusheshe adama a̱ ni?

4Vuma wi ta̱ tsu ayinviki

ayin a̱ ni a kulaza tsu kulu.

5Vuzavaguɗu ɓa̱yuwa̱ gaɗi ka̱ta̱ vu cipa̱,

saꞋawa nsansa i ta̱ a kuyaꞋan ka̱nga̱.

6Zuwa kutashi ku ulaɗi u nu

ku wacuwa irala i nu,

taku ayaꞋa a̱ nu vu zuwa le a wacuwa n ilaɗi.

7Ba̱rukpa̱ kukiye ku nu ɗe gaɗi,

vu uta̱ka̱ mu a̱ mini u uga̱vi,

vu isa mu e ekiye omoci.

8Aza a na una̱ u le

u tsu dansa ukuna u mayun ba,

a ci yaꞋan ta̱ akucina aꞋuwa. 9Ka̱shile ka̱ va̱ mi ta̱

a kucanana vishipa vu savu wa̱ nu,

n umolu u aꞋin kupa,

mi ta̱ a kucanana ka wu ishipa i kucikpa,

10avu na vu ci neke ngono ulyaꞋi,

vuza na u wawai kagbashi ka̱ ni Dawuda.

o kotokobi ka munuka.

11Uta̱ka̱ mu, vi isa mu

e ekiye o omoci,

ele na a ci yaꞋan kucina aꞋuwa.

12Zuwa muku mo olobo n tsu

okpo tsu nɗanga n na

mi o kugbonguro gogoꞋo lo,

muku mu nkere n tsu mo okpo

tsa ashamkpatsu a na a yaꞋin

adama e kefeku ko mogono,

13Zuwa mpon n tsu n shana,

n ili ya ashina ra̱ka̱.

Zuwa nkyon n tsu n yimkpa,

ushiga a̱ a̱kpa̱n-a̱kpa̱n a shana,

a̱ ubuta̱ u kaguɓa u tsu.

14Zuwa anaka a̱ tsu a matsa n a̱bunda̱i,

ka̱ta̱ a̱tsuma̱ a̱ tsuwa̱n le ko a̱ puwa̱nka̱ ba,

ka̱ta̱ a pana ma̱shi ma̱

una̱mgbuka̱tsuma̱ wa̱ tsu ba.

15Aza a una̱singai a ɗa

ele na a̱ ciya̱i ka nampa ka

aza a una̱singai a ɗa uma a na Ka̱shile ke le kaꞋa Vuzavaguɗu.