Ishipa 132

Vishipa adama a̱ likuci i Dawuda

Vishipa vu kugaɗukpa a kubana a̱ ubuta̱ wa̱ a̱ga̱nda̱.

1Vuzavaguɗu,

ciɓa n Dawuda,

n tsu na u lulukpa̱i a̱ ka̱tsuma̱ ka atakaci a̱ ni.

2Ciɓa n tsu na u kucinakai Vuzavaguɗu,

n akucina a̱ ni u MalaꞋimili ma Yakubu, u danai,

3<<Mpa mi a kubana a kpaꞋa ba,

ko n vaku a kajiba ka̱ va̱ ba,

4mi a̱ ku ka̱sukpa̱ a̱shi a̱ va̱ a̱ yimba̱tsa̱ka̱ ba,

mi e kuneke a̱ga̱la̱ a̱shi a̱ va̱ wuvuki ba,

5ali n la̱nsa̱ka̱ Vuzavaguɗu ubuta̱,

ubuta̱ wi ida̱shi adama a MalaꞋimili ma Yakubu.>>

6Ɗanna tsu panai arabali, a danai,

akpati vu uzuwakpani vi ta̱ a Efarata,

ɗa ci cinai vu ɗa a̱pula̱ka̱ a Kiriyatu-jerimu.

7Ɗa tsu danai,

<<YaꞋan tsu bana a̱ ubuta̱ wi ida̱shi i Vuzavaguɗu,

yaꞋan tsu kuɗa̱ngu e kelime ka̱ ni.>>

8Vuzavaguɗu,

ɗa̱nga̱ vu bana ubuta̱ u kuvuka u nu,

avu n akpati vu uzuwakpani a utsura a̱ nu.

9YaꞋan anan ganu a̱ nu

a yaꞋan ukuna wu usuɓi,

YaꞋan ncigi n nu

n ɗa̱ngusa̱ a̱la̱ka̱tsu

a canana ishipa i ma̱za̱nga̱.

10Adama a kagbashi ka̱ nu Dawuda,

ka̱ ta̱ vu kpatala a̱shi a̱ nu

u vuza na vu erengi ba.

11Vuzavaguɗu u yaꞋanka ta̱ Dawuda

uzuwakpani u ma̱riki,

uzuwakpani u na u kukotso ba, u danai,

<<Vuza te a̱ ka̱tsuma̱ ka̱ muku mo olobo n nu,

ɗa n kuzuwa a kakuba ko tsugono tsu nu.

12Ɗa baci muku mo olobo n nu

n tonoi uzuwakpani u va̱,

n kadanshi ka̱ va̱ ka na m piꞋisakai le,

muku mo olobo ma feu

i ta̱ a kuda̱sa̱ngu

a kakuba ko tsugono tsu nu ko wannai.>>

13Adama a na Vuzavaguɗu

u zagba ta̱ Sihiyona,

u yaꞋin mali ma na wo okpo yi

ubuta̱ wi ida̱shi i ni.

14U danai,

<<Na va kpaꞋa ku kuvuka ku va̱ ku ɗa ko wannai,

ta punu ma ku da̱sa̱ngu

adama a na mi ta̱ a mali ma ku ɗa.

15Mi ta̱ a kuzuwaka Sihiyona una̱singai n ili ba̱ri

aza a unambi i ta̱ a̱ kucuwa̱ n ilikulyaꞋa.

16Mi ta̱ a kuzuwa anan Ganu a̱ ni a dana,

mi ta̱ a ku wawa uma

uma a̱ va̱ kpamu i ta̱ a kucanana ishipa,

a̱ ɗa̱ngusa̱ a̱la̱ka̱tsu e le adama a̱ ma̱za̱nga̱.

17Ta punu n kuzuwa vuza te

a̱ ka̱tsuma̱ ka ntsukaya n Dawuda

wo okpo mogono ma gbayin,

ta punu kpamu n kuzuwa tsugono tsu mazagbi

ci lyaꞋa kelime ko wannai.

18Mi ta̱ a kuzuwa irala i ni yi okpo n wono,

ama tsugono ci ni ci ta̱

a kulyaꞋa kelime ci shamgba mayin.>>