Ishipa 124

Ka̱shile kaꞋa kawawi ka uma a̱ ni

Vishipa vu kugaɗukpa a kubana a̱ ubuta̱ wa̱ a̱ga̱nda̱. Vishipa vu Dawuda.

1Ishi baci Vuzavaguɗu wi koɓolo n a̱tsu ba,

yiɗa̱i yi ishi a̱ kuciya̱ tsu?

YaꞋan Isaraila a dana.

2Ishi baci Vuzavaguɗu wi koɓolo n a̱tsu ba,

ana uma a̱ tuka̱i tsu n vishili,

3ishi o kusoɗongu tsu n wuma

a makyan ma nanlo,

adama asuvusuɗukpi a na i a kuyaꞋan n a̱tsu.

4Ishi a̱ kupura̱ngu tsu n wupa tsu mini ma na ma ayai,

mini ma, mi ishi a kulyaꞋa tsu,

5mini mi ilaɗi mi ishi a kulyaꞋa tsu ra̱ka̱.

6Ucikpi u Vuzavaguɗu,

ana u ka̱sukpa̱i irala i tsu i lyaꞋi tsu ba.

7Tsu laꞋakai tsu manunu a maza ma vuza kutambu,

maza ma, ma kasai ɗa tsu laꞋakai.

8Uɓa̱nki u tsu wi ta̱ a̱ ku uta̱ u Vuzavaguɗu,

a̱yi na u yaꞋin gaɗi n iɗika.