Ishipa 103:12

Vishipa vu ucikpi adama kasingai ka̱ Ka̱shile

Vishipa vu Dawuda

1Cikpa Vuzavaguɗu, ka̱ɗu ka̱ va̱.

Ili ra̱ka̱ i na yi a̱ ka̱tsuma̱ ka̱ va̱,

cikpai kula ku ciɗa ku ni.

2Cikpa Vuzavaguɗu, ka̱ɗu ka̱ va̱,

ka̱ta̱ vu cinukpa n kasingai ka̱ ni ba.

3A̱yi ɗa vuza na u kucinukpa nu unushi u nu dem,

a̱yi ɗa vuza na u kupotsotongu m mɓa̱la̱ n nu dem.

4A̱yi ɗa vuza na wa̱ kushiba̱ wuma u nu e kpenle ku ukpa̱,

ka̱ta̱ u kala wu nu ucigi

u na u tsu sabaꞋa n asuvayali a̱ ni.

5A̱yi ɗa vuza na wa ku cuwa̱ta̱ngu wu

n ili i singai,

adama a na a sabaꞋa tsuloboi tsu nu

tsu kajimba.

6Vuzavaguɗu u ci yaꞋan ta̱ kasingai,

ka̱ta̱ u ɓa̱nka̱ aza a na o doroi.

7U yotsongu ta̱ Musa uye u ni dem,

ulinga u ni kpamu wa aza a Isaraila.

8Vuzavaguɗu vuza va asuvayali a ɗa

vuza kasingai ɗa,

u tsu yaꞋan wupa gogoꞋo ba,

wi ta̱ tukpa n ucigi u na u tsu sabaꞋa ba.

9U tsu ɓarangu ayin tutu ba,

kpamu u tsu zuwa wupa u ni u yongo ali ayin ko wannai ba.

10U tsu takacika tsu

tsu unushi u tsu ba,

kpamu u ci yaꞋan katsupu derere vu unushi tsu ba.

11Tsu na gaɗi wi daꞋangi n iɗika,

ta ka̱bunda̱i ku ucigi u ni u na u tsu sabaꞋa wi nannai

wa aza a na i a kupana wovon u ni.

12Uteku tsu na kasana

ki daꞋangi n ka̱livi,

ta u takpai unushi u tsu nannai wa̱ a̱ tsu.

13Uteku u na kesheku

ka tsu pana asuvayali a̱ muku ni,

ta feu Vuzavaguɗu u tsu pana asuvayali

a uma a na a tsu pana wovon u ni nannai.

14Adama a na a̱yi u yeve ta̱ tsu na a yaꞋin tsu,

ɗa kpamu wi a kuciɓaka tsu an a̱tsu kubuta̱ ku ɗa.

15Vuma dem,

wuma u ni wi ta̱ tsu mita̱,

u tsu gbonguro ta̱ u yentukpe an a̱pa̱lu a kakamba,

16ka̱ta̱ a̱ sa̱ruwa̱ ɗa baci wunla̱i u fabai le,

ka̱ta̱ a cinukpa n ubuta̱ u na ishi.

17Ama ucigi u Vuzavaguɗu u na u tsu sabaꞋa ba

wi n ugiti ba wi n ukocishi ba

wa aza a na i a kupana wovon u ni,

usuɓi u ni wi ta̱ o kuyongo

a tsukaya n tsukaya,

18koɓolo n aza a na i o kutono kadanshi ka̱ ni,

n aza a na a tsu ciɓa kutono wila̱ u ni.

19Vuzavaguɗu u shikpa̱ ta̱

kakuba ko tsugono ci ni gaɗi,

tsugono ci ni kpamu

a gaɗi vi ili dem.

20Cikpai Vuzavaguɗu, a̱ɗa̱ alingata a̱ ni,

a̱ɗa̱ aza a utsura, a na yu ushuki n kadanshi ka̱ ni.

21Cikpai Vuzavaguɗu

a̱ɗa̱ ili i wuma i gaɗi ra̱ka̱,

a̱ɗa̱ na yi a̱ kuga̱nda̱ka̱ yi,

ɗa yi o kutono kadanshi ka̱ ni.

22Cikpai Vuzavaguɗu

a̱ɗa̱ ili i wuma

a̱ ubuta̱ u tsugono ci ni dem.

Cikpa Vuzavaguɗu, avu ka̱ɗu ka̱ va̱.