Rô-ma 9

1Ănh nhai nhâng sŭng Siđăch Yơt Dưnya, ănh đăng nhai mvâr — nuih talaq ănh ôp candân an ănh sŭng Siđăch Wênh — 2pành bây ănh, gĕh sinlơ si-yưr nuih măq nggâm sinlơ jicôr đăng la-ŏh sŭng nuih talaq ănh. 3Mvăc ănh ngwân cơnh nơm ănh vlam sinlơ raq pandai, paklăh ntrăch a Siđăch Yơt Dưnya payh ơ pôp ŏh ur klô ănh je, cồ khây tamun tăm mơch bây ănh sĭq ndăl rup swan; 4nơm khây nĕh cồ văl I-sơ-ra-ên, cồ khây vrŭq sĭq ndăl khây nĕh nŏq cồ gatŭq ôp con tê, sindraq sindil, khây sinlơ tăm lăp ti, vrŭq paq an ravwŏq, sinlơ cŭh sưmvăh, nggâm khây camvŭm pănggân; 5khây nĕh lŭh a khây cô jây, bây Siđăch Yơt Dưnya lŭh a khây nĕh — (nŏq cồ bây rup swan) — Siđăch cồ Candranh măq prĭh vlơ lĕq, nŏq cồ Siđăch Trôq nhâng wŏq gĕh sinlơ payom tapơ tât wân lawân. A-men.

6En đăng gĕh vrŭq pành camvŭm Siđăch Trôq pachĕq prơn camhlăng. Mvăc đăng gal lĕq săq khây vu lây cồ lŭh a I-sơ-ra-ên, pành nŏq cồ tamun I-sơ-ra-ên. 7Khoi đăng gal lĕq săq con sinau pành cồ nggơih njang Ap-ra-ham. Nŏq cồ, “Payh ơ I-sac, nggơih njang con de gĕh cuôl săq.” 8Nŏq cồ con sinau bây săq swan, khây nĕh nŏq đăng gal khây con Siđăch Trôq de. Palâq sĭq vlâq, con sinau camvŭm pănggân de nŏq gĕh sên dân ca nggơih njang en. 9Mvăc heq cồ camvŭm pănggân: “Sŭng sŏng vadâq heq, Ănh tât, bây nhâng gĕh du lâm con klô chĕq ân an Sa-ra.” 10En đăng gal ayh canŏq ngăn, en Rê-bê-ca khoi canŏq lăm rŏh vŭn payh a du mvu, cồ I-sac, cô jây vơn de — 11mvăc sŭng lăm con ndŏh gĕh dĕh lŭh, khoi ndŏh ôp vrŭq yăh ha vrŭq viêm lây, chĕq an nuih cơnh Siđăch Trôq de dăh bây sinlơ săch sŏq Siđăch de gĕh jơ gân, 12đăng gal a vrŭq ôp, nŏq cồ a Candranh cuôl panh — sinlơ cồ gĕh an un dân gưt, nŏq pành: “Lâm cồ măq ôp dĭch an lâm ken.” 13Dân ca camvŭm cồ gĕh chêr: “Ănh sinđach Ya-côp, en Ănh ncom Ê-sau.”

14Canŏq, vơn nhai canŏq caheq? Gĕh sinlơ đăng yăh sŏng u Siđăch Trôq hàh? Vrŭq nŏq đăng sẫy lŭh gĕh. 15Mvăc Siđăch nhai bây Môi-se, pành: “Ănh gĕh pơq nuih yăh la-êr payh bây vu lây cồ Ănh cơnh pơq nuih yăh la-êr, bây Ănh sinđach payh vu lây cồ Ănh cơnh sinđach.” 16Payh canŏq đăng gal pành ơ vu lây ngwân cơnh, khoi đăng gal payh ơ vu lây pĭh păh lôt vôq lôt lưr, en ayh payh ơ Siđăch Trôq ngăn, cồ Candranh pơq nuih talaq sinđach. 17Mvăc Sirăq Gŭn nhai sĭq Pha-ra-ôn pành: “Mvăc payh ơ vrŭq heq Ănh iơq may hao, chĕq ju may Ănh an vu sây prơn gŭn Ănh je, bây chĕq payh an săq Ănh gĕh nhai lŭh lam vlơ play ntĕh.” 18Payh canŏq, Siđăch pơq nuih talaq yăh la-êr an vu lây cồ Nĕh cơnh, en Siđăch ôp kranh nuih talaq vu lây cồ Nĕh cơnh.

19Canŏq pôp ŏh ur klô nhai bây ănh: “Nŏq, lŭh Siđăch gât chih lăh diêt? Mvăc gĕh vu lây tăm chŏl vlâq bây nuih cơnh Siđăch de gĕh?” 20Heq tamun tĭq, cồ sŏng bây deng sên pôp ade vu lây thêng cammlăh Siđăch Trôq? Phưt nphŏng păch gĕh răq panjêng tôq nhai bây tamun răq lŭh nơm: “Lŭh cô răq lŭh ănh vaih cồ caheq” tŏng? 21Ha pành tamun păt răq ntĕh uq đăng gĕh kwiềng vlơ ntĕh uq, chĕq ôp lŭh du păch lây gĕh don sŏq simơ a du rămvŭq ntĕh nŏq, payh cồ păch heq chĕq an vrŭq rom yăh, en păch tĭq chĕq an vrŭq dêh can'hâm? 22En hê Siđăch Trôq, mvăc cơnh chĕq vu sây sinlơ măq nuih Nĕh de nggâm chĕq pri lŭh prơn gŭn Nĕh de, gĕh wŏq vadâng sŭng sinlơ mbêr nuih măq mi sĭq bây khây păch lây gĕh don chĕq an sinlơ măq nuih, gĕh sŭmmrăp sindăc an sinlơ chưt lawăch; 23bây chĕq Siđăch pơq lŭh an sây sinlơ gan'hăp jina sindraq sindil Nĕh de vlơ khây păch don chĕq an sinlơ sinđach cồ Siđăch gĕh sŭmmrăp sindăc an sinlơ sindraq sindil — 24payh sŏng cồ vơn heq cồ khây tamun gĕh Siđăch cuôl, đăng gal ayh a tamun Yo Thai, en hôm a khây văl daq aling, nŏq vồh? 25Dân ca Siđăch khoi gĕh nhai sŭng sirăq Ô-sê, pành:

“Ănh cuôl tamun cồ đăng gal văl Ănh, cồ ‘văl Ănh’,

bây tamun cồ đăng gĕh sinđach pành ‘tamun sinđach’.

26En vrŭq gĕh tât u gatŭq cồ camvŭm gĕh nhai an khây nĕh, pành: ‘Khamay đăng gal cồ văl Ănh’,

en sŏng gatŭq nŏq, khây nĕh nhâng gĕh cuôl panh ‘khây con klô Siđăch Trôq hôm rĭh.’”

27Nhâng Ê-sai cuôl hao sĭq văl I-sơ-ra-ên, pành:

“Cồ khây con sinau văl I-sơ-ra-ên de gĕh gŏq săq ca chwŏh daq lênh,

en ayh du takiq hôm tarŏh sĭq vlâq gĕh yơt,

28mvăc Siđăch ôp jêng camvŭm Nĕh de vlơ ntĕh, ôp chhŏng en bây jăc sô.”

29Bây dân ca Ê-sai gĕh nhai lor:

“Hê Siđăch khây mintan congti de đăng chĕq sĭq vlâq an vơn du sinwăch sinwe,

nŏq payh vơn mŏh lăq jêng gayh dân ca palây Sô-đôm,

bây nhâng mŏh lăq vlam ôp an dân ca palây Gô-mô-rơ èn.”

30Nŏq, vơn nhai canŏq caheq? Nŏq cồ khây văl daq aling, cồ khây tamun đăng dăh ndap bây sinlơ yăh sŏng, nŏq wơt tât gĕh sinlơ yăh sŏng, en sinlơ yăh sŏng nŏq payh ơ sinlơ tôq camvân. 31En hôm văl I-sơ-ra-ên, lăm dăh ndap ravwŏq sinlơ yăh sŏng de, nŏq đăng wơt tât ravwŏq nŏq gĕh. 32Di tơm vrŭq lây nŏq? Nŏq cồ pành di tơm a vrŭq đăng don sinlơ tôq camvân, en ayh don vrŭq ôp. Khây nĕh tachơn jâng lăp tamô khăq king, 33dân ca gĕh chêr:

“Căh sên heq, Ănh chĕq u Si-ôn du côq tamô sinlơ khăq king de nggâm tamô đar sĭq vrŭq tachơn tajŏh,

vu lây tôq u tamô nŏq đăng prênh haih.”