Hê-bơ-rơ 12:1

1Mvăc canŏq nhâng pành, sŭng lăm gĕh du garwang tŭq măq gŏq săq tamun candân gŭq rawênh nơm, nŏq khây vơn, alưr lăm hwât tagayh lĕq khây sinlơ canjâq njơng nggâm bưn bap cồ khăq king khwŏq takêp, en khoi lăp sŭng tanrong mprăng dăh ndap cồ gĕh chĕq sindăc u vôq măt vơn bây sinlơ mbêr nuih, 2chĕq pănggrop măt deng lăp Siđăch Yêsu, Candranh Sun Tatao bây Candranh Ôp Jêng Lôch sinlơ tôq camvân, cồ Candranh payh u sinlơ hơn yăh chĕq u vôq măt nơm chĕq wŏq sŏq chhơ pagăn, sên dêh sinlơ gơm sâh, nggâm bây Siđăch gĕh gŭq a dăl ma ganwâr Siđăch Trôq. 3Căh mrŏng mrŏng sinâng tât Candranh gĕh wŏq sinlơ tăm chŏl dâng canŏq payh a khây tamun bưn bap dăh sĭq khây nĕh, chĕq pôp ŏh đăng vuyh n'hyoq sŭng nuih talaq nơm, têch tât sinlơ vông takhlĭh.

4Pôp ŏh ndŏh tăm chŏl tât daq tapinh n'ham lăm tăm klŏq chŏl vlâq bưn bap, 5cồ pôp ŏh nhâng hŭch tôr lĕq sinlơ pân tacăh, cồ camvŭm pađau tămti pôp ŏh dân ca con, pành:

“Ơ con ănh je, vâng sên nkhơch sinlơ lăh pađau Siđăch de,

khoi vâng vông tôr lăm Siđăch chih lăh;

6Mvăc tamun Siđăch sinđach, nŏq Siđăch lăh vât,

bây Nĕh pâm ăp ndu con cồ Nĕh wŏq sŏq.”

7Pôp ŏh nhâng wŏq vadâng sŭng sinlơ lăh pađau; nŏq cồ Siđăch Trôq chĭh nhai bây pôp ŏh dân ca con. Mvăc tamun con lây cồ vap đăng chih pâm? 8Cồ canŏq hê pôp ŏh đăng wŏq sinlơ chih lăh, cồ sinlơ lĕq săq ŏh con gĕh jêng khây tamun wŏq simơ, canŏq pôp ŏh cồ khây ŏh con vôq vri, đăng gal cồ khây con nhâng. 9Dông wŏq, vơn gĕh khây vap săq swan nơm de, dân ca tamun lăh pađau, bây vơn nhâng iêt tôq; en sĭq bây Vap maq wênh nggui, cồ đăng gal vơn tôq phŭng gŏq dông wŏq, bây vơn nhâng cồ pành gĕh rĭh vồh? 10Mvăc cồ vap sĭq maq săq swan lăh pađau vơn sŭng takiq năr bây vrŭq dân cồ pành yăh vlơ lĕq sĭq bây khây nĕh, en hôm cồ Vap maq wênh nggui lăh pađau payh ơ văt tât sinlơ tuyh twơ an vơn, chĕq tăm lăp ti sŭng sinlơ soch jrŏh Siđăch de. 11Payh cồ ăp sinlơ lăh pađau sŭng lăm sẫy lŭh đăng gĕh păch lây cồ sinlơ yăh vui, palâq sĭq vlâq ayh cồ ji côr, cồ canŏq sĭq alưr heq, vrŭq nŏq dĕh lŭh play yăh iên sinlơ sŏng yăh de an khây vu lây gĕh trui vŭh don u nĕh. 12Payh canŏq, căh tatao sĭq vlâq khây lapăng ti cồ lavăn tayưr bây khây vôq nkrŭng cồ can'hyo la'ngây, 13bây căh ôp di sŏng khây trong saq an jâng pôp ŏh, chĕq tamun cannwe đăng chơh vlam wil tih trong tanrong, en ala lăp nŏq pành gĕh ranăm yăh.

14Căh dăh ndap sinlơ tăm yăh iên bây ăp ndu, nggâm jêng yăh soch, pành hê đăng gĕh vrŭq heq nŏq đăng vu lây gĕh deng sây Siđăch, 15wŏq nhŭp vrŭq chĕq măt jơ sên di yăh, phŭng vu lây nŏq swâp ntrăch a sinăc yăh Siđăch Trôq de, phŭng pành diyĕh tăng lây nŏq hon hao ôp minsôc minsac, bây gŏq ndu tăm têp chhŭq chhau payh ơ nĕh, 16phŭng vu lây nŏq cani camăn ha đăng tul cơnh dân ca Ê-sau, cồ tamun payh ơ tăm pagâl sŏq du păch sa lŭh tăch kwiềng con klô măq nơm de. 17Mvăc pôp ŏh gưt pành tât daq alưr nŏq, lăm ngwân cơnh wŏq sinlơ yăh, nŏq nĕh bị hwât lŭh, mvăc nĕh đăng wŏng gĕh vadâq lây chĕq palâq vôq, cồ pành gĕh wŏng miêng sinlơ yăh nŏq simơ bây daq măt.

18Mvăc pôp ŏh payh đăng tât mơch bây vrŭq gĕh prơn tagoq lăp gĕh, bây ŭnh ngit lahưp, bây nhung jingo, bây sinlơ tĭq tưl, nggâm bây chhal mvrông 19nggâm bây camvŭm nggôr tale de, nggâm bây mŭnh khây camvŭm de cồ khây tamun chăng ayh ngwân wĭnh chĕq khây nĕh đăng iêt chăng du camvŭm lây wŏq 20Mvăc khây nĕh đăng wŏq truh camvŭm gĕh pân, pành: “Hê con gŏng lây tât daq ayh tagoq lăp gŭng, nĕh nŏq chơh vlam hwât mô.” 21En sinlơ păng gui gĕh pơq lŭh nŏq taphlat nuih tôr tât daq Môi-se gĕh nhai: “Ănh phŭng candŭh bây râm săq.” 22Cồ canŏq, pôp ŏh gĕh tât Gŭng Si-ôn bây palây Siđăch Trôq lawân hôm mrĭh, bây Yê-ru-sa-lem gŭn gayh, bây a ravu tamơn con gŭn, bây sinlơ vatom măq mi, 23bây vatom gŭn khây con jibong de cồ gĕh chêr săq vlơ khây tăp trôq, bây Siđăch Trôq cồ Candranh Ôp Dôih ăp ndu de, bây khây wênh tamun sŏng yăh de cồ gĕh ôp an vênh lôch, 24bây Siđăch Yêsu, Candranh Vlăc Canđal tăm lăp ti me de, nggâm bây n'ham sŭng sinlơ vrŏh lŭh gĕh camvŭm nhai camhlăng dông wĕh bây A-bên. 25Căh jơ sên, phŭng pôp ŏh đăng wŏq Candranh cồ nhai pađau. Mvăc hê khây tamun tĭq cồ đăng ntrăch gĕh alưr lăm đăng wŏq tamun pân tacăh nơm u ntĕh heq, nŏq vơn vaih cồ viêm gŏq dông, lăm cồ tamun pale ncơi bây Candranh lŭh a trôq, 26cồ camvŭm Candranh nŏq de ôp ntĕh lănggưn sŭng vadâq nŏq, en vrêq heq Siđăch gĕh pănggân pành: “Du dâq wŏq nơm Ănh ôp lănggưn, đăng gal ayh ntĕh, cồ lawân tăp trôq.” 27En vau camvŭm “Du dâq wŏq” pađau dân vrŭq hwât tabayh khây sinlơ cồ lănggưn, dân ca khây păch cồ gĕh sun lŭh, chĕq an khây vrŭq đăng hôm lănggưn gĕh prơn hôm sĭq vlâq. 28Payh canŏq, vơn căh gĕh nuih talaq gưt may mo lăm wŏq sŏq du daq gŭn đăng lănggưn, chĕq don ju nŏq vơn cŭh sưmvăh bây tanrong ôp rom nuih Siđăch Trôq, bây nuih tôr iơq prĭh nggâm phŭng candŭh, 29mvăc Siđăch Trôq vơn de cồ vông ŭnh sŏh roq.