Ga-la-ti 2

1En diêt alưr mât puôn mva, ănh saq hao tât Yê-ru-sa-lem bây Ba-na-ba wŏq, gĕh dâq khoi têch Tit saq bây. 2En avrêq, bây sinlơ pơq an sây, ănh gĕh saq hao bây nhai lŭh u vôq măt khây nĕh Sipơp Yăh cồ ănh yảng pađau sŭng ăp văl daq aling, nŏq khoi gĕh nhai sưt an khây tamun văt vôq, heq gĕh vrŭq lây nggưt nŏq nơm ănh gĕh saq mprăng ha lăq mprăng vâq vâq ngăn. 3An canŏq, sên ca Tit, tamun saq simơ bây ănh, cồ tamun Hi Lap, khoi đăng gĕh nhŭp chit ntô. 4Nŏq vrŭq nŏq cồ don a khây pôp ŏh palôm tăm pôn, cồ khây tamun gĕh saq lăp sŭng glăm chĕq sên cŏch sinlơ saq lahông khananh de, cồ sinlơ saq lahông cồ khananh gĕh sŭng Candranh Krit Yêsu, chĕq an khây nĕh nhâng cơnh nhŭp khananh ôp dĭch, 5nŏq khananh khoi đăng dơp lŭh sinlơ gŭq krap u vôq măt khây nĕh sŭng du măt lây nŏq, chĕq sinlơ dip gal Sipơp Yăh de gĕh kram gajăp wân bây pôp ŏh. 6Hôm sĭq maq khây tamun sên dân ca tamun ôp măq lây nŏq (an cồ lor heq khây nĕh gĕh ôp păch lây nggưt, nŏq đăng ôp tabaq lây tât ănh; Siđăch Trôq đăng gĕh sên u ling con tamun) — nhâng, khây tamun sên ca măq prĭh nŏq đăng ôp an gŏq dông păch lây an ănh iưn lĕq. 7Nŏq palâq sĭq vlâq, lăm đom gưt pành ănh gĕh pađăr an vrŭq nhai lŭh Sipơp Yăh an tamun ndŏh gĕh chit ntô, dân ca Phi-e-rơ cồ chĕq an tamun gĕh chit ntô 8(mvăc Candranh ôp vrŭq sŭng Phi-e-rơ chĕq ôp vrŭq con tuyh tămhơch tât tamun gĕh chit ntô, khoi ôp vrŭq sŭng ănh tămhơch tât tamun daq aling), 9en alưr lăm gưt gĕh sinlơ yăh an ngăn gĕh paq an ănh, nŏq Ya-cơ, Sê-pha, bây Yăng, cồ khây tamun dân ca cồ khây pông jrŏng, gĕh dơp ti ma tăm lăp ti bây Ba-na-ba nggâm ănh, chĕq khananh tămhơch tât khây văl daq aling, hôm khây nĕh tămhơch sĭq khây tamun gĕh chit ntô, 10ayh pân pành khananh uĕh căh tôr tât tamun lŏh sat, nŏq cồ vrŭq chĕq ănh khoi gĕh dŭh dăh chĕq ôp.

11Nŏq lăm a Sê-pha saq tât An-ti-ôt nŏq ănh gĕh tăm chŏl u vôq măt nĕh mvăc nĕh nhâng căh vlam chih lăh. 12Mvăc lor lăm khây tamun a Ya-cơ tât, nĕh gĕh gŭq sa simơ bây khây tamun daq aling. En lăm khây tamun nŏq tât, nĕh saq lŭh ling bây diêr ntrăch nơm tŭq nŏq, mvăc phŭng khây tamun cồ sĭq maq tamun gĕh chit ntô. 13Bây khây tamun Yo-thai hôm sĭq vlâq khoi saq du tanrong mvâr palôm bây nĕh, tât daq đé Ba-na-ba khoi vlam sinlơ têch văt bây tanrong mvâr palôm khây nĕh de. 14Nŏq lăm ănh sây pành khây nĕh đăng gŭq saq dip gal bây ravwŏq Sipơp Yăh de, ănh gĕh nhai bây Sê-pha u vôq măt pôp ŏh: “Hê pôp, cồ tamun Yo-thai, hôm mrĭh dân ca văl aling nŏq đăng dân ca tamun Yo-thai, nŏq mŏq pôp săng văl aling hôm mrĭh dân ca văl Yo-thai, di gĕh?” 15Khananh cồ tamun Yo-thai a me dĕh lŭh en, nŏq đăng gal tamun bưn bap lŭh a tamun văl daq aling; 16Nŏq mvăc gưt pành đăng gĕh du mvu lây gĕh cuôl yăh sŏng don a vrŭq ôp bây ravwŏq, ayh cồ don a sinlơ tôq u Candranh Krit Yêsu, nŏq khananh gĕh nuih talaq tôq u Candranh Krit Yêsu, chĕq khananh gĕh cuôl yăh sŏng don a sinlơ tôq u Candranh Krit nŏq đăng gal don a vrŭq ôp bây ravwŏq. Mvăc ăp săq swan nŏq đăng gĕh cuôl yăh sŏng don vrŭq ôp bây ravwŏq. 17Nŏq hê, lăm saq wŏng trong chĕq gĕh cuôl yăh sŏng sŭng Candranh Krit, đé khananh khoi gĕh vu sây cồ tamun bưn bap, nŏq gĕh gal Candranh Krit cồ tamun ôp vrŭq an bưn bap hẩng? Vrŭq nŏq cồ đăng gal canŏq uy! 18Mvăc hê ănh tatao sĭq vlâq ăp sinlơ cồ ănh gĕh pâm tayaih, nŏq ănh an vu gưt ănh cồ tamun ôp tih ravwŏq. 19Payh don ju ravwŏq, ănh gĕh chưt bây ravwŏq en, chĕq ănh di gĕh hôm mrĭh an siđăch Trôq. Ănh gĕh pâng jimâng lăp chhơ pagăn bây Candranh Krit, 20an cồ ănh đăng hôm rĭh wŏq, nŏq Candranh Krit rĭh sŭng ănh. Hôm sinlơ rĭh cồ ănh gĕh rĭh sŭng rup swan heq, nŏq ănh rĭh sŭng sinlơ tôq u Con Siđăch Trôq, Candranh gĕh sinđach ănh nggâm vŭh nơm Nĕh ala an ănh. 21Ănh đăng hwât chĕq sinlơ yăh an ngăn Siđăch Trôq de uy, mvăc hê sinlơ yăh sŏng cồ don a ravwŏq, canŏq Candranh Krit gĕh chưt nhâng đăng lŭh păch lây.