1 Ti-mô-thê 4:12

1Siđăch Wênh nhai dân lŭng pành sŭng dâq nggơih alưr heq, gŏq ndu paklăh hwât sinlơ tôq camvân, mprăng ndap bây khây yang ravang mvâr tagat nggâm sipơp chaq camhôch, 2mvăc sinlơ mvâr mviq khây tamun mvâr, con tamun sŭng glăm khây nĕh nŏq nĕh lăq kranh en, 3lăm pâh đăng an vu tăm sai, đôq krêng lĕq khây păch sa cồ Siđăch Trôq gĕh sun tatao chĕq wŏq bây nuih talaq gưt may mo don tamun tôq camvân bây đom gưt sinlơ dip gal. 4Mvăc ăp sinlơ Siđăch Trôq sun lŭh ayh yăh ngăn, bây đăng gĕh păch lây tât daq saq hwât chĕq lăm gĕh wŏq bây nuih talaq may mo, 5mvăc păch sa gĕh ôp jrŏh soch don a camvŭm Siđăch Trôq bây camvŭm vơu ngwân.

6Lăm chĕq ăp sinlơ nŏq u vôq măt pôp ŏh, con nhâng cồ dĭch năc yăh sŏng Candranh Krit Yêsu, gĕh tê nơm don camvŭm tôq camvân bây camvŭm pađau tăm ti yăh rom cồ con gĕh ôp bây. 7Nŏq căh hwi vôq a khây prau yau mvâr mviq dưnya khây un cammra de. Ala nŏq, căh đom trăp an nơm sŭng sinlơ tôq camvân, 8mvăc “sinlơ đom trăp rup swan nŏq nĕh yăh sŭng takiq năr, nŏq sinlơ đom trăp nuih talaq tôq camvân nŏq gĕh yăh an ăp vrŭq, mvăc gĕh camvŭm pănggân an nggơih heq bây nggơih alưr.” 9Camvŭm nŏq cồ căh tôq camvân bây căh wŏq lĕq wân, 10mvăc khananh chŏnh n'hyoq bây tăm jâl an sinlơ heq, mvăc khananh gĕh camvân u Siđăch Trôq hôm mrĭh, Siđăch cồ Candranh Yơt ăp ndu con tamun, lor lĕq cồ tamun tôq Cô Voq.

11Căh pân ca'hya bây pađau tăm ti ăp sinlơ nŏq. 12Vâng chĕq vu sên dêh gase mva con de, nŏq căh jêng tamun chĕq an khây con sinau Cô Voq pơch bây, sŭng camvŭm nhai, sŭng vrŭq gŭq saq, sŭng sinlơ sinđach, sŭng sinlơ tôq camvân, sŭng sinlơ jrŏh soch. 13Căh sên tât vrŭq đŏc sirăq, pân ca'hya, pađau tăm ti an tât năr ănh tât. 14Vâng hŭch chĕq sinăc gŭq sŭng con, cồ sinăc lăq gĕh paq an con don a camvŭm tiêng tri, nggâm bây sinlơ chĕq ti khây chung kwŏng de.

15Căh đom trăp ăp vrŭq nŏq, căh chĕq măt chĕq tôr lăp nĕh, chĕq an sinlơ tao măq con de jêng lŭh di dân bây ăp ndu. 16Căh jơ di yăh nơm con bây vrŭq pađau tăm ti. Căh mbêr nuih sŭng ăp vrŭq nŏq, mvăc ôp canŏq con nhâng gĕh yơt lĕq rup swan nơm nggâm bây khây tamun iêt con.