1 Ti-mô-thê 2

1Payh canŏq, lor lĕq, ănh pajiêq nchhuch khây camvŭm côt wĭnh, vơu ngwân, wĭnh ala, may mo nhâng cơnh gĕh pađăc hao an ăp ndu iưn, 2an khây vatau bây lĕq săq khây tamun gĕh gŭq sŭng gatŭq ôp măq, chĕq vơn gĕh dơn rĭh du nggơih nơm iên gân bây song vong bây ăp sinlơ tôq phŭng bây rĭh rom yăh. 3Nŏq cồ sinlơ yăh rom bây yăh dip gal u măt Siđăch Trôq, Candranh Yơt vơn, 4cồ Candranh cơnh ăp ndu gĕh yơt bây saq tât tŭq wŏq gưt camvŭm dip gal. 5Mvăc ayh du Siđăch Trôq bây du Candranh gŭq vlăc canđal Siđăch Trôq bây con tamun — nŏq cồ Candranh Krit Yêsu, du mvu con tamun, 6Candranh lăq gĕh vŭh dơp nơm Nĕh chĕq trŏh se an ăp ndu, dân ca camvŭm candân lăp choh sŏng năr khay gĕh paq an, 7payh camvŭm candân nŏq cồ ănh gĕh iơq ôp tamun yảng sipơp yăh bây con tuyh — ănh nhai nhâng sŭng Candranh Krit, ănh đăng nhai mvâr — nŏq cồ ôp gru pađau an khây văl daq aling sĭq sinlơ tôq camvân bây camvŭm sŏng dip.

8Mvăc canŏq, ănh cơnh khây tamun klô rĭh u ăp gatŭq gưt vơu ngwân, iơq ti soch jrŏh hao đăng văt bây sinlơ măq nuih bây tăm cammlăh, 9dân canŏq, khây pôp ŏh ur căh ôp rom an nơm iưn sŭng sinlơ chuq sŏh yăh dip gal bây nuih talaq tănjưr nơm bây jơ nơm, đăng gal a vrŭq ta nhŭm sŏq nggâm bây mơh ha gŏch, ha ao mphla gŏq jên, 10nŏq a sinlơ tăm dip bây tamun ur nhai tănlŭh nuih talaq phŭng candŭh Siđăch Trôq don a khây vrŭq ôp yăh.

11Tamun ur căh đom gưt sŭng sinlơ gŭq ra'ngăp, sŭng sinlơ iêt chăng wân lawân. 12Sĭq măt ndây, ănh đăng an tamun ur pađau tăm ti ha văt vôq vlơ tamun klô, nŏq căh gŭq ra'ngăp. 13Mvăc A-đam gĕh sun lŭh lor, en nŏq mơ tât Ê-va, 14bây A-đam đăng tăm văc sinlơ tagat, nŏq cồ tamun ur, lăm vông lăp sinlơ lamvoch, lăq saq tât tŭq bưn bap. 15Cồ canŏq, tamun ur gĕh yơt don a vrŭq dĕh con, hê khây nĕh gât gŭq sŭng sinlơ tôq camvân, sinlơ tăm sinđach bây sinlơ soch jrŏh, bây nuih tôr yăh silang.