Lutu

Chitabu cha

Lutu

Ulongolelu

Chitabu cha Lutu chikokosa mambu ga kukangasa, gegavakolili vandu va munyumba yimonga ya Izilaeli mu lukumbi lwa vahamula va Izilaeli. Naomi mweavili mau wa vandu va munyumba yeniyi, gakumkolela malilu gavaha, lukumbi mngana waki na vana vavi vavili va chigosi vevafwili pevavi ku uyehe ku mulima wa Moabu. Pagenago, Naomi amotiswi lukumbi Lutu mweavili mmonga wa vakamwana vaki, mweavi mkolonjinji wa ku mulima wa Moabu kuhamula mwene kulandana nayu na kumtangatila. Naomi ilandana na Lutu mu lugendu lwaki lwa kuwuya ku mulima waki wa Izilaeli. Pagenago, voha vavili, Lutu na Naomi vimotiswa, pala Boazi, mmonga wa valongo va papipi va munyumba ya Naomi, peahamwili kuvayunga na kuyidakila kumgega Lutu. Lukumbi lwa vahamula lwavi lukumbi lwangaganikiwa, ndava Vaizilaeli vamahele vatamayi changali kulanda mihilu. Nambu Naomi na Lutu pamonga na Boazi vavi luhumu lwabwina kwa Vaizilaeli vevatamili kwa kulanda na kuyidakila mihilu ya Bambu Chapanga.

Kawaka mundu yeyoha mweamumanyili mundu mweayandiki chitabu cha Lutu. Mewa ligono levayandiki chitabu chenichi limanyikini lepi, nambu vandu vamahele viholalela kuvya chitabu chenichi chayandikwi lukumbi Vaizilaeli pevawuyili kuhuma ku mahamilu, kulandana na Chiebulania chechihengiki mu kuyandika chitabu chenichi. Lijabu labwina neju ndi kuvya nkosi Daudi avili mjukulu wa Lutu. Lutu avili lepi Muizilaeli. Mana yaki ndi kuvya mdala mwenuyo ayingili pagati ya vagogo va lukolo lwa Yese. Lijambu lenili likokosa uchakaka kuvya Bambu Chapanga ihagula lepi kuwanangana na vandu va munyumba, nambu ihagula kulandana na mtima wa mundu.

Gegavili mugati

Sula ya 1 yikokosa mambu ga vandu va munyumba ya Naomi na malilu gavaha gegavakolili na Naomi na Lutu chevawuyili ku Izilaeli.

Sula ya 2 yikokosa Lutu cheakonganiki na Boazi, peayimamila mahengu ga kubena mabenu mu mgunda waki, Lutu peanongayi mazanga ga mabenu, pala vabenaji pevamalili kuyola mabenu.

Sula ya 3 yikokosa Naomi cheamulagizi Lutu kumgana Boazi amgega na kumuyunga, ndava avili mlongo waki wa papipi ndava ya kugegana. Boazi ayidakili kutimilisa lijambu lenilo.

Sula ya 4 yikokosa Boazi cheagombwili mgunda wewavi wa mngana wa Naomi mweafwili. Kangi Boazi akamgega Lutu.