Mvalangu

Chitabu cha Mvalangu chiyandikwi na

Musa

Ulongolelu

Chitabu cha Mvalangu chidandawula lugendu lwa miyaka alubaini ya vana va Isilaeli kupitila kulugangatu, pavavili vakona kuyingila kumulima wevahaidiwi, ndi mulima wa Kanaani. Chitabu chenichi chikemiwa Mvalangu muni chivi na pahala pavili zezidandawula mvalangu wa vagosi vavakomana ngondo vevavili mukila likabila la Isilaeli, musula ya 1 na 26. Vasomi visadika kuvya chitabu cha Mvalangu ndi chimonga ya vitabu vya mihilu, Mwanzu na kuwuka na Valawi na kumbukumbu la mihilu, vyayandikwi na mlota Musa. Uchakaka wenuwu uwonekana muchitabu chene cha mvalangu, pala pachitumbula kwa kujova jova Chapanga palongili na Musa, mvalangu 1:1. Yihotoleka mewa kuvya Musa ayandiki pandu pavaha pa chitabu chene cha Mvalangu, na vayandika va mayandiku vayonjokisi vipandi vingi mumiyaka yeyagelekili. Ndi yinonopa kujova kuvya Musa ngahotwili kuyandika kuvala ungolongondi na kujilumba mwene mumvalangu 12:3.

Mulugendu lwavi kulugangatu, vana va Isileli vamuvembenikili na kumng'anamukila Chapanga pamahele. Ndava ya uhakau wavi wenuwo vabuniwi ndava ya matendu gavi. Luhumu lumonga wa lijambu lenili ndi lukumbi vana va Isilaeli pavayogwipi na kung'ung'uta kuvya Vakanaani vavili na makakala neju kuliku vene Mvalangu 14:1-4. Ndava ya lijambu lenilo Chapanga ajovili kuvya chiveleku chenichi choha cha vandu ava va Vaisilaeli yati viyingila lepi kumulima wevahadiwi. Yavi hati Musa mwene amyidakili lepi Chapanga, ndi ndava ya lijambu lenili hati Musa mwene ayingi lepi ku mulima wevahaidiwi. Pamonga na genago vandu vambelili chapanga nambu ayendelili kuvayunga. Lukumbi vamakoko va vandu va Isilaeli pavamtolili mlota wa chipagani mwaakemiwi Balaamu avapela likoto kwa vandu va Isilaeli, nambu Chapanga amkitli Balaamu ajovili avamotisa Vaisilaeli Malangu 22-24

Gegavili

1 Mambu gegivala mvalangu wa vana va Isilaeli, mewa kuvili na mpangililu wa kambi yavi cheuvili, mahengu ga vamteta, na teta zeziwusiwi kuhuma mukila likabila lukumbi pandu pa kuwusila teta na Lindanda pevyakitiwi kuvya vya Bambu Musula 1 na ya 10 na ya 11

2 Pa genago chitabu cha mvalangu chidandawula lugendu lwa vandu va Isilaeli kupitila kulugangatu, Musula ya 10:12 mbaka musula 25

3 Kuvalangiwa kwa mbili na madandaulo gangi kuvala vandu va Isilaeli. Yeniyi ndi pamonga na mahina ga mupandu mwevavikayi mandanda vana va Isilaeli pevavili mulugendu kuhamba kumulima wevahaidiwi, na chila mulima wenuwo cheugaviwa mumakabila goha pevivya vayingili mulima wenuwo. 26 mbaka 36.