Vahamula

Chitabu cha

Vahamula

Ulongolelu

Chitabu cha Uhamula ndi chikokosa mambu ga vandu va Isilaeli pala pevamalili kuhotola kungondo ya kumulima wa Kanaani, lwavili lukumbi Vaisilaeli vakumleka Chapanga mala pamahele na Bambu Chapanga alekili lepi kuvasangula. Mala pamahele Vaisilaeli vatumbulayi kufugamila michapanga hingi na mwene Chapanga ngaavaletili vandu kuhuma kumilima yingi muni vavang'ahayi. kangi vandu vavembili na kumuwuyila Chapanga, penapo ndi Chapanga akavahagulila vachilongosi vevakemewi, “vahamula,” Muni kuvalongosa na kuvasangula kuhuma kwa vandu avo vevavang'ahayi.

Kawaka mweavii na uchakaka kuvya yani mweayandiki chitabu chenichi. Vandu vamahele kwa kulanda mapokelu nunuyu vasadiki kuvya mlota Samweli ndi mwayandiki, nambu tihotola kujova kuvya chitabu chenichi chayandikwi lukumbi Vaisilaeli vamali kuvya na nkosi, muni chitabu chenichi chilangisa pandu pamahele kuvya Vaisilaeli vavii lepi na nkosi, mu sula ya 17:6; 18:1; 19:1; na 21:25. Ngati vandu Vaisilaeli vahumili ku Misili mumwaka wa 1400 kwakona kuvelekewa Kilisitu, (lola ulongolelu wa chitabu cha Kuwuka kwa makokoso neju) Hinu yihotoleka mambu ga Vaamuzi gahumalili pagati ya mwaka 1300 mbaka 1050 kwakona kuvelekewa Kilisitu lukumbi Sauli peavili nkosi.

Gegavili mugati:

Ngondo za pamwishu pagati ya Vaisilaeli na Vakanani paamali kufwa Yoshua. Mewa sula zenizi zidindula lipazia kumanyisa chipindi cha Vaamuzi pala Chapanga peayinwili vachilongosi vevalongwisi na kuvasangula Vaisilaeli kuhuma mumawoko ga makoko vavi, musula 1 mbaka 3:6

Makokoso ga Vaamula ndalindali vevayinuliwi na Chapanga kuvatangatila Vaisilaeli, musula ya 3:7 mbaka 16:31

Mambu ga kubelelewa kwa Vaisilaeli, musula ya 17 mbaka 21.