Yoshua

Chitabu cha

Joshua

Ulongolelu

Chitabu cha Yoshua chiyendeleza madandaula ga kihistoliya ya mulima wa Isilaeli chitumbula pala pechimalakisila chitabu cha ukumbuso Mihilu. Vandu va Isilaeli vatumbwili kutama upandi welihumila lilanga wa mfuleni Yoludani. Chitabu cha Yoshua chidandaula Vaisilaeli chevakupwiki mfuleni Yoludani kuni vilongoswa na Yoshua na kuuzangila mlima wa Kanaani kuni vilongoswa na Yoshua. Vakitili chenichi muni Chapanga avalagazili vakita chenicho. Mulijambu lenili, Chapanga atimalisi ahadi yeajovili kuvya yati akuvapela mulima wa Vakanaani Chiveleku cha Abulahamu, Utumbula musula ya 12:7.

Yimanyikana lepi kuvya ndi yani mweayandiki na kuchivika bwina chitabu cha Yoshua. Mulukumbi lungi myandika ilongela ngati mwene avii mmonga lukumbi mambu pegahumalila (luhumu, musula ya 5:1, 6). Ndava yeniyo, vasomaji vamahele va mambu ga Bibiliya vihololela kuvya Yoshua mwene ndi ajiyandikili pandu pavaha pa chitabu chene. Chakaka kuvya mundu yungi ayandiki neju ya Yoshua pandu pangi pa chitabu ichi, luhumu lwa malovi gala malilu ga Yoshua musula ya 24:29. Vasomaji vangi visadika kuvya chitabu ichi chayandikwi ngati miyaka miya nane pegahumalili mambu gene pegamali kuhumalila. Mambu gegiluwuliwa mugati ya chitabu cha Yoshua yijovekana gahumalili mumwaka wa elufu yimonga na miya hivili, ngati miyaka alubaini lukumbi amalili ulongosi waki Lamisesi kutumbula kuyilongosa mulima wa Misili. Lamisesi ihotoleka kuvya ndi chilongosi mweihololewa kuvya aulongwisi mulima wa Misili lukumbi Vaisilaeli vihuma kumulima wa Misili Kuwuka musula ya 1:11.

Gegavi mugati

Musula 1 mbaka 5:12 zidandaula chila Vaisilaeli chevakupwiki mfuleni Yoludani na kuyingila mumlima wa Kanaani.

Musula ya 5:13 mbaka 12 zidandaula mambu ga mipangu ya Vaislaeli kuuzangila mulima wa Kanaani.

Musula ya 13 mbaka ya 21 zidandaula chila mulima wa Kanaani cheugaviwi kwa makabila goha ga Isilaeli.

Musula ya 22 mbaka ya 24 zidandaula chila makabila gangi chegawuyili upandi welihumila lilanga wa mfuleni Yoludani, Yoshua cheakuvalaga vandu, lifwa na maziku gaki pamonga na chila Vaisilaeli chevaselebukili kumbukumbu ya lilaganu lavi na Chapanga.