Ukumb

Ukumbuso wa

Malagizu

Ulongolelu

Chitabu cha ukumbuso wa malagizu ndi mawuyilu ga malagizu gegidandauliwa mugati ya muvitabu vingi vya malagizu gala muvitabu muhanu vya kutumbula vya Lilaganu la Kadeni. Lihina la Chiebulania la chitabu chenichi mana yaki “Malovi.” Yisadikika kuvya Musa ndi mwayandika wa chitabu ichi nambu nga pandu pahupi pamwishu pidandaula lifwa laki. Chitabu ichi chitumbula kwa malovi aga, “Aga ndi malovi ga Musa geavajovili Vaisilaeli.” Liholo kuvya Musa ndi mwayandika wa Chitabu ichi yilangiswa kuvya ndi chakaka pamahele mu Lilaganu la Hinu. Luhumu lumonga lupatikana muchitabu cha Matendu ga vamitumi musula ya 3:22-23 Petili iyandika kavili malovi gegavi muchitabu cha Ukumbuso wa Malagizu musula ya 18:15-18 na kuyandika kwa kujova kuvya aga ndi malovi ga Musa. Yihotoleka kuvya Musa ndi muyandika wa chitabu cha Ukumbuso wa Malagizu, pamonga na chitabu cha Kutumbula na Kuwuka na Valawi na Mvalangu, pagati ya miyaka 1400 amala 1300 kwakona kuvelekewa Yesu Kilisitu.

Chitabu cha ukumbuso wa Malagizu chayandikwi ngati malaganu pagati ya nkosi na unkosi wungi weakuutalalila, ngati chayakitiki lukumbi lwa kadeni. Ndi malaganu pagati ya Chapanga na Vaisilaeli. Chapanga ayidakili kuvamotisa vandu ngati ngaviyidakila na kulanda malagizu gaki. Kuvya Vaisilaeli ngavabelili malagizu ga Chapanga, ndi ngavabunili. Lenili ndi lijambu livaha lelilongalewa pandu pamahele muchitabu ichi, nambu neju musula ya 27 na musula ya 28 zilongalela neju na uchakaka uwu yilangisa mota na likoto zila zezipatikana ndava ya kuyidakila amala kubela kuyidakila kwa Vaisilaeli. Makabila ndalindali ga Isilaeli gayimili pavitumbi vivili yeyilolana, vangi viwusa mota na vangi viwusa na likoto ngati njila ya kulimanyisa kuvya vayidakili liaganu lenilo.

Gegavili

Musa ikumbusa gegavahumalili Vaisilaeli lukumbi pavagendayi lugangatu, musula ya 1 mbaka ya 3.

Udandawula mambu gegajovewayi mulilaganu pagati ya Chapanga na vandu vaki musula ya 4 mbaka ya 26.

Vandu va Isilaeli vapokili mota na likoto kwa lwami luvaha kulangisa kuvya kuhumila lukumbi ulo lilaganu lihenga lihengu, musula ya 27 mbaka ya 30.

Musa ilongela malovi ga kumalakisila kwa Joshua na kwa kila likabila la Isilaeli kwakona lifwa laki, pamwishu musula ya 31 mbaka ya 34.