1 Samweli

Chitabu cha kutumbula cha

Samweli

Ulongolelu

Hitabu ya 1 Samweli na 2 Samweli pa kutumbula chavili chitabu chivaha chechamanyikini ngati Chitabu cha Samweli. Pakutumbula chitabu chenichi chagavaniswi na kuvya hitabu hivili mu litoleo lelakemiwi Seputuaginti. Lenili lavili litoleo la kutumbula la tafusili ya Lilaganu la Kadeni kwa luga ya Chiyunani. Liina la tafusili yeniyo lavi na mana kuvya yayandikwi na vandu vasomi sabini amala sabini na vavili va Chiyawudi. Mutafusili ya Chigiliki, hitabu ya 1 Samweli na 2 Samweli vyakemiwi 1 Vankosi na 2 Vankosi, na mu litoleo la Chilatini lelagelekili, hitabu yeniyo yang'anamwiki na kukemiwa 1 Vankosi na 2 Vankosi. Hinu hitabu yeyimanyikana lelu iyi ngati 1 Vankosi na 2 Vankosi vyakemiwi 3 Vankosi na 4 Vankosi. Chitabu cha 1 Samweli na 2 Samweli vikokosa wumi wa mlota Samweli na nkosi Sauli na nkosi Daudi. Samweli avii chilongosi wa mwishu lukumbi mulima wa Izilaeli pewabadiliswi kuhuma kutalaliwa na vahamula na kutumbula kutalaliwa na vankosi. Samweli ndi mweavayitalili mahuta Sauli na Daudi kuvakita vavya vankosi va kutumbula va Izilaeli. Hitabu ya 1 Samweli na 2 Samweli vidandawula histoliya ya mulima wa Isilaeli lukumbi lwenulo.

Kawaka mundu mweamanyili yani mweayandiki chitabu cha 1 Samweli na 2 Samweli. Muyandika ajiluwili lepi mwene mu chitabu chenichi, nambu pangi avii mumi lukumbi lwoha lwa ulongosi wa nkosi Daudi, na pangi asigalili mumi hati pawapitili ulongosi wenuwo, ndi pangi yihotoleka ahotwili kugawona na kusoma mayandiku gangia gegadandawili wumi wa Sauli na Samweli. Ndava muni yimanyikana lepi mundu amala vandu vevayandiki hitabu yeniyi, mewa yimanyikana lepi hitabu yeniyi yayandikwi ndali.

Gegavili mugati

Mu sula 1-3 zikokosa kuvelekwa na kukemelewa kwa mteta Samweli.

Mu sula ya 4-7 zikokosa Vafilisiti chevatoli Lisanduku la Lilaganu la Bambu Chapanga kuhuma kwa Vaisilaeli na chelikomakesa mu milima ya Vafilisiti lukumbi pelavili kwenukwo.

Mu sula ya 8-15 zikokosa chechahumalili lukumbi Vaisilaeli pevayupili vapewa nkosi wavi, na Samweli akamyitila mahuta Sauli avya nkosi wa kutumbula na Bambu Chapanga cheamubeli Sauli.

Mu sula ya 16-31 zikokosa Samweli cheamuyitili mahuta Daudi avya nkosi wa pili wa Isilaeli na Sauli chealingili kumkoma Daudi mbaka lukumbi peafwili Sauli.