Solomon La 8

1Nang koe kaie manu e sanutui karadip e,

ka net e, ka thangroi patetlah o sak han ka ngai.

Kai ni nang teh, alawilah kâhmo vaiteh,

na paco nakunghai ayânaw ni kai teh

na pathoe mahoeh.

2Anu e irakhan na kut dawk hoi

na hrawi vaiteh na ceikhai han.

Ahni ni hai kai hai na cangkhai han.

Kai ni tâsi hoi kalawt e misurtui hoi

taletui hah na nei sak han.

3Ahnie avoilah,

e kut kaie ka lû rahim a hruek vaiteh,

aranglae kut hoi na takawi seh.

4Oe Jerusalem canunaw, ka pahren e teh

amahmawk a kâhlaw hoehroukrak

na pâhlaw awh hoeh nahanelah,

kahrawng e sayuk sakhinaw noe lahoi

lawk na thui awh.

5A pahren dawk kamngawi laihoi

kahrawngum hoi ka tho e hateh

api han namaw.

Epal thingkung rahim nang teh na pâhlaw toe.

Hote hmuen koe nange na manu ni

nang teh na hâ toe.

Hote hmuen koe nang na khe teh,

hâ e lah na hruek toe.

6Kai teh nange na lung dawkvah

tacik na kin leih lah.

Na kut dawk hai tacik na kin leih.

Bangkongtetpawiteh, lungpatawnae teh,

due e patetlah a thao.

Dipmanae lungthin teh phuen kho patetlah a ru.

Ahnie a hue teh, hmaisaan hoi

hmaito patetlah ao.

7Hatnavah, tuinaw ni

lungpatawnae roum sak thai hoeh.

Tuikalen ni hai pâyawt thai hoeh.

Tami ni ama im kaawm hnopai pueng

lungpatawnae lahoi poe han a ngai nakunghai

puenghoi dudamnae doeh kâhmo ti.

8Kaimouh koevah kanaw rae ka tawncanu

buet touh ao rah.

Ahni teh sanu co hoeh rah.

Hote ka tawncanu a pacei awh navah,

ahni hanelah bangtelamaw ka ti awh han.

9Ahni teh rapan lah awm pawiteh,

ahni van ngunrapan ka sak han.

Takhang lah awm pawiteh

Sidar thing hoi ka kalup han.

10Kai teh kho rapan lah ka o.

Kaie sanu hai imrasang patetlah o.

Hatdawkvah, kai teh

nang na hmalah hawinae ka sak.

11Baalhamon ram dawk takha buet touh ao.

Hote misur takha teh,

karingkungnaw koe ka hlai sak teh

a paw a ca phu lah

shekel thawng touh rip a sin awh.

12Ka tawn e misur takha teh kahma lah ao.

Oe Solomon, ngun shekel thong touh

nama hanelah ao teh,

karingkungnaw ni cumhni touh rip a la awh.

13Takha thung kaawm e,

nange tami na huikonaw ni nange

na lawk teh a ngai awh.

Kai hai na thaisak van awh haw.

14Ka pahren nang kai koe karanglah tho leih.

Hmuitui monnaw dawk kaawm e

sayuk sakhicanaw patetlah na awm sak haw.