Solomon La 2

1Kai teh Sharon e rosi pei hoi kâvan teh

ayawn dawk e lili pei lah ka o.

2Ka pahren e nang teh, ka lungpataw e tangla,

pâkhingum e, lili pei patetlah na o.

3Kahrawngum ka paw e

Epal thingkung patetlah ka pahren nang teh,

thoundounnaw e rahak na o.

Kai teh ahnie tâhlip dawk kanawmca lah ka o teh,

a paw teh kai hanelah a radip poung oe.

4Ahni ni kai teh buvennae im koe na hrawi teh,

kaie lathueng a yap e hni teh

a lungpatawnae doeh.

5Kai teh ngaipatawnae hoi ka o dawkvah

misur hoi Epal paw hoi

lung bout na pahawi haw.

6Ahnie avoilae a kut ka lû rahim a ta teh,

aranglae kut hoi na takawi na seh.

7Oe Jerusalem canu ka pahren e teh,

a mahmawk a kâhlaw hoeh roukrak

na pâhlaw awh hoeh nahanelah,

kahrawng e sayuk sakhinaw thoebo laihoi

nangmouh teh lawk na thui awh.

8Khenhaw! ka pahren e lawk doeh.

Montang monruinaw yawngtapue laihoi a tho.

9Ka pahren e teh, sayuk sakhi ca patetlah ao.

Rapan lawilah a kangdue.

Hlalangaw koe a khet teh,

hlalangaw koe a kâpâtue.

10Ka pahren ni na kaw teh,

a dei e lawk teh, ka pahren poung e tangla,

a meikahawi e, thaw nateh tho haw.

11Khenhaw! kasik hai aloum teh

cotui hai abaw toe.

12Talai van vah, a peinaw a kamhlawng toe.

Tavanaw hai a cainae tue a pha toe.

Maimae ram vah, bakhu lawk hai thai toe.

13Thaibunglung kung a pawnaw hai a hmin toe.

Misurkung hai a pei teh, a hmuitui toe.

Ka pahren e ka imlawinu, a meikahawi poung e,

thaw nateh tho leih.

14Lungsong rahak e bakhu,

na mei heh na hmawt sak haw.

Na lawk hai na thaisak haw.

Na lawk a rading teh na mei teh ngai ao poung.

15Maimae misurnaw teh

a pei lahun toung dawkvah,

misurkungnaw ka raphoe hane

Asuinaw hoi Asuicanaw hah man awh.

16Kaie ka pahren e teh kai hanelah ao e patetlah

kai hai ahni hanelah ka o.

Ahni teh tucahunaw hah

kahrawngum a khoum teh a kawkhik.

17Khohmo a kahma teh,

khodai totouh ka pahren teh

Bether mon dawk e

sayuk sakhi patetlah doeh ao.